ދޮޅު އަހަރު ވީއިރުވެސް އާންމު އުނދަގުލަކަށް ވީ މީހާގެ މައްސަލާގައި ހައްލެއް ނުލިބުނު

މިރޭ ސޯޝަލް މީޑިއާގައި އެންމެބޮޑަށް ވައިރަލްވެގެންދިޔައީ ހެންވޭރު ކަށިމާ ހިނގުމާއި ދޫހިމެރި މަގުގައި ތަކުރާރުކޮށް މީހުންނަށް އުނދަގޫކުރާ މީހެއްގެ ވާހަކައެވެ. އެމީހެއްގެ އުނދަގޫ ބޮޑުވެގެން އެންމެފަހުން އެ ސަރަހައްދުގައި ދިރިއުޅެމުން އަންނަ ޒިންމާދާރު މަގާމެއް އަދާކުރައްވާ ބޭފުޅެއް ކަމަށްވާ މުޙައްމަދު ސައީދު، ހެންވޭރު ޕޮލިސް ސްޓޭޝަނުގައި ބަނޑުހައިހޫނުކަމުގެ ހަޅުތާލެއް ފައްޓަވާފައެވެ. ސައީދުގެ ހަޅުތާލު އެންމެ ފުރަތަމަ ފެއްޓެވީ ހެންވޭރުގައި ހުންނަ ފުލުހުންގެ އިދާރާގެ ތެރެއިންނެވެ. އެންމެފަހުން 14 ގަޑިއިރުފަހުން އެތަނުން ނިކުންނަންޖެހުމުން މިހާރު ހަޅުތާޅު ކުރިއަށްގެންދަނީ ފުލުހުންގެ އިދާރާކައިރީ މަޖީދީމަގުގައެވެ.

ހަޅުތާލުގެ ތެރެއިން ސައީދު ވަނީ އާންމު އުނދަގުލަކަށް ވެފައިވާ އަޙްމަދު ފައިރިޝް ނަމަކަށް ކިޔާ މީހާގެ ފަރާތުން ކުރިމަތިވާ އާންމު އިޖުތިމާއީ މިންގަނޑާ ހިލާފް ދުއްތުރާތައް ހިއްސާކުރައްވާފައެވެ. އެގޮތުން ކުޑަކުދިން ތިބޭ ގަޑީގައިވެސް ހުތުރުބަހުން މުއާމަލާތް ކުރުމާއި، ޖިސްމާނީގޮތުން އެކި ފަރާތްތަކަށް ކުރިމަތިކުރުވަމުންދާ ކަންތައްތައް ހިމެނެއެވެ.

އޭނާގެ ފަރާތުން ކުރިމަތިލާންޖެހުނު އުނދަގޫތަކުގެ ތެރޭގައި:

• މަގުން ހިނގާބިނގާވެ އުޅޭ މީހުންނާ ދިމާލަށް ހުތުރު ބަހުން ހަޅޭއްލެވުން.

• މަގުމައްޗަށް ސައިކަލު ނެރުމާއި، ބަންދު ބޯޑުތައް ދަމާފައި މަގު ބަންދުކޮށް ޓްރެފިކަށް ހުރަސްއެޅުން.

• މީހުން ދިރިއުޅޭ ގެތަކަށް ކުނި އުކުން

• އޭނާ ދިރިއުޅޭ އިމާރާތުގެ ބެލްކަނީން މަގުމަތީގައި ތިބޭ މީހުންގެ ގަޔަށް ތެލާއި ފެން އުކުން

ސައީދު މިރޭ ބުނެފައިވަނީ ފުލުހުން އޭނަ ހައްޔަރުކުރިނަމަވެސް ހަޅުތާލު ކުރިއަށްގެންދާނޭކަމަށާއި، ބޭނުންވަނީ މި މައްސަލައަށް ދައިމީ ހައްލެއްކަމަށެވެ. މި މައްސަލާގައި ކަމާބެހޭ އިދާރާތައް މެދުވެރިކޮށް ހައްލެއް ހޯދުމަށް މަސައްކަތްކުރަމުންދާތާ ދޮޅުއަހަރުވެފައިވާކަން ސައީދު ވަނީ ފާހަގަކުރައްވާފައެވެ. އެގޮތުން ފުލުހުންގެ އިތުރުން އެންޑީއޭ އާއި އެނޫންވެސް ކަމާބެހޭ މުއައްސަސާތަކަށް މައްސަލަ ހުށަހެޅިނަމަވެސް އެދެވޭފަދަ ހައްލެއް ލިބިފައި ނުވާކަމަށެވެ.

ސައީދު ވަނީ މިކަމުގައި ދައުލަތުގެ މުޅި ސިސްޓަމް ފެއިލްވެއްޖެކަން ފާހަގަކޮށް، މިކަން ހުއްޓުވުމަށް ހަޅުތާލުކުރުން ނޫން ގޮތެއް ނެތްކަން ފާހަގަކޮށް ހަޅުތާލުކުރުން ކުރިއަށްގެންދާނޭކަމަށް ބުނެފައެވެ.