ދަރަނި ދެއްކޭނެ، އިތުރު ޓެކުހެއް ތައާރަފުކުރުމުގެ ވިސްނުމެއް ނެތް: މާލީ ވަޒީރު
ރާއްޖެއަށް ދަރަނި ނުދެއްކޭނެ ހާލަތެއް މެދުވެރިނުވާނެ ކަމުގެ ޔަގީންކަން މާލީ ވަޒީރު ހަސަން ޒަރީރު ދެއްވައިފި އެވެ.
ވަޒީރު އެކަމުގެ ޔަގީންކަން ދެއްވީ މިރޭ އޮތް "އަހާ" ފޯރަމްގައި ވާހަކަފުޅު ދައްކަވަމުންނެވެ. މާލީ ވަޒީރު ވިދާޅުވީ ނޫފުލޭވަރުގެ ބުރައެއް ނެތް ދަރަނި ދެއްކުމުގައި ނެތް ކަމަށެވެ. މި ސަރުކާރުން ދަރަނި ދެއްކުމުގައި ގެންގުޅޭ ސިޔާސަތަކީ އެއީ ދައްކަަން ޖެހޭ އެއްޗެއްކަން އެނގި ދުރާލާ އެކަމަށް ތައްޔާރުވުން ކަމަށެވެ.
ދަރަނި ދައްކަން ޖެހެނީ ބޭރު ފައިސާއިން ކަމުން ބޭރު ފައިސާ ލިބޭނެ ގޮތްތައް ގާނޫނުތަކުން ދަނީ ފަހިކުރަމުން ކަމުގައި ވިދާޅުވި އެވެ. އަދި ދަރަނި ދައްކަން އެކަމަށް ހާއްސަ ފަންޑަށް ފައިސާ ޖަމާކުރަމުން ގެންދާ ކަމަށް ވިދާޅުވި އެވެ.
ވަޒީރު ވިދާޅުވީ މިއީ ދަރަނީގެ ގޮތުގައި އެންމެ ގިނަ އަދަދަކަށް ފައިސާ ދައްކަން ޖެހޭ އަހަރު ކަމަށާ ކުރިއަށް އޮތްތާ އެފަދަ އަދަދަކުން ދަރަނި ދައްކަން ނެތް ކަމަށެވެ. އެހެން ކަމުން ދަރަނި ދެއްކުމުގައި މި އަހަރުތެރޭ ކުރިމަތިވި ގޮންޖެހުންތަކެއް ކުރިމަތިނުވާނެ ކަމުގައި ވިދާޅުވި އެވެ.
"ކުރިއަށް އޮތްތަނުގައި ދައްކަން ޖެހޭ ދަރަންޏަކީ އަޅުގަނޑުމެންނަށް ލިބޭ އާމްދަނީން މެނޭޖްކުރެވޭނެ ދަރަނިތަކެއް"
މީގެ އިތުރުން ވަޒީރު ވަނީ އިތުރު ޓެކްސްތަކެއް ތައާރަފުކުރުމުގެ އެއްވެސް ވިސްނުމެއް ނުގެންގުޅޭ ކަމުގައި ވިދާޅުވެފަ އެވެ. އަދި ސަރުކާރުގެ އަމާޒަކީ ޓެކްސްގެ ނިޒާމު އިތުރަށް ހަރުދަނާ ކުރުމަށް ކަމުގައި ވިދާޅުވި އެވެ. 2024 ވަނަ އަހަރު ޓެކްސްގެ ގާނޫނަށް ބައެއް ބަދަލުތައް ގެނެސް ޓެކްސްގެ މިންވަރު ބޮޑުކޮށްފައިވާ ކަމަށާ މިހާރުގެ އަމާޒު ހުރީ ގާނޫނަށް ބަދަލުތައް ގެނެސް ޓެކްސްގެ ނިޒާމު ހަރުދަނާކޮށް ގާނޫނުގައި ހުރި ލޫޕްހޯލްތައް ބެއްދުން ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
