"ފައިސާ އެބަހުރި، 1273 މަޝްރޫއު މިހާރު އެބަ ހިނގާ"
މިވަގުތުވެސް 1273 މަޝްރޫއު ކުރިއަށްދާ ކަމަށާ އެ މަޝްރޫއުތަކަށް ބޭނުންވާ ފައިސާ ވެސް އެބަހުރި ކަމަށް މާލީ ވަޒީރު ހަސަން ޒަރީރު ވިދާޅުވެއްޖެ އެވެ.
ވަޒީރު މިހެން ވިދާޅުވީ މިރޭ އޮތް "އަހާ" ފޯރަމްގައި ވާހަކަފުޅު ދައްކަވަމުންނެވެ. މިރޭގެ ފޯރަމްގައި ވަރަށް ގިނަ އާންމުން ވަނީ އެކިއެކި މަޝްރޫއުތަކާ ގުޅޭގޮތުން ސުވާލުކޮށްފަ އެވެ. ބައެއް ރަށްރަށުގެ ރައްޔިތުން ވަނީ މަޝްރޫއުތައް ކުރިއަށް ނުދާތީ އެކަމުގެ ކަންބޮޑުވުން ހިއްސާކޮށްފަ އެވެ. އަދި ހުއްޓިފައިވާ ބައެއް މަޝްރޫއުތައް ފާހަގަކޮށް އަލުން ފެށޭނީ ކިހާ ހިސާބަކުތޯ ސުވާލުކޮށްފައިވެ އެވެ.
އެ ސުވާލުތަކަށް ޖަވާބު ދެއްވަމުން މާލީ ވަޒީރު ވިދާޅުވީ މިހާރުވެސް 1273 މަޝްރޫއެއް ކުރިއަށްދާ ކަމަށެވެ. އެއީ އެ މަޝްރޫއުތަކަށް ބޭނުންވާ ފައިސާ ވެސް ހަމަޖެހިފައިވާ މަޝްރޫއުތައް ކަމުގައި ވިދާޅުވި އެވެ. އަދި މަޝްރޫއުތަކަށް ފައިސާ ދައްކަންޖެހޭ ވަގުތު އަދާކުރެވޭނެ ކަމުގެ ޔަގީންކަން ދެއްވި އެވެ.
ވަޒީރު ވިދާޅުވީ ބައެއް މަޝްރޫއުތައް މަޑުޖެހިފައިވަނީ މެދުއިރުމަތީގައި މިހާރު ފެށިފައިވާ ހަނގުރާމައާ ގުޅިގެން ތަކެތި ލިބުމުގައި ހުރި ދަތިތަކުގެ ސަބަބުން ކަމަށެވެ. އަދި ތަކެތި ލިބެމުންދާ ވަރަކުން މަޝްރޫއުތައް އަލުން ފެށިގެން ކުރިއަށްދާ ކަމުގައި ވިދާޅުވި އެވެ.
އަދި އަމާޒަކީ ގިނަ މަޝްރޫއުތައް އަންނަ އަހަރުގެ ނިޔަލަށް ނިންމާލުން ކަމުގައި ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
