މާލޭގެ ތަރައްޤީއަށް މިވަގުތުއޮތް އެންމެބޮޑު ހުރަހަކީ ލޭންޑް ޔޫސް ޕްލޭން ހިފެހެއްޓިފަ އޮތުން: ސައިފް

މާލޭގެ ތަރައްޤީއަށް މިވަގުތު އޮތް އެންމެބޮޑު ހުރަހަކީ މާލޭގެ ލޭންޑް ޔޫސް ޕްލޭން ފާސްނުކޮށް ހިފެހެއްޓިފަ އޮތުން ކަމަށް މާލެ ސިޓީ ގަލޮޅު އުތުރު ދާއިރާގެ ކައުންސިލަރު މުޙައްމަދު ސައިފް ފާތިހު ވިދާޅުވެއްޖެއެވެ.

ސައިފް މިފަދައިން ވިދާޅުވީ މާލޭގެ ލޭންޑް ޔޫސް ޕްލޭން ފާސްނުކޮށްދީ އެއް އަހަރުވުމާއި ގުޅިގެން މޭޔަރު މުޢިއްޒު ކަންބޮޑުވުން ފާޅުކުރައްވާ ދެއްކެވި ވާހަކަފުޅާއި ގުޅިގެން ކައުންސިލްގެ 80 ވަނަ ރަސްމީ އާއްމު ޖަލްސާގައި ވާހަކަ ދައްކަވަމުންނެވެ. ސައިފް ވިދާޅުވީ ލޭންޑް ޔޫސް ޕްލޭން ފާސްކޮށްނުދީ އޮތުމުން މާލޭގެ ރައްޔިތުންނަށް ހޯދައިދޭންޖެހޭ މައުނަވީ ހަމަޖެހުމެއް ހޯދައިދެވެން ނެތްކަމަށެވެ.

”އަޅުގަނޑުމެން ހޯދައިދޭންޖެހޭ އެއްވެސް މައުނަވީ ރިލީފެއް މާލޭގެ ރައްޔިތުންނަށް ހޯދައިދެވޭކަށްނެތް ލޭންޑް ޔޫސް ޕްލޭންގަ ކަންތައްތައް ކުރުމަށް އެކަށައަޅާފަވާ ސަރަޙައްދުތަކާ އޭގެ ޕެރިމީޓަރސް އެނގިގެން ނޫނިއްޔާ. އަޅުގަނޑުމެންނަށް އެފުރުޞަތު މިއޮތީ ބަންދުވެފަ.“ ސައިފް ވިދާޅުވިއެވެ.

މީގެ އިތުރުން ސައިފް ވިދާޅުވީ ކުރިއަށް އޮތްތަނުގައިވެސް ލޭންޑް ޔޫސް ޕްލޭން ފާސްވެގެންދާނެ ކަމަށް ލަފާނުކުރެވޭ ކަމަށާއި، ފެންނަނީ ލޭންޑް ޔޫސް ޕްލޭން ހިފަހައްޓާތަން ކަމަށެވެ. އަދި ކައުންސިލާއި ގުޅިގެން ޙަރަކާތްތެރި މަސައްކަތެއް ސަރުކާރުން ކުރަމުންދާތަން ނުފެންނަ ކަމަށްވެސް ސައިފް ވިދާޅުވިއެވެ. މިއާއިއެކު އޭނާ ވިދާޅުވީ ލޭންޑް ޔޫސް ޕްލޭން ފާސްކޮށްނުދީ ހިފެހެއްޓުމުން ވަކި ހިސާބަކުން ކައުންސިލްގެ ފަރާތުން ކޯޓަށް ދާންޖެހޭނެ ކަމަށެވެ.

”ފެންނަނީ ލޭންޑް ޔޫސް ޕްލޭން ހިފަހައްޓާތަން، ލޭންޑް ޔޫސް ޕްލޭން ފާސްވިޔަނުދީ ހިފެހެއްޓީމަ ފަހަރުގަ ކަންތައްތަކެއް އަޅުގަނޑުމެންގެ މައްޗަށް ދަތިކޮށްގެން ނޫނީ އޮބެހެއްޓޭނެ ކަމަށް ޤަބޫލުކުރެވެނީ. ވަކި ހިސާބަކުން އަޅުގަނޑުމެން ދާންޖެހޭނެ ކޯޓަށްވެސް.“ ސައިފް ވިދާޅުވިއެވެ.

ލާމަރުކަޒީ ޤާނޫނުގައި ބުނާގޮތުން މި ޕްލޭން ފާސްވެފައިވާކަމަށް މީގެ ކުރިން ހައުސިންގް މިނިސްޓަރު ވެސް ވިދާޅުވެފައިވާކަމަށާއި، މި ލޭންޑް ޔޫސް ޕްލޭންގެ ކަންތަކުގަ ކައުންސިލްގެ މުޅި އެޖެންޑާ މި ފަސް އަހަރު ދުވަހު ކުރަންޖެހޭ މަސައްކަތްތައް އެއްކޮށް ރަހީނުވެފަ އޮންނަގޮތަށް އޮތުމަކީ ޤަބޫލު ކުރެވޭނެ އަދި ބަލައިގަނެވޭނެ ކަމެއް ނޫންކަމުގައި ސައިފް ވިދާޅުވިއެވެ.