ގުޅިފަޅުން 85 ހެކްޓަރު، ގިރާވަރުފަޅުން 50 ހެކްޓަރު އިތުރަށް ހިއްކަން ނިންމައިފި

މިހާރު ފަށާފައިވާ ގުޅިފަޅާއި ގިރާވަރުފަޅު ހިއްކުމުގެ މަޝްރޫއަށް ބަދަލުތަކަށް ގެނެސް އިތުރަށް ބިން ހިއްކަން ނިންމާފައިވާކަން ރައީސުލްޖުމްހޫރިއްޔާ ޑރ މުހައްމަދު މުއިއްޒު އިއުލާނު ކުރައްވައިފި އެވެ.

އެމަނިކުފާނު މިފަދައިން އިއުލާނު ކުރައްވާފައި ވަނީ ފުށިދިއްގަރުފަޅު ހިއްކުމުގެ މަޝްރޫއު އިފްތިތާހުކޮށްދެއްވުމަށް ބޭއްވި ޚާއްސަ ހަފްލާގައި ވާހަކަފުޅު ދައްކަވަމުންނެވެ.

އެމަނިކުފާނު ވާހަކަފުޅު ފައްޓަވަމުން ވިދާޅުވީ ބޯހިޔާވަހިކަމުގެ މައްސަލަ ޙައްލުކުރުމަކީ އެމަނިކުފާނުގެ ސަރުކާރުން އެންމެ އިސްކަމެއް ދެއްވައިގެން ކުރައްވާނެ ކަންކަމުގެ ތެރޭގައި ހިމެނޭ މުހިންމު ކަމެއް ކަމަށެވެ.

ބޯހިޔާވަހިކަމުގެ މައްސަލަ އެންމެ ބޮޑަށް ދިމާވެފައިވަނީ ގްރޭޓާ މާލެ ސަރަހައްދަށް ކަމަށާއި، މީ ޒަމާންތަކެއް ވަންދެން ޙައްލު ނުލިބި އޮތް މައްސަލައެއްގެ ގޮތުގައި އެމަނިކުފާނު ފާހަގަކުރެއްވި އެވެ.

މި ސަރުކާރުން އިއުލާނުކުރި ފުށިދިއްގަރުފަޅު މަޝްރޫއަކީ މާލެ ސަރަހައްދަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ގެނެސްދިނުމަށް ފަށާ މަޝްރޫއެއްކަން ފާހަގަކުރައްވާ ރައީސުލްޖުމްހޫރިއްޔާ ވިދާޅުވީ، އެ މަޝްރޫއު ކުރިއަށްދާއިރު، މިހާރު ފަށާފައިވާ ގުޅިފަޅު މަޝްރޫއާއި ގިރާވަރުފަޅު ހިއްކުމުގެ މަޝްރޫއުވެސް ކުރިއަށް ގެންދިއުމަށް ސަރުކާރުން ނިންމާފައިވާ ކަމަށެވެ.

އޭގެ އިތުރުން ސަރުކާރުގެ އަމާޒަކީ ކުރީ ސަރުކާރުން އެ ފަޅުތަކުން ހިއްކުމަށް ނިންމާފައިވާ ސަރަހައްދަށްވުރެ ބޮޑު ސަރަހައްދެއް ހިއްކާ ވީހާވެސް ގިނަ ރައްޔިތުންނަށް އެ ތަންތަނުން ބޯހިޔާވަހިކަން ފޯރުކޮށްދިނުންކަމަށް ރައީސުލްޖުމްހޫރިއްޔާ ޑރ މުހައްމަދު މުއިއްޒު ވިދާޅުވި އެވެ.

"ގްރޭޓާ މާލެ މި ސަރަހައްދަކީ ވެސް ޒަމާންތަކެއް ވަންދެން މާލޭގެ ރައްޔިތުން އެދިއެދިތިބި މި ބޮޑު މައްސަލައަށް (ބޯހިޔާވހިކަމުގެ މައްސަލައަށް) ހައްލު ގެނެސްދެވޭނެ ވަރުގެ ތަރައްގީގެ މަޝްރޫއެއް ހިންގަދޭނެ ވަރުގެ ސަރަހައްދަކަށް ހަދައިދޭނެކަމުގެ ވައުދު އަޅުގަނޑުވިން. އެ ވައުދުގެ ދަށުން ފެށޭ އެންމެ މުހިންމު މަޝްރޫއު (ފުށިދިއްގަރުފަޅު ހިއްކުން) މިއަދު މި ފެށެނީ. މިއާ އެކީގައި ވެސް އަޅުގަނޑުމެންގެ ޕްލޭނުގައި އޮންނާނެ ގުޅީފަޅުގައި މިހާރު ފެށިފައިވާ މަޝްރޫއު ވެސް އެޔެއް ނޫނޭ އަޅުގަނޑުމެންގެ ޕްލޭނުގައި އޮތް މިންވަރަކީ. އަޅުގަނޑުމެން އިރާދަކުރެއްވިއްޔާ ގުޅިފަޅުވެސް މިހާރު އެ ހިއްކަމުންދާ މިންވަރަށްވުރެ މާ ބޮޑުތަކުން ހިއްކަން ނިންމާފައިވާނީ...85 ހެކްޓަރުގެ ބިން އިތުރުވެގެންދާނެ. ހަމައެއާއެކީގައި ގިރާވަރު ފަޅުގައިވެސް މިހާރު އެ ކުރިއަށްދާ މިންވަރަށްވުރެ މާބޮޑުތަނުން އިތުރުކުރެވި އިތުރު 50 ހެކްޓަރު ގިރާވަރުފަޅުން ވެސް އަޅުގަނޑުމެން ހިއްކާނަން"

ރައީސުލްޖުމްހޫރިއްޔާ ޑރ މުއިއްޒު

ރައީސުލްޖުމްހޫރިއްޔާ ޑރ މުއިއްޒު އިތުރަށް ވިދާޅުވީ ރައްޔިތުންނަށް އެކަށީގެންވާ ބޯހިޔާވަހިކަން ފޯރުކޮށްދިނުމަށްޓަކައި ރާއްޖޭގެ އެކި ކަންކޮޅުތަކުގައި ބޯހިޔާވަހިކަމާއި ގުޅުންހުރި މަޝްރޫއުތައް ކުރިއަށް ގެންދިއުމަށް ސަރުކާރުން ނިންމާފައިވާ ކަމަށެވެ.

އެގޮތުން ރާއްޖޭގެ އެކި ކަންކޮޅުތަކުގައި އިންޓަގްރޭޓެޑް ޒޯނުތަކެއް ތައާރަފްކުރެވި 7 ސަރަހައްދެއްގައި އާބަން ސެންޓަރުތަކެއް ގާއިމްކުރުމަށް ނިންމާފައިވާކަމަށް އެމަނިކުފާނު ވިދާޅުވި އެވެ.

މިއިން ކޮންމެ ސެންޓަރެއް ވެސް ވެގެންދާނީ، އެތަނުގައި ދިރިއުޅޭ މީހުންނާއި، އެތަނަށް ހިޖުރަކުރާ މީހުންނަށް އެކަށީގެންވާ ރަނގަޅު ފެންވަރެއްގެ ބޯހިޔާވަހިކަމެއް ލިބެން ހުންނަ ތަންތަނަށްކަމަށް ރައީސުލްޖުމްހޫރިއްޔާ ވިދާޅުވި އެވެ.

ބޯހިޔާވަހިކަމުގެ އިތުރުން ވަޒީފާއާއި، ދިރިއުޅުމަށް ބޭނުންވާ ފެންވަރު ރަނގަޅު ވަސީލަތްތައް ވެސް އެ ތަންތަނުން ލިބެން ހުންނާނެ ކަމަށާއި، މި އުސޫލުގެ ތެރެއިން ތަންތަން ބިނާވެގެން ދިއުމުން ރާއްޖެއަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ޙައްލެއް ލިބިގެންދާނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފަ އެވެ.