ބޯހިޔާވަހިކަމުގެ އެންމެ ބޮޑު މަޝްރޫއު 30 ދުވަސްތެރޭ ފެށުމަކީ އާދައިގެ ކަމެއް ނޫން: ޝިޔާމް

ރައީސުލްޖުމްހޫރިއްޔާ ޑރ މުހައްމަދު މުއިއްޒުގެ ސަރުކާރުން އިއުލާނުކުރި ބޯހިޔާވަހިކަމުގެ އެންމެ ބިޔަ މަޝްރޫއު، ސަރުކާރަށް 30 ދުވަސްތެރޭ ފެށުމަކީ އާދައިގެ ކަމެއް ނޫން ކަމަށް ފިޝަރީސް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

އެމަނިކުފާނު މިފަދައިން ވިދާޅުވެފައިވަނީ ރަސްމާލެ މަޝްރޫއު އިފްތިތާހުކުރުމާއި ގުޅިގެން ރައީސުލްޖުމްހޫރިއްޔާއަށް މަރުހަބާ ދަންނަވާ އެކްސްގައި ކުރެއްވި ޕޯސްޓެއްގަ އެވެ.

ޝިޔާމް ވިދާޅުވީ ފުށިދިއްގަރުފަޅު ހިއްކައިގެން ކުރިއަށް ގެންދިއުމަށް ފަށާފައިވާ "ރަސްމާލެ ސިޓީ" މަޝްރޫއަކީ 65000 އާއިލާއަށް ބޯހިޔާވަހިކަން ކަށަވަރުކޮށްދޭނެ ބިޔަ މަޝްރޫއެއް ކަމަށެވެ.

އެއީ ބޯހިޔާވަހިކަމުގެ މައްސަލައަށް އޮތް ދާއިމީ ޙައްލުކަމަށާއި ސަރުކާރަށް 30 ދުވަސްތެރޭ މިފަދަ މަޝްރޫއެއް ފެށުމަކީ އާދައިގެ ކަމެއް ނޫން ކަމަށް ޝިޔާމް ވިދާޅުވި އެވެ.

"ބޯހިޔާވަހިކަމަށް ދިވެހިރާއްޖޭގައި ހިންގޭ އެންމެ ބިޔަ މަޝްރޫޢު ކަމުގައިވާ 'ރަސްމާލެ މަޝްރޫއު ރައީސުލްޖުމްހޫރިއްޔާ ޑރ. މުއިއްޒުގެ ޒަޢާމަތުގެ ފުރަތަމަ 30 ދުވަސްތެރޭ ފެއްޓެވުމަކީ އާދައިގެ ކަމެއްނޫން. 65000 އާއިލާއަށް ބޯހިޔާވަހިކަން ކަށަވަރުކޮށްދޭ މި ބިޔަ މަޝްރޫއު ގެނެސްދެނީ ބޯހިޔާވަހިކަމަށް ޖުމްލަ ހައްލު"

ފިޝަރީސް މިނިސްޓަރު ޝިޔާމް

ފުށިދިއްގަރު ފަޅުގައި ތަރައްޤީކުރާ ސަހަރަށް "ރަސްމާލެ"ގެ ނަމުން ނަންދެއްވައި، އެ މަޝްރޫއު އިފްތިތާހުކޮށްދެއްވަމުން ރައީސުލްޖުމްހޫރިއްޔާ ޑރ މުއިއްޒު ވިދާޅުވީ އެމަނިކުފާނު ވަޢުދުވެވަޑައިގެންނެވި ގޮތަށް މަސައްކަތް ފަށާތާ 8 މަސްދުވަހުގެ ތެރޭގައި ފުށިދިއްގަރު ފަޅުގައި 1150 ހެކްޓަރުގެ ބިން ހިއްކާނެކަމަށެވެ.

މާލެ ސަރަޙައްދުގެ ތޮއްޖެހުމާއި މާލެއަށް ދިމާވެފައިވާ ބޯހިޔާވަހިކަން ޙައްލުކުރުމަކީ މި ސަރުކާރުގެ އެންމެ މުހިންމު އެއް ވަޢުދެވެ.

މިކަމުގައި ރައީސުލްޖުމްހުރިއްޔާ ގެންގުޅުއްވާ އެންމެ ބޮޑު ތަޞައްވުރަކީ މާލޭ ކައިރީގައި އޮތް ފުށިދިއްގަރު ފަޅު ހިއްކައި އާބާދުކުރުމެވެ.

އެގޮތުން، ހުޅުމާލޭގެ ގާތްގަޑަކަށް ތިން ގުނަ ބޮޑު ސަރަޙައްދެއް ފުށިދިއްގަރު ފަޅުން ހިއްކުމަށް ހަމަޖެހިފައިވާއިރު، މިއީ މިހާތަނަށް ރާއްޖޭގައި ހިންގާ އެންމެ ބޮޑު ބިންހިއްކުމުގެ މަޝްރޫޢެވެ.