އުސްގެކޮޅުގެ ފާރުތަކުގައި ގްރެފިޓީ ކުރަހައި ގެއްލުންދެނީ: ތަން ހަވާލުކުރަން ސިޓީ ކައުންސިލުން ދެކޮޅު ހަދާ: މިނިސްޓްރީ

ދިވެހިރާއްޖޭގެ ރަސްކަމުގެ ބޮޑުގަނޑުވަރުގެ ބިނާތަކުގެ ތެރެއިން މިހާރު ފެންނަން ހުރި ހަމައެކަނި ބައި ކަމަށްވާ "އުސްގެކޮޅު"ގެ ފާރުތަކުގައި ގްރެފިޓީ ކުރަހައި، އެ ތަނަށް ބޮޑެތި ގެއްލުންތަކެއް ދެމުންދާ މައްސަލައެއް ފެންމަތިވެއްޖެއެވެ.

މިނިސްޓްރީ އޮފް އާޓްސް ކަލްޗާ އެންޑް ހެރިޓޭޖް އިން އެކްސްގައި ކުރި ޕޯސްޓެއްގައި ބުނެފައިވާ ގޮތުގައި، 100 އަހަރަށްވުރެ ގިނަ ދުވަސްވެފައިވާ މި ތާރީޚީ ބިނާއަށް ބަޔަކު ގަސްދުގައި ގެއްލުންދެމުންދާކަން މިހާރު ވަނީ އެ މިނިސްޓްރީގެ ސަމާލުކަމަށް އައިސްފައެވެ.

މި މައްސަލަ ސަމާލުކަމަށް އައުމާއެކު، ފުލުހުންނާ ގުޅިގެން މިކަން ހިނގައިދިޔަ ގޮތް ބަލައި، ޒިންމާވާ ފަރާތްތައް ހޯދުމުގެ މަސައްކަތް މިހާރު ވަނީ ފަށާފައެވެ.

މިނިސްޓްރީން ބުނި ގޮތުގައި، މި އަމަލު ހިންގި ފަރާތްތަކާމެދު ދިވެހިރާއްޖޭގެ ސަގާފީ ތަރިކައިގެ ގާނޫނު (2019/12) ގެ ދަށުން ހަރުކަށި ފިޔަވަޅު އަޅާނެއެވެ.

އުސްގެކޮޅަކީ މީލާދީން 20 ވަނަ ގަރުނުގެ ކުރީކޮޅު، އައްސުލްތާން ހާޖީ އިމާދުއްދީން (6 ވަނަ) ގެ ރަސްކަމުގައި (1893-1903) ބިނާކުރެއްވި ވަރަށް ތާރީޚީ ތަނެކެވެ. މީގެ 74 އަހަރު ކުރިން ރާއްޖޭގެ އެންމެ ފުރަތަމަ ގައުމީ ދާރުލްއާސާރު ވެސް ހުޅުވާފައިވަނީ މި އިމާރާތުގައެވެ. މި ބިނާއަކީ އެ ދުވަސްވަރުގެ ކަތީބުކަމާއި ފަރުމާކުރުމުގެ ފެންވަރު ދައްކުވައިދޭ ނުހަނު އަގުހުރި ތަރިކައެކެވެ.

މި މައްސަލައިގައި އިތުރަށް ކަންބޮޑުވުން ފާޅުކުރަމުން މިނިސްޓްރީން ބުނީ، އުސްގެކޮޅާއި އެ ސަރަހައްދު ތަރައްގީކުރުމުގެ މަޝްރޫއެއް ކުރިއަށް ގެންދިއުމަށްޓަކައި، އެ ތަނުގެ ތަޅުދަނޑިއާއި ބެލެހެއްޓުމުގެ ޒިންމާ ވުޒާރާއާ ހަވާލުކޮށްދިނުމަށް މާލޭ ސިޓީ ކައުންސިލްގައި ރަސްމީކޮށް އެދިފައިވާނެ ކަމަށެވެ. ނަމަވެސް، މިހާތަނަށް ކައުންސިލުން އެ ތަން މިނިސްޓްރީއާ ހަވާލުކޮށްފައި ނުވާކަން ފާހަގަކުރިއެވެ.

ތާރީޚީ ބިނާތަކަށް މިފަދަ ގެއްލުންތައް ދިނުމަކީ އިއާދަނުކުރެވޭ ފަދަ ބޮޑެތި ގެއްލުންތަކެއް ސަގާފީ އަގަށް ލިބިދާނެ ކަމެއް ކަމަށްވާތީ، ގާނޫނާއި ގަވާއިދުގެ ތެރެއިން އުސްގެކޮޅު ރައްކާތެރިކޮށް ބެލެހެއްޓުން ވުޒާރާގެ ދަށަށް ބަދަލުކުރުމުގެ މަސައްކަތް ފަށާފައިވާ ކަމަށްވެސް މިނިސްޓްރީން ބުނެއެވެ.