ޖަސިންޑާ ނިއުޒިލެންޑުގެ ބޮޑުވަޒީރު ކަމުން އިސްތިއުފާ ދެއްވަނީ

އަންނަ މަހު މަގާމުން އިސްތިއުފާ ދެއްވާނެ ކަމަށާއި، މިއަހަރުގެ އާންމު އިންތިހާބުގައި ވާދަނުކުރައްވާނެ ކަމަށް ނިއުޒިލެންޑުގެ ބޮޑުވަޒީރު ޖަސިންޑާ އާޑާން ވިދާޅުވެއްޖެއެވެ.

އޭނާގެ ޕާޓީގެ އަހަރީ ކޯކަސްގައި ބުރާސްފަތިދުވަހު ވާހަކަދައްކަވަމުން، ފެންކަޅިވެފައި ހުންނަވައި ޖަސިންޑާ ވިދާޅުވީ، ފެބްރުއަރީ މަހުގެ 7 ވަނަ ދުވަހަކީ އޭނާގެ ބޮޑުވަޒީރުކަމުގެ އެންމެ ފަހު ދުވަސް ކަމަށެވެ.

ޖަސިންޑާ ވިދާޅުވީ އިސްތިއުފާ ދެއްވަނީ މަގާމުގެ ޒިންމާ ފުރިހަމައަށް އަދާކުރެއްވުމުގެ ހަކަތަ މިހާރު އެކަމަނާގެ ނެތްކަމުގައި ގަބޫލުކުރައްވާތީ ކަމަށެވެ.

"އަހަރެން މަގާމު ދޫކޮށްލަނީ މިކަން އުނދަގޫ ވެގެންނެއް ނޫން. އެހެން އެކަން އޮތް ނަމަ އަހަރެން މި ވަޒީފާއާ ހަވާލުވީތާ ދެމަސް ތެރޭ ދޫކޮށްލީސް. އަޅުގަނޑު ދުރުވަނީ މިފަދަ ޝަރަފުވެރި މަޤާމަކީ ޒިންމާތަކާއެކު އަންނަ މަޤާމަކަށްވާތީ. އެ އެ ޒިންމާއަކީ ތިމަންނާއަށް އިސްވެރިއެއްގެ ދައުރު އަދާކުރެވޭނެ ވަގުތާއި އަދާނުކުރެވޭނެ ވަގުތު އެނގުމުގެ ޒިންމާ. މި މަސައްކަތަށް ބޭނުންވަނީ ކިހައި ހަކަތައެއްކަން އަޅުގަނޑަށް އެނގޭ. އަދި އެ ހަކަތަ އަޅުގަނޑު ކިބައިގައި ނެތްކަންވެސް އެނގޭ،"

"އަހަރެންނަކީ އިންސާނެއް، ސިޔާސީންނަކީ އިންސާނުން. އަހަރުމެންނަށް ކުރެވެން ހުރި މަސައްކަތެއް ކުރެވެން އޮތް އެންމެ ދިގު މުއްދަތަކަށް ކުރަނީ. އެއަށްފަހު އަންނާނީ [ހުއްޓައިލަންޖެހޭ] ވަގުތު. މިއީ އަހަރެންނަށް އެ ވަގުތު،" ޖަސިންޑާ ވިދާޅުވިއެވެ.

ޖަސިންޑާ ވިދާޅުވީ އޭނާއަށް އެ މަގާމުގެ މަސްއޫލިއްޔަތުތައް އަދާކުރެވޭނެ ހަކަތަ ހުރިތޯ ވަރަށް ފުންކޮށް ވިސްނެވި ކަމަށާ، އެ ވިސްނެވި ވިސްނުމުން އޭނާއަށް ޔަގީންވެވަޑައިގެންނެވީ އެ ހަކަތަ ނެތް ކަމަށް ކަމަށެވެ.

ޖަސިންޑާ އިސްތިއުފާ ދެއްވި ނަމަވެސް އަހަރުގެ ފަހުކޮޅުގައި އޮންނަ އާންމު އިންތިޚާބާ ޖެހެންދެން ޤާނޫނު ހަދާ މަޖިލީހުގެ މެންބަރެއްގެ ގޮތުގައި އޭނާ ހުންނަވާނެއެވެ.

ޖަސިންޑާއަކީ 2017 ވަނަ އަހަރު ބޮޑުވަޒީރުކަމާ ހަވާލުވެވަޑައިގެންނެވިއިރު ދުނިޔޭގެ އެންމެ ޒުވާން އަންހެން ލީޑަރެވެ. އެއިރު އޭނާގެ އުމުރުފުޅަކީ 37 އަހަރެވެ. ނިއުޒިލެންޑް ކޮރޯނާ ވައިރަސްގެ ބަލިމަޑުކަމާ ފުރަތަމަ ކުރިމަތިލީ ގޮތާއިމެދު ޖަސިންޑާއަށް ވަނީ ދުނިޔޭގެ ތައުރީފު ލިބިވަޑައިގެންފައެވެ. އަދި ނިއުޒިލެންޑުގެ ކްރައިސްޓްޗާޗުގައި ހުންނަ ދެ މިސްކިތެއްގައި ދިން ބޮމުގެ ހަމަލާތަކެއްގައި 51 މީހުން މަރުވި ހާދިސާއަށް ފަހު، އެ ގައުމުގެ މުސްލިމުންނާއި މެދު ޖަސިންޑާ ކަންތައް ކުރެއްވި ގޮތުންވެސް އެކަމަނާއަށް ވަނީ ވަރަށް ބޮޑަށް ތައުރީފު ލިބިވަޑައިގެންފައެވެ.