ކެނަބިސް ބޭނުން ކުރުން ހިމެނޭހެން ސާހިލްގެ މައްޗަށް 5 ދައުވާއެއް!

06 އޮގަސްޓު 2022 ދުވަހުގެ ރޭ، ހ. ޝީރީންވިލާގޭގައި, ތޫނުއެއްޗަކުން ޙަމަލާދީ އަނިޔާވެރި ގޮތަކަށް މަރާލާފައި އޮއްވާ ފެނުނު، ޝިއާއު މުހައްމަދު ސައީދު، މަރާލި މައްސަލައިގައި ފ. ނިލަންދޫ, ފިނިފެންމާގެ, ޢަލީ ސާހިލްގެ މައްޗަށް ޖުމުލަ 5 ދައުވާއެއް އުފުލައިފި އެވެ.

ޕީޖީ އޮފީހުން ބުނީ، ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު ގެ 5 ވަނަ މާއްދާގެ ދަށުން ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ އާއި އިތުރު 4 ދަޢުވާއާއެކު, އެކު ޖުމްލަ 5 ދަޢުވާއެއް ސާހިލްގެ މައްޗަށް ކުރުމަށް 28 ޑިސެންބަރު 2022 ދުވަހު ކްރިމިނަލް ކޯޓަށް ހުށަހަޅައިފައިވާ ކަމަށެވެ.

އެގޮތުން، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާގެ އިތުރުން ސާހިލްގެ މައްޗަށް ދެން ކޮށްފައިވަނީ އޮރިޔާން ކާޑު ގެންގުޅުމުގެ ދައުވާ އާއި، ކެނެބިސް ބޭނުންކުރުމުގެ ދައުވާ ކަމަށް ޕީޖީ އޮފީހުން ބުނެފައިވެއެވެ.

އަދި މީގެ އިތުރަށް ހުރި ދަޢުވާތަކުގެ ތަފްޞީލު މިވަގުތަށް ހާމަކުރެވޭކަށް ނެތް ކަމަށްވެސް އެ އޮފީހުން ބުނެއެވެ. އެ ދައުވާ ތަކުގެ ތަފްސީލު ހާމަ ނުކުރަނީ ޝިއާއުގެ އިންސާނީ ކަރާމާތަށް އުނިކަން އަތުވެދާނެތީ އާއި އާއިލާއަށް އިތުރު ހިތާމައެއް ކުރިމަތިވިޔަ ނުދިނުމަށް ކަމަށްވެސް ބުނެފައިވެއެވެ.

ޝިއާއު މަރާލައި ހަށިގަނޑަށް ބޮޑެތި ގެއްލުންތަކެއް ދީފައި އޮއްވައި ފެނުނު މައްސަލައިގައި ޝާހިލް ހައްޔަރުކުރީ ކުށުގެ ވެށިންނެވެ.

އެ މައްސަލައިގައި ޝަރީއަތް ނިމެންދެން އޭނާ ބަންދުކޮށްފައިވާއިރު އިތުރު މީހަކަށް ތުހުމަތެއް ނުކުރެއެވެ.