ޖަލުގައި ބަނޑުހައިހޫނު ކަމުގެ ހަޅުތާލު ހުއްޓާނުލާ ކުރިއަށްދާތާ ފަސް ދުވަސް

މާފުށީ ޖަލުގައި ހަރުކަށި ޔުނިޓްގައި ތިބި ގައިދީން ކުރިއަށް ގެންދާ ބަނޑިހައިކަމުގެ ހަޅުތާލަށް ފަސް ދުވަސް ވެއްޖެއެވެ.

މި ހަޅުތާލު ފަށައިފައިވަނީ މާފުށީ ޖަލުގެ ހަރުކަށި ޔުނިޓުގައި ތިބި ގައިދީންނަށް ދެ ގަޑިއެއްގެ ކެއުން ނުދިން މައްސަލައިގައެވެ. ގައިދީން ހަޅުތާލު ފަށައިފައިވަނީ މިދިޔަ ބުދަ ދުވަހުއެވެ. މި ހަޅުތާލުގައި ބައިވެރިވެ ހަޅުތާލު ކުރަމުންދަނީ ހަރުކަށި ޔުނިޓްގައިތިބި 17 ގައިދީން ތެރެއިން 15 ގައިދީއެކެވެ.

ގައިދީން މި ހަޅުތާލު ފަށައިފައިވަނީ ހަރުކަށި ޔުނިޓުގެ ގޮޅިތަކަށް އެއް ރެއެއްގެ ކެއުމާއި ޖެހިގެން އައި ދުވަހުގެ ހެނދުނުގެ ސައި ނުދިނުމާއި، ޖަލު އޮފިސަރުން ގޮޅި ބަލައި ފާސްކުރަން ވަދެ، އެ މީހުންގެ އަންނައުނާއި ރީތިވާ ސާމާނު އަތުލާތީއާއި، މިގޮތަށް އަތުލުމަށް ފަހު އެ ތަކެތި އަނބުރާ ދިނުމަށް ހަފްތާއެއްހާ ދުވަސް ނަގާތީއާއި، ގޮޅިއާ މެދު ގައިދީން ފާހަގަކުރާ ބޮޑެތި މައްސަލަތައް ހައްލުނުކޮށް ދިގުލައިގެންދާތީ ކަމަށް ބުނެފައިވެއެވެ.

އެގޮތުން ޖަލު ގޮޅީގައި ދިމާވާ މައިގަނޑު މައްސަލަ އެއްކަމަށް ބުނެފައިވަނީ ފަންކާތަކުގެ އަޑުގަދަވާ މައްސަލައެވެ. އަދި ފަންކާތައް ބަދަލުކޮށްދޭން އެދި، ނުކޮށްދިނުމުން އެ މައްސަލަ މީގެ ކުރިން އެޗުއާރުސީއެމަށް ވެސް ހުށަހަޅާފައިވާ ކަމަށް ވެސް ބުނެފައިވެއެވެ.

ހަޅުތާލު ކުރަމުން އަންނަތާ މިއަދަށް ފަސް ދުވަސް ވެފައި ވާއިރު، ގައިދީން ބޭނުންވަނީ، އެ މީހުންގެ ޝަކުވާތައް ސީދާ ކޮމިޝަނާ އޮފް ޕްރިޒަންސް އަހްމަދު މުހައްމަދުފުޅަށް ހިއްސާކުރުމަށެވެ. ގައިދީން ބުނެފައިވަނީ ޖަލު އޮފިސަރުންނަށް އިތުބާރު ނުކުރެވޭ ކަމަށެވެ.

ނަމަވެސް، އެކަން ކުރެވޭނީ ބަނޑުހައިހޫނުކަމުގެ ހަޅުތާލު ހުއްޓާލައި ކާން ފެށުމުން ކަމަށް، މާފުށީ ޖަލު ބެލެހެއްޓުމުގައި އިސްކޮށް އުޅޭ ކަރެކްޝަންސްގެ ބޭފުޅަކު ގައިދީންނަށް އަންގާފައިވާ ކަމަށް މައުލޫމާތު ލިބިފައިވެއެވެ.