ދައުރު ނިމޭއިރުވެސް މިސަރުކާރުން ގޯއްޗެއް ނުދޭނެ؛ ދޭނީ ހަމައެކަނި ސްލިޕްކޮޅެއް: މުހައްމަދު ރަޝީދު

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިސަރުކާރުން މާލޭ ރައްޔިތުންނަށް ދޭނެ ކަމަށް ބުނި ގޯތިތައް، އެމަނިކުފާނުގެ ސަރުކާރުގެ މި ދައުރު ނިމޭއިރުވެސް ނުދެއްވާނެ ކަމަށް ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ މެމްބަރު މުހައްމަދު ރަޝީދު (ބޯދިގު) ވިދާޅުވެއްޖެއެވެ.

"ދަ ޑިމޮކްރެޓްސް" ގެ މިރޭގެ ޖަގަހަ ޖަލްސާގައި ވާހަކަ ދައްކަވަމުން ބޯދިގު ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު މާލޭގެ ރައްޔިތުންނަށް ވީ ވައުދުން ޒައްރެއްގެ މިންވަރުވެސް، އެ ރައްޔިތުންނަށް ލިބިފައި ނުވާ ކަމަށެވެ. އެގޮތުން މާލޭގެ ރައްޔިތުންނަށް ދޭނެ ކަމަށް މިސަރުކާރު ފެށުނީއްސުރެ ވެސް ބުނަމުން އައި ގޯތި، އަދިވެސް ނުދެވޭ ކަން ފާހަގަކުރައްވައި އޭނާ ވިދާޅުވީ ދެން ގޯއްޗެއް، ނުވެސް ދެވޭނެ ކަމަށެވެ.

އަޅުގަނޑު ހަމަ މާލޭ ރައްޔިތުންނަށް އަންގާލަން ބޭނުން، ދޭން ބުނި ގޯތި.... 80 ދުވަސް ބާކީ. 80 ދުވަސް ތެރޭގައި ދޭން ބުނި ގޯއްޗެއް ނުދެވޭނެ. ދޭނީ ހަމަ އެކަނި އެންމެ އެއްޗެއް. އެއީ ސްލިޕެއް. އަޅުގަނޑު ހަމަ ސަރުކާރަށް އެދެން، އެ ސްލިޕް އާއި އެކީގައި ދެއްވާށޭ ޑައިވް ގިޔަރ އެއް... އޭރުން އެ ޑައިވް ކޮށްގެން އެރިގެން، އެމީހެއްގެ ލޮކޭޝަން ހޯދައިގެން އެމީހެއްގެ ގެއަށް، ޑައިވް ކޮށްގެން އެރި ތިބެވޭނެއޭ.

މައްޗަންގޮޅި އުތުރު ދާއިރާގެ މެމްބަރު މުހައްމަދު ރަޝީދު (ބޯދިގު)

އެފަދައިން ބޯދިގު އެ ވިދާޅުވާ ސަބަބެއް ކަމުގައި އޭނާ ވިދާޅުވީ، މާލޭ ރައްޔިތުންނަށް ގޯތި ދިނުމަށް ހިއްކާތަން އަދިވެސް ނުފެންނާތީ ކަމަށެވެ.

މީގެ އިތުރުން، މާލޭގެ ރައްޔިތުންނަށް ގޯތި ދިނުމަށް ކަމަށް ބުނެ، ޕޯޓް ސަރަހައްދު ހިއްކުމަށް ސަރުކާރުން މަސައްކަތް ކުރަމުން ގެންދާ ކަމަށާ، އެއީ "ސިކުޑީގައި އުނިކަން" ހުންނަ މީހުން ނިންމާ ފަދަ ނިންމުމެއް ކަމަށްވެސް ބޯދިގު ވިދާޅުވިއެވެ. އެހެނީ އެފަދައިން ކަން ކުރުމުން ކުރިއަށް އޮތް ތަނުގައި މާލޭގެ ރައްޔިތުން ޖެހޭނީ ބަނދަރެއް ދިނުމަށް އެދި ސަރުކާރުގައި އާދޭސް ކުރަން ކަމަށް އޭނާ ވިދާޅުވި އެވެ.

މިއާއެކު އޭނާ ވިދާޅުވީ، މާލޭގެ ރައްޔިތުން ސަރުކާރަށް ދޭނީ ކުޑަ ވަގުތު ކޮޅެއް ކަމަށާ، އެއަށްފަހު އެ ރައްޔިތުން މަގުތަކަށް ނުކުމެ މަގުތައް ފުރާލާނެ ކަަމަށެވެ.

ބޯދިގުގެ ވާހަކައިގައި އޭނާ ތަކުރާރުކޮށް ވަނީ، ވާދަވެރިންނާއި، އަދި "ޖެހުނު ބަޔަކާއި ޖެހިގެން" ނަމަވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަން ނިމުމަކަށް ގެނައުމަށް ދަ ޑިމޮކްރެޓްސް އިން މަސައްކަތް ކުރާނެ ކަމަށް ވިދާޅުވެފައެވެ.