ފަސޭހަކަމާއި އެކު ވެލެންސިއާ ބަލިކޮށް ސުޕަރ ޔުނައިޓެޑް ސްޕޯޓްސް ކުލަބު ތިންވަނައަށް!

އެމްޑަބްލިއުއެސްސީ ދިވެހި ޕްރެމިއާ ލީގުގެ މިރޭ ކުލަބު ވެލެންސިއާ އާއި ސްޕަރ ޔުނައިޓެޑް ސްޕޯޓްސް ވާދަކުރި މެޗު ފަސޭހަކަމާއި އެކު 5-0 ގެ ނަތީޖާއަކުން ސްޕަރ ޔުނައިޓެޑް ސްޕޯޓްސް އިން ކާމިޔާބުކޮށްފި އެވެ.

މިރޭގެ މެޗުގެ ފުރަތަަމަ ހާފުގައި ސްޕަރ ޔުނައިޓެޑް ސްޕޯޓްސް އިން ހަތަރު ލަނޑުގެ ލީޑެއް ނެގިއިރު، އެޓީމުގެ ފުރަތަަމަ ލަނޑު މެޗު ފެށިގެން ފަސްވަނަ މިނެޓްގައި ކާމިޔާބުކޮށްދިނީ އަލީ ނަސޫހް އެވެ. އެޓީމުގެ ދެވަނަ ލަނޑު ފުރަތަމަ ހާފުގެ 30 ވަނަ މިނެޓުގައި އަހުމަދު ހުޝާމް ކާމިޔާބުކޮށްދިން އިރު، އޭގެ ފަސް މިނެޓު ފަހުން އެޓީމުގެ ތިންވަނަ ލަނޑު ވެސް ކާމިޔާބުކޮށްދިން ހުޝާމް އެވެ.

މި މެޗުގައި ސްޕަރ ޔުނައިޓެޑް ސްޕޯޓްސް އިން ކާމިޔާބުކުރި ހަތަރުވަނަ ލަނޑު ފުރަތަަމަ ހާފުގެ އެންމެ ފަހު މިނެޓްގައި ކާމިޔާބުކޮށްދިނީ މި މެޗުގައި މޮޅު ކުޅުމެއް ދެއްކި އަލީ ނަސޫހް އެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 4-0 ގެ ނަތީޖާއަކުން ސްޕަރ ޔުނައިޓެޑް ސްޕޯޓްސް ކުރީގައި އޮވެގެންނެވެ.

މެޗުގެ ދެވަނަ ހާފުގައި ވެލެންސިއާ އިން އެޓީމުގެ ކުޅުން ރަގަޅުކުރިއިރު މިހާފުގައި ފެނިގެންދިޔަ ހަމައެކަނި ލަނޑު ދެވަނަ ހާފުގެ 62 ވަނަ މިނެޓުގައި ކާމިޔާބުކޮށްދިނީ އިބްރާހިމް އަތީގް އެވެ. މިލަނޑާއެކު މެޗުގެ ކުޅުން ނިމިގެންދިޔައީ 5-0 ގެ ނަތީޖާއަކުން ސްޕަރ ޔުނައިޓެޑް ސްޕޯޓްސް ކުރީގައި އޮވެގެންނެވެ.

މި މެޗުން ލިބުނު ތިން ޕޮއިންޓާއެކު ފަސް މެޗުން ނުވަ ޕޮއިންޓް ހަމަކޮށް ސްޕަރ ޔުނައިޓެޑް ސްޕޯޓްސް އިން ވަނީ ލީގު ތާވަލުގެ ތިންވަނައަށް ކުރިއަށް ޖެހިލައިފިއެވެ. އަދި މި މެޗުން ބަލިވި ކުލަބް ވެލެންސިއާ ކުޅުނު ފަސް މެޗުން ވެސް ބަލިވެފައިވާއިރު، އެޓީމު އޮތީ އަށް ޓީމު ހިމެނޭ ލީގު ތާވަލުގެ ފުލުގައެވެ.