މި ޤައުމުގައި ތިބެން ނުޖެހޭ މީހުން މި ޤައުމުގައި އެބަ ތިބި: އަލީ ވަހީދު

މި ޤައުމުގައި ތިބެން ނުޖެހޭ މީހުން އެކި ސިފަސިފައިގައި ގިނަ އަދަދަކަށް މި ޤައުމުގައި އެބަ ތިބިކަމުގައި ވިދާޅުވެ އިންޑިޔާ ސިފައިން މި ރާއްޖޭގައި ތިބުމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމްގެ އިންތިހާބީ މަންދޫބު އަލީ ވަހީދު ނުސީދާގޮތެއްގައި ފާޑުވިދާޅުވެއްޖެއެވެ.

އަލި ވަހީދު މި މޭރުމުން ވާހަކަ ދައްކަވައި ފާޑުވިދާޅުވީ، ރިޔާސީ އިންތިހާބުގެ ކެމްޕެއިންގައި ޖުމްހޫރީ ޕާޓީގެ ކެންޑިޑޭޓާއި ކެމްޕެއިން ޓީމުން ށ ކަނޑިތީމަށް ވަޑައިގެން އެ ރަށުގެ ސަޕޯޓަރުންނާއި ބައްދަލުކުރައްވައި ދެއްކެވި ވާހަކަފުޅުގެ ތެރެއިންނެވެ.

އަލީވަހީދު އިތުރަށް ވިދާޅުވީ އިތުރު ތިލަފަޅުގެ ވާހަކަ ދައްކާއިރު އުތުރު ތިލަފަޅަށް މި ރާއްޖެގެ ސިފައިންނަށް ނުވަތަ ރާއްޖެގެ ޑިފެންސް މިނިސްޓަރަށް ހުއްދަ ނުދެވޭ ހިސާބަށް އުތުރު ތިލަފަޅުގެ ކަންކަން ދިޔުމުން އެކަމާމެދު ކަންބޮޑުވާން ޖެހޭ ކަމުގައެވެ.

ރަށެއްގައި ޖަހާ ބޮޑުހިލައަކުން ބޮޑުހިލަ ބަނދަރަކުން ، ނުވަތަ އަޅާ ނަރުދަމާއަކުން ދެން މި ރަށްރާށުގައި ވަށައިގެން މުސްތަގުބަލުގައި ވާނެގޮތަކަށް ނުވިސްނައިފިނަމަ ދެން މާދަމާ ވާނެގޮތަށް އަޅުގަނޑުމެން ކަރުނަ އަޅަންޖެހިދާނެ

އަލީ ވަހީދު ނުސީދާގޮތެއްގައި ވިދާޅުވިއެވެ.

މިއާ ވިދިގެން އަލީ ވަހީދު ވިދާޅުވީ، އޮނަރަބަލް ގާސިމް އިބްރާހިމްގެ ވެރިކަމެއްގައި އުތުރު ތިލަފަޅުގެ އެއްބަސްވުން އެ ބޭފުޅުން ހާމަކުރާނެ ކަމަށާއި ރާއްޖޭގެ މިނިވަންކަމާއި އިސްތިގުލާލާއި ސިޔާދަތަށް ހުރަސްއެޅޭ އެއްޗެއް އޭގައި އޮތްނަމަ ވަގުތުން ވަގުތަށް އެ ރޫޅާލާނެ ކަމުގެ ޔަގީންކަަންވެސް އަރުވާކަމުގައެވެ.

އަލީވަހީދު އިތުރަށް ވިދާޅުވީ ޖުމްހޫރީ ޕާޓީން އަންނަނީ ޕާޓީތައް ރޫޅާލަން ނުން ކަމަށާއި، އަދި ތަރައްޤީ ރޫޅާލަންވެސް ނޫން ކަމަށާއި އެ ޕާޓީިން މި އަންނަނީ ދިވެހިރާއްޖެ އަޅުވެތިކަން ކުރަން އުޅޭ މީހުން ރޫޅާލަންކަމުގައި ވިދާޅުވެފައެވެ.

ކައިރީގައި މި އޮތް ހަނިމާދޫއަށް ބަލައިލި ކަމުގައި ވިޔަސް އެކި ނަންނަމުގައި، ކޮންސްޓްރަކްޝަން މީހުންގެ ނަމުގައްޔާއި، ރިސަރޗް ކުރާ މީހުންގެ ނަމުގައްޔާއި، ސެޓަލައިޓް އެއްޗިހި ބަލާމީހުންގެ ކަމުގައްޔާއި، ރާޑަރު ހަރުކުރާ މީހުންގެ ނަމުގައްޔާއި ހެލިކޮޕްޓަރު އެއްޗިހި ދުއްވާ މީހުންގެ ނަމުގައި ، އެކި ނަންނަމުގައި މި ރާއްޖެއަށް ބޭރުގެ ސިފައިން މިދަނީ ވައްދަމުން

އަލީ ވަހީދު ގެ ވާހަކަފުޅުގައި ފާހަގަކުރެއްވިއެވެ.

މިއާ ވިދިގެން އަލީ ވަހީދު ވިދާޅުވީ، ހެލިކޮޕްޓަރެއް ދުއްވަން ރާއްޖޭގެ ޕައިލެޓުންނަށް ނޭނގޭ ކަމުގައި ރާއްޖޭގެ ވަޒީރުން ނުވަތަ ވެރިން ވިދާޅުވާނަމަ އެއީ ވިސްނުމުގެ ކޮށިކަމެއް ނުވަތަ އެއީ އެހެން އެޖެންޑާއެއްކަމުގައި ވިދާޅުވެފައެވެ.

ކުޑަތަންވަމުން އަންނަ ރިޔާސީ އިންތިހާބުގެ ކެމްޕެއިންގައި ޖުމްހޫރީ ޕާޓީގެ ކެންޑިޑޭޓާއި ކެމްޕެއިން ޓީމުން އަތޮޅު ތެރޭގެ ރަށްތަކަށް ވަޑައިގެން ކެމްޕެއިންގެ ހަރަކާތްތައް ބާރު ދުވެލީގައި ކުރިއަށް ގެންދާއިރު، އެ ޕާޓީން އަންނަނީ ޕާޓީގެ މެނިފެސްޓޯ އިއުލާންކޮށް ރައްޔިތުންނަން ގިނަ ވައުދުތަކެއް ވަމުންނެވެ.