ބިރެއް ނުދެއްކޭނެ، ނަޝީދަށް ޕްރައިމަރީ ކާމިޔާބުކޮށްދޭން މިތިބީ ސާބިތުކަމާއެކު: ފިރުޝާން

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޕްރައިމަރީ މަޖިލީހުގެ ރައީސް މުހައްމަދު ނަޝީދަށް ކާމިޔާބުކޮށްދިނުމަށް ސާބިތުކަމާއެކު ނަޝީދުގެ ޓީމު އޮތް ކަމަށާއި، އެ ޓީމަށް ބިރުދައްކަން ނޫޅުމަށް ރައްޔިތުންގެ މަޖިލީހުގެ މަދަވެލި ދާއިރާގެ މެމްބަރު ޙުސައިން ފިރުޝާން ވިދާޅުވެއްޖެއެވެ.

އެމްޑީޕީގެ ޕްރައިމަރީގައި ނަޝީދު ވާދަކުރައްވާނެކަން މިހާރު ވަނީ ރަސްމީކޮށް އިއުލާނު ކުރައްވާފައެވެ.

އެއާއެކު އެމްޑީޕީގެ ދެ ރައީސުންނަށް ތާއީދުކުރައްވާ މެމްބަރުންގެ މެދުގައި އޮތް ނުތަނަވަސްކަން ބޮޑުވެ ބަހުގެ ހަމަލާތަކެއް ވަނީ ބަދަލުކުރެވެން ފަށައިފައެވެ.

މި ދަނޑިވަޅުގައި، ފިރުޝާން ކުރެއްވި ޓްވީޓެއްގައި ވިދާޅުވީ، އެމްޑީޕީގެ ރިޔާސީ ޕްރައިމަރީ ނަޝީދަށް ކާމިޔާބު ކޮށްދިނުމަށް ކުރާ މަސައްކަތް ހުއްޓުވުމަށް ބިރުދައްކާ މަޖުބޫރުކުރަން ނޫޅުއްވުން ބުއްދިވެރިވާނެކަމަށެވެ.

އެފަދަ ކަންކަން ކުރި ނަމަވެސް ނަޝީދުގެ ޓީމު ފަހަތަށް ޖެހިވަޑައި ނުގަންނަވާނެކަމަށާއި، ތިއްބެވީ ސާބިތުކަމާއި އެކުގައި ކަމަށް ފިރުޝާން ވިދާޅުވިއެވެ. އަދި ވިދާޅުވީ އެބޭފުޅުން އެ ސާބިތުކަން ހޯއްދަވަނީ އެއްބޭފުޅަކު އަނެއް ބޭފުޅެއްގެ ކިބައިން ހިތްވަރު ހޯދައިގެން ކަމަށެވެ.

އެމްޑީޕީގެ ޕްރައިމަރީގައި އެ ޕާޓީގެ ދެ ރައީސުން ވާދަކުރައްވާނެކަން އިއުލާނު ކުރައްވާފައި ވާއިރު، ދެ ރައީސުންގެ ވާދަވެރިކަންވެސް މި ވަނީ ވަރަށް ބޮޑުވެފައެވެ.

ނަޝީދަށް ތާއީދު ކުރައްވާ މެމްބަރުން ވިދާޅުވަމުން ދަނީ ރައީސް ސޯލިހު ވެރިކަން ކުރައްވަމުން ދަނީ އެމްޑީޕީގެ އަސާސްތަކާއި އެއްގޮތަށް ނޫން ކަމަށާއި، ދެވަނަ ދައުރެއް އެމަނިކުފާނަށް ދެއްވާން ޖެހޭ އެއްވެސް ސަބަބެއް ނެތް ކަމަށެވެ.