އެކްސިޑެންޓްގެ ވީޑިއޯ ދައުރުވަމުންދާތީ ޢާއިލާއިން ވަނީ ކަންބޮޑުވުން ފާޅުކޮށްފައި: ފުލުހުން

މިމަހު 16 ވަނަ ދުވަހު ސިނަމާލޭ ބްރިޖު ޓްރެފިކް ލައިޓް ކައިރީ ކާރަކާއި ސައިކަލެއް ޖެހި ހިނގި ނުރައްކާތެރި އެކްސިޑެންޓްގެ ވީޑިއޯ ދައުރުވަމުންދާތީ ޢާއިލާއިން ކަންބޮޑުވުން ފާޅުކޮށްފައިވާ ކަމަށް ފުލުހުން ބުނެފިއެވެ.

ހުކުރު ދުވަހު ހިނގި އެކްސިޑެންޓްގައި ސައިކަލުގައި އިން ޖަމްބޯ ފޯވާޑިންގެ މެނޭޖިން ޑިރެކްޓަރު އިސްމާއިލު މޫސާ ވަނީ އާ ޓްރީ ޓޮޕް ހޮސްޕިޓަލް އަށް ގެންގޮސް ފަރުވާ ދެމުންދަނިކޮށް ނިޔާވެފައެވެ.

މި އެކްސިޑެންޓް އާއި ގުޅޭ ސީސީޓީވީގެ ވީޑިއޯ ފޫޓޭޖް މިހާރު މީސްމީޑިއާގައި ލީކުވެފައިވާއިރު ސީސީޓީވީ ފުޓޭޖްއިން ފެންނަ ގޮތުގައި ޖަމްބޯއިން ސައިކަލް ރަތް ޓްރެފިކް ސިގްނަލަށް މަޑުކުރުމެއް ނެތި ދިޔައީ ދުއްވާފައެވެ. އަދި ހަލިމަގުން އެއާޕޯޓަށް ދާން އޮންނަ މަގަށް ޅަނބާލަށް އުޅުނު ވޭނެއްގައި ސައިކަލު ޖެހި އެކްސިޑެންޓްވާތަން ފެނެއެވެ.

އެކަމާ ގުޅިގެން ފުލުހުން ބުނީ މީހަކު މަރުވާން މެދުވެރިވި އެކްސިޑެންޓްގެ މަންޒަރު ސޯޝަލް މީޑިއާގެ އެކި ވަސީލަތްތަކުގައި ދައުރު ކުރުމަކީ މަރުހޫމުގެ އާއިލާއަށް ނުހަނު ހިތްދަތިކަން ގެނުވާނެ ކަމެއް ކަމުގައި ދެކޭ ކަމަށާއި އެ ވީޑިއޯ ދައުރު ވަމުންދާތީ އެކަމުގެ ކަންބޮޑުވުން އާއިލާއިން ފުލުހުންނާ ހިއްސާކޮށްފައިވާ ކަމަށެވެ.

އެހެންކަމުން އެ ވީޑިއޯ ސޯޝަލް މީޑިއާގެ އެކި ވަސީލަތްތަކުގައި ދައުރު ނުކުރުމަށް ފުލުހުން ވަނީ އެދިފައެވެ.

ފުލުހުން އިތުރަށް ބުނީ، ސީސީޓީވީ ކެމެރާ ފޫޓޭޖް އެކްސެސް ފުލުހުންގެ އޮޕަރޭޝަނަލް އަދި އިންވެސްޓިގޭޝަންގެ ވަރަށް ގިނަ މުވައްޒަފުންނަށް އޮންނަ ކަމަށެވެ. އަދި އެ ވީޑިއޯ އާންމުވެފައިވާ މައްސަލަ ފުލުހުން ބަލަމުންދާ ކަމަށާ އެއީ ކިހިނެތް އާންމުވެފައިވާ ވީޑިއޯއެއްތޯ ބަލައި ފިޔަވަޅު އަޅާނެ ކަމަށްވެސް ބުނެފައިވެއެވެ.