ޒާތީ މައުލޫމާތުތަކެއް ފޮނުވަން ބެންކަށް އެނގި ކަމަށް ބުނެ އިހްސާންގެ ނަމުގައި ފަތުރަނީ ފޭކު ސިޓީއެއް
ލިޔުންތެރިޔާ
އަހުމަދު ހަމީދު އާދަމް
ރައްޔިތުންތަކެއްގެ ޒާތީ މައުލޫމާތުތަކެއް ފޮނުވަން އަންގާ ހޯމް މިނިސްޓަރު އަލީ އިހްސާން، ގައުމީ ބެންކު، ބެންކު އޮފް މޯލްޑިވްސްގެ ސީއީއޯ މުހައްމަދު ޝަރީފަށް ފޮނުވި ކަމަށް ބުނެ ދައުރުކުރަމުންދަނީ ފޭކު ސިޓީއެއް ކަމަަށް މިނިސްޓަރު އިހްސާން ވިދާޅުވެއްޖެ އެވެ.
ފޭކު އެ ސިޓީ ހިމަނާ މިނިސްޓަރު ވަނީ އެކްސްގައި ޕޯސްޓެއް ކުރައްވާފަ އެވެ. ވިދާޅުވީ މިނިސްޓްރީގެ ރަސްމީ ސިޓީއެއްކަމަށް ދެއްކުމަށް ހަދާފައިވާ މި ފޭކް ސިޓީ މީސްމީޑިއާގައި ދަނީ ދައުރު ކުރަމުން ކަމަށެވެ.
މިނިސްޓަރު އިހްސާން ވިދާޅުވީ ހޯމް މިނިސްޓްރީ އަކީ ތަހުގީގު ހިންގާ އިދާރާއެއްކަމަށް ނުވާތީ މިފަދަ އެއްވެސް ލިޔެކިއުމެއް ބޭންކަށްވެސް އަދި އެފަދަ އެހެން އިދާރާއަކަށްވެސް ފޮނުވާފައި ނުވާނެ ކަމަށެވެ. ދައުލަތުގެ އިދާރާތަކުގެ ނަމުގައި މިފަދަ ކަންކަން ނުހިންގުމަށް އެއްމެހާ ފަރާތްތަކަށް މިނިސްޓަރު އިހްސާން ވަނީ އިލްތިމާސްކުރައްވާފަ އެވެ.
ދައުރުވާ ސިޓީގައި ވަނީ ބައެއް މަސައްކަތްތެރީން ރަސްމީ އަގަށް ވުރެ ބޮޑުކޮށް ޑޮލަރު މާރުކޮށް ކަޅު ބާޒާރުގައި ވިއްކާކަން ފާހަގަ ކުރެވިފައިވާ ކަމަށެވެ. އެހެން ކަމުން އެކައުންޓަށް 500 ޑޮލަރަށް ވުރެ އިތުރަށް ފައިސާ ފޮނުވާފައިވާ ފަރާތްތަކުގެ އެކައުންޓްތަކުގެ ފާއިތުވެދިޔަ ހަ މަސް ދުވަހުގެ ސްޓޭޓްމަންޓްތައް ހިއްސާކޮށް ދިނުމަށް ވަނީ އެދިފަ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
