މިސްރާބު ހިފާފައި މިވަނީ ވަގުން ހިފާ މަޖިލީހެއް ހޯދުމަށް: ރައީސް ނަޝީދު
ލިޔުންތެރިޔާ
ޝަފްރާޒް އަހްމަދު
އަންނަ އަހަރު ބޭއްވުމަށް ހަމަޖެހިފައިވާ މަޖިލިސް އިންތިހާބުގައި މިސްރާބު ހިފާފައިވަނީ ވަގުން ހިފާ މަޖިލީހެއް ހޯދުމަށްކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދު މިހެން ވިދާޅުވީ މައްޗަންގޮޅި މެދު ދާއިރާގެ އެމްޑީޕީ ޕްރައިމަރީގައި ވާދަކުރެއްވުމަށް އެމަނިކުފާނުގެ ކެމްޕެއިން އޮފީސް ހުޅުވުމަށް އިއްޔެ ހަވީރު ބޭއްވި ރަސްމިއްޔާތެއްގައި ވާހަކަފުޅު ދައްކަވަމުންނެވެ.
އެމަނިކުފާނު ވިދާޅުވީ ކުރިން އިންތިޚާބުކުރެވުނު މަޖިލިސް ތަކުގައި ކުރެވިފައިވާ މަސައްކަތްތައްވެސް މަދެއްނޫންކަމަށެވެ. ނަމަވެސް މިފަހަރު މިސްރާބު ހިފާފަ މިވަނީ އެއަށްވުރެ މާ ފުރިހަމަ މަޖިލީހަކަށްކަމަށާއި އަޅުގަނޑުމެން މިސްރާބު ހިފާފައިމިވަނީ ވަގުން ހިފާ މަޖިލީހެއް ހޯދުމަށްކަމަށް އެމަނިކުފާނު ވަނީ ފާހަގަކުރައްވާފައެވެ.
ނަޝީދުގެ ވާހަކަފުޅުގައި އެމަނިކުފާނު ވަނީ މާލޭގެ ރަށްވެހިންނަށް ކުރިމަތިވެފައިވާ ބޯހިޔާވަހިކަމުގެ ދަތިކަމާއި ބެހޭގޮތުންވެސް އަލިއަޅުއްވާލައްވައި ވާހަކަފުޅު ދައްކަވާފައެވެ. "މާލޭގެ ރައްޔިތުންނަށް ވަކިން ހާއްސަކޮށް، ބޯހިޔާވަހިކަމުގެ ދަތިކަން އޮތް މިންވަރު އެއްވެސް ދިވެހި ސިޔާސީ ވެރިއަކަށްވެސް، އަދި އާދައިގެ އާންމު ރައްޔިތަކަށްވެސް އަދި އެހެން މުއައްސަސާއެއްގައި މަސައްކަތް ކުރި ނަމަވެސް އޮޅިފަކާއެއް ނުވާނެ. މާލޭގެ ގޯތިތައް ބަހަމުން ބަހަމުން، މިއަދު މިވަނީ ނުބެހޭ މިންވަރަށް ފޮތިތައް ކުދިވެފަ"، ރައީސް ނަޝީދު ވިދާޅުވިއެެވެ.
އެމަނިކުފާނު އިތުރަށްވަނީ އެމްޑީޕީއަށް އަންނަ މަޖިލީހުގެ އަހުލަބިއްޔަތު ނުލިބިއްޖެނަމަ ރިޔާސީ ވައުދުތައް ފުއްދުމަށް ދަތިވާނެކަމަށާއި އެކަމާއި ޝައްކުކުރާނެ މީހަކު ނުހުންނާނެކަމަށްވެސް ވިދާޅުވެފައެވެ.
އިއްޔެ ހަވީރު އޮތް ރަސްމިއްޔާތެއްގައި ސަލަވާތް ފާތިހާއާއި އެކު ކުރީގެ ރައީސް ނަޝީދުގެ ކެމްޕެއިން އޮފީސް ހުޅުއްވައިދެއްވީ ފޮރިން މިނިސްޓަރ އަބްދުﷲ ޝާހިދެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
