ބަލޮގަންގެ ރަތް ކާޑު ބާތިލްކުރުމުގައި އިންފަންޓީނޯގެ ރޯލު ތަހުގީގުކުރުމަށް ޔޫރަޕިއަން ޕާލަމެންޓުން ގޮވާލައިފި

ފީފާގެ ރައީސް ޖިއާނީ އިންފަންޓީނޯއާ ދެކޮޅަށް ތަހުގީގެއް ހިންގުމަށް ގޮވާލައި ޔޫރަޕިއަން ޕާލަމެންޓުގެ މެންބަރުންތަކެއް އިސްނަގައިގެން ސިޓީއެއް ތައްޔާރުކޮށްފިއެވެ.

މި ސިޓީގައި ފާހަގަކޮށްފައިވާ މައްސަލަ ބަލަން ގޮވާލާފައިވަނީ އެމެރިކާގެ ފޯވާޑް ފޮލެރިން ބަލޮގަންގެ ރަތް ކާޑުގެ ސަސްޕެންޝަން ބާތިލުކުރި ނިންމުމަށް އެމެރިކާ ސަރުކާރުގެ ނުފޫޒު ފޯރާފައިވޭތޯއެވެ. ބަލޮގަންއަށް ރަތް ކާޑު ދައްކާފައިވަނީ މިދިޔަ ހަފުތާގައި ބޮސްނިއާ އެންޑް ހާޒެގޮވީނާއާ ދެކޮޅަށް ކުޅުނު މެޗުގައެވެ. ރަތް ކާޑާ އެކު އޮޓޮމެޓިކުން އެއް މެޗުގެ ސަސްޕެންޝަނެއް އަންނާނެ ކަމަށް ވީ ނަމަވެސް ވޯލްޑް ކަޕް ތާރީޚުގައި ކުރިން ދުވަހަކުވެސް ބޭނުންނުކުރާ ގާނޫނީ ލޫޕްހޯލެއް މެދުވެރިކޮށް ފީފާއިން އެ ސަސްޕެންޝަން ތަންފީޒުކުރުން ހުއްޓުވައި ބެލްޖިއަމާ ދެކޮޅަށް ކުޅުނު ރައުންޑް އޮފް 16 މެޗުގައި ބަލޮގަން ކުޅުނެވެ. ނަމަވެސް އެ މެޗުން 4-1 ގެ ނަތީޖާއިން އެމެރިކާ ވީ ބައްޔެވެ.

އެމެރިކާގެ ރައީސް ޑޮނަލްޑް ޓްރަމްޕް ވަނީ ބަލޮގަންގެ ރަތް ކާޑުގެ މައްސަލައިގައި އިންފަންޓީނޯއަށް ގުޅި ކަމަށް އެއްބަސްވެފައެވެ. ޓްރަމްޕް ބުނީ އެ ރަތް ކާޑަކީ އިންސާފުވެރި ނިންމުމެއް ނޫން ކަމަށާއި ނަމަވެސް އެއްވެސް ކަމެއް ކޮށްދިނުމަށް ނޭދޭ ކަމަށެވެ. ފަހުން ޓްރަމްޕް ވަނީ "ބޮޑު ނާއިންސާފެއް ރަނގަޅުކުރީތީ" އިންފަންޓީނޯއަށް ޝުކުރު އަދާކޮށްފައެވެ. އިންފަންޓީނޯ ބުނީ ފީފާގެ ޑިސިޕްލިނަރީ ބޮޑީއަކީ މިނިވަން ބައެއް ކަމަށް ޓްރަމްޕަށް ދެންނެވި ކަމަށެވެ.

މިކަމާ ގުޅޭގޮތުން ޔޫރަޕިއަން ޕާލަމެންޓުގެ މެންބަރު ބެރީ އެންޑްރޫސް ޔޫރޯނިއުސްއަށް ވިދާޅުވީ އެ ނިންމުމަކީ، ހުތުރު ކަމެއް އަދި އިންސާފު ގެއްލުވާލުން ކަމަށެވެ. ޔޫރަޕުގެ ފުޓުބޯޅައިގެ މައި ޖަމިއްޔާ ޔޫއެފާއިން މި ނިންމުން ސިފަކޮށްފައިވަނީ "ދުވަހަކުވެސް ކުރިން ނުފެންނަ ފަހުމު ނުވާ އަދި ހައްގު ނޫން" ނިންމުމެއްގެ ގޮތުގައެވެ.