އާދޭސްކުރީމަ ވެސް ބަޖެޓު ކޮމިޓީގައި ތިބޭ އައްޑޫ ސިޓީގެ މެމްބަރުން މަޝްރޫޢުތަކަށް ފައިސާ ޖަހައިނުދޭ: ނިހާދު

އައްޑޫ ސިޓީގެ ޕްރޮޖެކްޓް ތަކަށް ފައިސާ ޖެހުމަށް އާދޭސް ކުރުމުން ވެސް، މަޖިލީހުގެ ބަޖެޓް ކޮމިޓީގައި އައްޑޫ ސިޓީގެ ދާއިރާތައް ތަމްސީލުކުރައްވާ މެމްބަރުން ތިއްބެވި ނަމަވެސް، މަޝްރޫއުތަކަށް ފައިސާ ޖަހައިނުދޭ ކަމަށް ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.

ވެރިކަން ކުރާ ކޯލިޝަންގެ މައި ޕާޓީ ޕީއެންސީން ކުރިއަށް އޮތް މަޖިލިސް އިންތިހާބަށް ކުރިއަށްގެންދާ ކެމްޕޭން ގެ ތެރެއިން އައްޑޫ ސިޓީގައި ކުރިއަށްގެންދިޔަ ދިވެހީންގެ ރާއްޖެ މަޖިލިސް އަށް ޖަލްސާގައި ވާހަކަފުޅު ދައްކަވަމުން ނިހާދު ވަނީ މަޖިލީހުގައި ބާރުގަދަ ނުފޫޒްގަދަ މެމްބަރުން ތިއްބެވުމުން އައްޑޫގެ ތަރައްގީއަށް ހުރަސް އެޅޭކަން ފާހަގަކުރައްވާފައެވެ.

މިގޮތުން ނިހާދު ވިދާޅުވީ، އައްޑޫގެ ޕޯޓު ޕްރޮޖެކްޓުވެސް އެވޯޑުކޮށްފައި އޮތީ ނަމެއްގައިކަމަށާއި ބަޖެޓުގައި އެ މަޝްރޫއަށް ފައިސާ ހިމެނުމަށް އާދޭސް ކުރެއްވި މެމްބަރުންގެ ތެރޭގައި އެބޭފުޅާ ވެސް ހިމެނިވަޑައިގަންނަވާ ކަމަށެވެ. އެހެންނަމަވެސް، ބަޖެޓުކޮމިޓީގައި ތިއްބެވި 'ކުޑަ ސަރުކާރު' ގެ ވެރިން އެމަޝްރޫއުއަށް ބޭނުންވާ ފައިސާ ހިމަނައިނުދިންއިރު އެއީ ނަމެއްގައި ބާއްވާފައި އޮތް ޕްރޮޖެކްޓެއްކަމަށް ވެސް ނިހާދު ވިދާޅުވިއެވެ.

ރައީސް ޑރ.މުޢިއްޒުގެ މެނިފެސްޓޯގެ ހަމައެކަނި ކުޑަކުޑަ އެއްޗެއް ބަލާލުމުންވެސް ފާއިތުވެ ދިޔަ ހުރިހާ ދުވަހެއްގައި މުޅި އައްޑޫގައި އެޅިފައި އޮތް އިގްތިސާދީ މަރުތަޅު ނެއްޓުވުމަށްޓަކާ ރައީސް މުޢިއްޒު ވައުދުވެވަޑައިގެންފައިވާކަން ހާމަވާ ކަމަށް ވެސް ނިހާދު ވިދާޅުވިއެވެ.

"މެނިފެސްޓޯގެ ހަމައެކަނި ކުޑަކުޑަ އެއްޗެއް ބަލާލި އިރު މުޅި އައްޑޫގައި ފާއިތުވެ ދިޔަ ހުރިހާ ދުވަހެއްގައި އެޅިފައި އޮތް އިގްތިސާދީ މަރުތަޅު ނެއްޓުވުމަށްޓަކާ ރައީސް މުޢިއްޒު ވަނީ ވަޢުދުވެވަޑައިގެންފައި."

ނިހާދު ވިދާޅުވިއެވެ.

ނިހާދު ވިދާޅުވީ، ޕޯޓް ގެ މަޝްރޫއު ގެ އިތުރުންވެސް، ފޭދޫގައި ހިއްކާފައި އޮތް ބިމުގައި މަސައްކަތްކުރިއަށް ނުގެންދާތީ އެކަމާއި ގުޅިގެންވެސް އެކަންކަން ކުރިއަށް ގެންދިއުމަށް އެދި އެތައް ފަހަރެއްގެ މަތިން އާދޭސްކޮށް ދަންނަވާފައިވާނެކަމަށާއި އޭގެ ތެރޭގައި އެތަނުގައި ކަރަންޓާއި ފެނާއި ނަރުދަމާ ލައިދިނުން ހިމެނޭ ކަމަށެވެ.

ނަމަވެސް އެމަސައްކަތް ކުރީ ސަރުކާރުން ކޮށްދީފައިނުވާއިރު، ރައީސް ޑރ.މުޢިއްޒުގެ ސަރުކާރުން ބަޖެޓުގައި ޖަހާނެކަން ވައުދުވެފައިވާކަން ފާހަގަކުރައްވާ ނިހާދު ވިދާޅުވީ، މިފަދަ ކަންކަން ކުރެވެން އޮތީ ޕީއެންސީގެ މެމްބަރުން މަޖިލީހަށް އިންތިހާބުކޮށްގެންކަމަށާއި އެދެވޭ ތަރައްގީތައް ގެނެވޭނީ ސަރުކާރަށް އެއްބާރުލުންދޭ މެމްބަރުން ހޮވައިގެންކަމަށެވެ.