ސަރުކާރުން ވާދަވެރި ސިޔާސީ ލީޑަރަށް އަނިޔާކުރާކަން ދުނިޔެއަށް އެނގޭ: އިދިކޮޅު
ޑިމޮކްރަސީގެ ހަމަތައް އެއްފަރާތްކޮށް ސަރުކާރާއި ވާދަވެރި ސިޔާސީ ލީޑަރު އަދި ކުރީގެ ރައީސް ޔާމީން އަބްދުލްގައްޔޫމަށް މި ސަރުކާރުން އަނިޔާވެރިވަމުންދާކަން ބައިނަލްއަގުވާމީ މުޖުތަމައުގެ ސަމާލުކަމަށް އައިސްފައިވާކަމަށް އިދިކޮޅުން ބުނެފި އެވެ.
އިދިކޮޅުން ރޭ ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން އިދިކޮޅު އިއްތިހާދުގައި ހިމެނޭ ޕީއެންސީގެ ނައިބުރައީސް އަދި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވީ ރައީސް ޔާމީނަކީ ޒިންމާދާރު އިދިކޮޅު ލީޑަރެއްކަން ދުނިޔެ ގަބޫލުކޮށްފި ކަމަށެވެ.
އެގޮތުން އެމަނިކުފާނަކީ ރާއްޖެ ދޫކުރައްވާ ފިއްލަވާނެ ބޭފުޅެއް ނޫންކަމަށާއި، ފަސް އަހަރުގެ ދައުރެއް ފުރިހަމަ ކުރެއްވުމަށްފަހު، ވާދަވެރި ލީޑަރުގެ ހައިސިއްޔަތުންވެސް ޒިންމާދާރު މަސައްކަތްޕުޅުތަކެއް ކުރެއްވުމުގައި އެމަނިކުފާނު ސާބިތުވެ ހުންނެވިކަން ބައިނަލްއަގުވާމީ މުޖުތަމައު ގަބޫލުކުރާކަމަށް ސައީދު ވިދާޅުވި އެވެ.
އޭގެ އިތުރުން މި ސަރުކާރުން ރައީސް ޔާމީންގެ މައްޗަށް ފުލުފުލުގައި ދައުވާތައް އުފުލަމުންދަނީ އެއީ ވާދަވެރި ލީޑަރަށް ވުމުންކަމަށާއި، އެ ދައުވާތަކަކީ ސިޔާސީ ދައުވާތަކެއްކަން ބައިނަލްއަގުވާމީ މުޖުތަމައު މިހާރު ގަބޫލުކުރާކަމަށް ސައީދު ވިދާޅުވިއެވެ. އަދި އެކަމާއި ގުޅިގެން އެ ފަރާތްތަކުގެ ކަންބޮޑުވުން އިންތިހާއަށް އޮތްކަން ސައީދު ފާހަގަކުރެއްވި އެވެ.
"އިދިކޮޅުގެ ޖޮއިންޓު ސެނެޓުގެ އިއްތިފާގުން އެމަނިކުފާނަށް ރިޔާސީ ޓިކެޓު އަރުވަންދެން އެމަނިކުފާނު އުޅުއްވީ ގައުމު މިނިވަންކުރުމުގެ މަސައްކަތުގައި. އެފަހުން އެމަނިކުފާނު ވެވަޑައިގެންނެވީ އިދިކޮޅުގެ ރިޔާސީ ކެންޑިޑޭޓަށް. ބޭރުގެ ފަރާތްތަކަށް މިކަން ބަލައިގަނޭ.. ދަނޭ.. މިހާރު އަނެއްކާ 8 މަސް ދުވަހަށް ރިޔާސީ އިންތިޚާބަށް ކުޑަތަންވެފައި އޮއްވާ އަވަސް އަރުވާލާފަ އެމްޑީޕީގެ ޕްރައިމަރީއާއި ދިމާކޮށް މި ޖެހި ސަކަރާތް ބޭރުގެ ފަރާތްތަކަށް އެނގޭ"
ޕީއެންސީގެ ނައިބުރައީސް މުހައްމަދު ސައީދު
ޑިމޮކްރެޓިކް ވެރިކަމެއް ކުރާނެކަމަށް ބުނެ އެމްޑީޕީއިން މީގެ ކުރިން ބައިނަލްއަގުވާމީ މުޖުތަމައުގައި ދެއްކި ވާހަކަތަކާއި އެމީހުންގެ އަމަލުތަކާއި ދިމާނުވާކަން އެ ފަރާތްތަކަށް އެނގޭކަމަށާއި، ރާއްޖޭގެ މަޝްރަހު އެ ފަރާތްތައް ވަރަށް ގާތުން ބަލަމުންދާކަމަށް ސައީދު ވިދާޅުވިއެވެ.
އެގޮތުން މި ސަރުކާރުން ރައްޔިތުންނަށް ގާނޫނު އަސާސީއިން ލިބިދޭ ޚިޔާލުފާޅުކުރުމުގެ ހައްގަށް ހުރަސްއަޅާ، މުޒާހަރާތަކަށް ނިކުންނަ ފަރާތްތަކަށް އަނިޔާވެރިވާކަމަށާއި، އަންހެނުންނާއި ކުޑަކުދިންގެ ހައްގުތައް ހިމާޔަތް ކޮށްދިނުމުގައި ފެއިލްވެފައިވާކަން މުޅި ދުނިޔެއަށް އެނގޭކަމަށް ސައީދު ވިދާޅުވިއެވެ.
ބައިނަލްއަގުވާމީ މުޖުތަމައުތަކުގެ ކުރިމަތީގައި މި ސަރުކާރާއި އެމްޑީޕީގެ އަގު ވަރަށް ބޮޑަށް ވެއްޓިފައިވާކަމަށާއި، ޑިމޮކްރެޓިކް ވެރިކަމެއް ކުރުމަށް އެމްޑީޕީ ފެއިލްވެފައިވާކަން މިއަދު އެ ފަރާތްތައް ގަބޫލުކުރާކަމަށް ސައީދު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
