ދިވެހި ސިފައިން ނިކުމެ މާރިޔާ ހައްޔަރުކުރަން ޖެހޭ: ސައީދު

ދިވެހި ސިފައިން ނިކުމެ ޑިފެންސް މިނިސްޓަރުގެ މަގާމުގައި ހުންނެވި މާރިޔާ ދީދީ ހައްޔަރުކުރަން ޖެހޭކަމަށް އިދިކޮޅު އިއްތިހާދުގައި ހިމެނޭ ޕީއެންސީގެ ނައިބު ރައީސް އަދި މަޖިލީހުގެ މާވަށު ދާއިރާގެ މެމްބަރު މުހައްމަދު ސައީދު ވިދާޅުވެއްޖެ އެވެ.

ސައީދު މިފަދައިން ވިދާޅުވެފައިވަނީ ޕީޕީއެމް ޖަގަހަ ޖަލްސާގައި ޑިފެންސް މިނިސްޓަރު މާރިޔާ ދީދީއަށް ފާޑުކިޔުންތައް އަމާޒު ކުރައްވަމުންނެވެ.

ސައީދު ވިދާޅުވީ ޑިފެންސް މިނިސްޓަރު މާރިޔާ ދީދީ ސިފައިން ކުޑައިމީސްކޮށް، ދިވެހިރާއްޖޭގެ ދިފާއީ ބާރަށް މަލާމާތްކޮށް ފުރައްސާރަކުރުމުގެ ރިކޯޑެއް އޮތް ބޭފުޅެއްކަމަށެވެ.

އެގޮތުން ދިވެހި ސިފައިންނަކީ "ފިނޑި ފިނދަނަ" ތަކެއްގެ ގޮތުގައި މާރިސާ ސިފަކުރައްވާ ވާހަކަފުޅުދައްކަވާފައި ވާކަމަށް ސައީދު ވިދާޅުވި އެވެ.

އޭގެ އިތުރުން އޭނާ ވިދާޅުވީ އިންޑިއާ ސިފައިން ބޭނުންވެއްޖެނަމަ ރާއްޖެ ހިފިދާނެކަމަށް މާރިޔާ ވިދާޅުވެފައިވާކަމަށެވެ. އަދި އެފަދައިން އޭނާ ވިދާޅުވެފައިވަނީ ޑިފެންސް މިނިސްޓަރުގެ މަގާމުގައި ހުންނަވާ އިންޑިއާގެ ޓީވީ ޗެނަލަކަށް ދެއްވި ބަސްދީގަތުމެއްގައިކަން ސައީދު ފާހަގަކުރެއްވި އެވެ.

އެއާއެކު އޭނާ ވިދާޅުވީ އެފަދަ ވާހަކަތަކަކީ ދިފާއީ ވަޒީރަކު ދެއްކުން އެކަށީގެންވާ ވާހަކަތަކެއް ނޫންކަމަށެވެ. އަދި އެފަދަ ޒިންމާދާރު މަގާމެއްގައި ހުންނަވާ ފަރާތްތަކުން އެފަދަ ބަސްމަގެއް ގެންގުޅުއްވުމަކީ އެ މަގާމަށް ކުފޫ ހަމަނުވާކަން ދައްކައިދޭ ކަމެއްކަމަށެވެ.

ސައީދުގެ ވާހަކައިގައި ވަނީ ސިފައިންގެއަށް ގިނަ ދުވަސްތަކެއް ވަންދެން ޚިދުމަތްކޮށްދެއްވާފައިވާ، އަދި ޝަރަފުވެރިކަމާއެކު ރިޓަޔާ ކުރައްވާފައިވާ ޕީޕީއެމް ހުޅުމާލެ ދާއިރާގެ ރައީސް އަބްދުއް ޞަމަދަށް މަލާމާތްކޮށް މާރިޔާ ދެއްކެވި ވާހަކަތަކަށްވެސް އަލިއަޅުވާލައްވާފަ އެވެ.

ޞަމަދަށް އިންޑިއާއިން ކުރިމަތިވި ކަންކަމަށް މަލާމާތްކޮށް ހަޖޫ ޖައްސަވާ މާރިޔާ ދެއްކެވި ވާހަކަތަކަށް އެކަނި ބަލާލިޔަސް، ސިފައިން ސިފައިން ނިކުމެ އޭނާ ހައްޔަރުކުރަން ޖެހޭކަމަށް ސައީދު ވަނީ ވިދާޅުވެފަ އެވެ.

"އަޅުގަނޑުމެން އެންމެ ކުޑަމިނުން ބުނަން ޖެހޭ ބަސް މި ބުނަނީ.. މި ރާއްޖޭގައި ބޭރުގެ ސިފައިންނަކަށް ނުތިބެވޭނެއޭ. އެ ވާހަކަ ދެއްކި ބޭފުޅެއް ޞަމަދުބެއަކީ، އިންޑިއާއަށް ދިޔައިމަ ފޮނުވާލީމަ އެ ޖެހީ ޖޯކު. އެ ދެއްކި ވާހަކައިން އެކަނިވެސް ފުދޭ ދިވެހި ސިފައިން ނުކުމެ މާރިޔާ ހައްޔަރުކުރަން. ދިވެހި ސިފައިން ނިކުމެ މާރިޔާ ހައްޔަރުކުރަން ޖެހޭ"

މަޖިލީހުގެ މާވަށު ދާއިރާގެ ރައީސް މުހައްމަދު ސައީދު

އޭގެ އިތުރުން ސައީދު ވިދާޅުވީ ޑިފެންސް މިނިސްޓަރުގެ މަގާމުގައި ހުންނަވާ މާރިޔާ މަލާމާތްކުރީ ދިވެހި ރައްޔިތަކަށް ކަމަށެވެ. ކޮންމެ ސިޔާސީ ޕާޓީއަކަށް ނިސްބަތްވި ނަމަވެސް، އަދި ސިޔާސީ ވަކި ޕާޓީއަކަށް ނިސްބަތްވާ ރައްޔިތަކަށް ނުވި ނަމަވެސް ގާނޫނު އަސާސީން އެމީހަކަށް ލިބެންޖެހޭ ހައްގުތަކެއް ވާކަމަށް ސައީދު ވިދާޅުވިއެވެ.

ދިވެހިރައްޔިތުންނަށް ބޭރު ގައުމުތަކުގައި ރައްކާތެރިކަމާއެކު އުޅުމުގެ ފުރުސަތު ފަހިކޮށްދިނުމަކީ ޚާރިޖިއްޔާގެ ކޮނޑުގައިވެސް އެޅިފައިވާ ޒިންމާއެއް ކަންވެސް އޭނާ ފާހަގަކުރައްވާ ސައީދު ވިދާޅުވީ އެކަން އެހެން އޮއްވާ ޑިފެންސް މިނިސްޓަރު މާރިޔާ ވަނީ ދިވެހި ރައްޔިތެއްގެ ސިފައަށް މަލާމާތްކޮށް މި ގައުމުގެ އިއްޒަތާއި ކަރާމާތައް ބުރޫއަރާ މޭރުމުން ވާހަކަދައްކަވާފައިވާ ކަމަށެވެ.

އެހެންކަމުން އެއީ ސިފައިން ނިކުމެ މިއަދު މާރިޔާ ހައްޔަރުކުރަން ޖެހޭ ސަބަބެއްކަމަށް ސައީދު ވަނީ ތަކުރާރުކޮށް ވިދާޅުވެފަ އެވެ.