ސަމަދުއަށް މާރިޔާ ޖޯކު ޖެހި މައްސަލަ ބަލައި ފިޔަވަޅު އެޅުމަށް ހުށަހެޅި މައްސަލަ ބޭރުކޮށްލައިފި

ދިފާޢީވަޒީރު މާރިޔާ އަޙްމަދު ދީދީ، އިންޑިޔާއިން ޑީޕޯޓް ކޮށްލެވުނު ޢަބްދުއްޞަމަދު، ރާއްޖެއިން ބޭރުގައި އުފުލި ތަކުލީފުތަކަށް މަލާމާތްކޮށް، ޖޯކުޖެހި މައްސަލަ ބަލާ ފިޔަވަޅު އެޅުމަށް ސަރުކާރަށް ގޮވާލާ ހުށަހެޅި ކުއްލި މައްސަލަ ބޭރުކޮށްލައިފި އެވެ.

މިމައްސަލަ ހުށަހެޅުއްވީ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެމްބެ) އެވެ.

ސެމްބެ ގެ މައްސަލާގައި ބުނީ، ޢަބްދުއްޞަމަދަކީ ދިވެހި ސަލާމަތީ ޚިދުމަތްތަކުގައި ގިނަ ދުވަސްތަކެއް ވަންދެން ޚިދުމަތްކުރައްވައި ޝަރަފުވެރިކަމާއެކު ރިޓަޔާ ކުރައްވާފައިވާ ބޭފުޅަކަށް ވީއިރު، އެފަދަ ދިވެހި ދަރިއަކާ މެދު ޑިފެންސް މިނިސްޓަރު ގެންގުޅުއްވީ ދަށު ދަރަޖައިގެ ބަސްމަގު ކަމަށެވެ.

އަދި ދިވެހި ސިފައިންނާއި ފުލުހުންނަކީ މިޤައުމުގެ މިނިވަންކަމާއި އިސްތިޤުލާލަށް ލޮޅުން އަރާ ކޮންމެ ވަގުތެއްގައިވެސް މިޤައުމު ސަލާމާތް ކުރުމަށް ކަމަރު ބަނދެގެން ތިބެ، އެންމެ ފުރަތަމަ އެކަމާއި ކުރިމަތިލާން ތައްޔާރަށް ތިބި ބައެއް ކަމަށާ، އެއްވެސް އިރެއްގައި ސިފައިންގޭގަ ނުވަތަ ފުލުހުންގެ ތެރޭގައި އިޚުލާސްތެރި ޚިދުމަތެއް ކޮށްދެއްވާފައިވާ ބޭފުޅަކު މިޤައުމަށް ހަރާންކޯރު ނުވާނެތީއާއި، ކޮންމެ ވަގުތަކުވެސް ޤައުމުގެ މިނިވަންކަން ދިފާއު ކުރުމަށް ނުކުންނަވާނެ ބައެއް ކަމަށެވެ.

މިއާއެކު ސެމްބެގެ މައްސަލާގައި ވަނީ، ދިފާޢީ ވަޒީރަކީ މީގެ ކުރިންވެސް ދިވެހި ފުލުހުންނާއި ސިފައިންނަކީ ފިނދަނަތަކެއް ކަމަށް ސިފަ ކުރައްވާ، ޖޯކު ޖައްސަވާ ޢާންމު ގޮތެއްގައި ސިފައިންނާއި ފުލުހުންނަށް ބަދުބަސް ވިދާޅުވެފައިވާ ބޭފުޅެއްކަން ފާހަގަ ކުރައްވައި މިފަދަ ބޭފުޅަކު މިމަޤާމުގައި ހުންނެވުމަކީ މިސަރުކާރުން ސިފައިންނާއި ފުލުހުންގެ އަގު ވަޒަން ނުކުރާ މިންވަރު ހާމަވާ ކަމެއް ކަމަށެވެ.

"ވަކި ޤައުމެއް ރުއްސުމަށްޓަކައި ސަރުކާރުގެ އެކި ފަންތީގެ މަޤާމުތަކުގައި ތިއްބެވި ބޭފުޅުން އެ ޤައުމަށް ސަނާ ކިޔާ، ދިވެހި ރައްޔިތުން ނިކަމެތި ކުރަމުންދާ ދިއުމަކީ ބަލައިގަނެވޭ ކަމަކަށް ނޫން." ސެމްބެ ގެ މައްސަލާގައި ބުުނެފައިވެއެވެ.

އެހެންކަމުން، ޢަބްދުއްޞަމަދަށް މަލާމާތްކޮށް ޖޯކު ޖައްސަވާ ދިފާޢީ ވަޒީރު ދެއްކެވި ވާހަކަތަކަށް ދިވެހި ރައްޔިތެއްގެ ހައިސިއްޔަތުން މަޢާފަށް އެދުމަށާއި، އަދި މި ފަދަ މަޤާމެއްގައި ހުންނަވާ ދެއްކެވި ވާހަކަތަކާ ގުޅިގެން އެކަމަށް ފިޔަވަޅު އެޅުމަށް ސެމްބެ ވަނީ ސަރުކާރަށް ގޮވާލާފައެވެ.

ސެމްބެގެ މައްސަލައަށް މަޖިލީހަށް ހާޒިރުވެ ތިބި 39 މެންބަރުން ވޯޓު ލާފައިވާއިރު، 31 މެންބަރުން ވޯޓު ދީފައިވަނީ މައްސަލަ ބަލައިގަންނަން ނުފެންނަ ކަމަށެވެ. އަދި 8 މެންބަރުން ވޯޓު ދިނީ ބަލައިގަންނަން ފެންނަ ކަމަށެވެ. އެއާއެކު މި މައްސަލަ ވަނީ މަޖިލީހުން ބޭރުކޮށްލާފައެވެ.