މޭރީގެ މަރުގެ މައްސަލައިގައި ލަމްހާއާ ދެކޮޅަށް އޭނާގެ އެކުވެރިއަކު ހެކިބަސް ދީފި

ދެހާސް އެކާވީސް ވަނަ އަހަރުގެ އޮކްޓޯބަރު މަހުގެ 19ވަނަ ދުވަހު މަރާލާފައިވާ، އައިޖީއެމްއެޗުގެ ނަރުސް، މޭރީ ގްރޭސްގެ މައްސަލައިގައި ދައުވާ ރައްދުވާ ހަލީމަތު ލަމްހާއާ ދެކޮޅަށް އޭނާގެ ރަހުމަތްތެރިއަކު ކްރިމިނަލް ކޯޓުގައި ހެކިބަސް ދީފިއެވެ.

މޭރީގެ މަރުގެ މައްސަލައިގައި، އެނގި ހުރެ މީހަކު މެރުމުގެ ކުށުގެ ދައުވާ މާވިން އެސްވައި ވާގަސްގެ މައްޗަށް އުފުލާފައި ވާއިރު މާވިންގެ ލޯބިވެރިއެއް ކަމަށްވާ، އައިޖީއެމްއެޗްގެ ނަރުހެއްގެ ގޮތުގައި މަސައްކަތް ކުރަމުން އައި ހަލީމަތު ލަމްހާއަށް ކުރާ ދައުވާތަކަކީ، އެނގި ހުރެ މީހަކު މެރުމުގައި ބައިވެރިވުމާއި އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމާއި އަދި، ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދައުވާއެވެ.

އެ މައްސަލައިގައި މިއަދު ހެކިބަސް ދިނީ ލަމްހާގެ ރަހުމަތްތެރި ފުލުހެކެވެ. އޭނާގެ ވާހަކައިގައި ފާހަކަ ގޮށްފައިވާ ގޮތުގައި، ލަމްހާއާއި މާވިންގެ ލޯބީގެ ގުޅުން މޭރީއަށް ފަޅާއެރުމުން، އެކަން އެމީހުން މަސައްކަތް ކުރި އައިޖީއެމްޗްއަށް އަންގާނެ ކަމަށް މޭރީ ބުނުމުން، އެކަން ހައްލު ކުރުމަށް މޭރީހާ ވާހަކަ ދައްކަން ލަމްހާ ބުނިކަން ފާހަގަ ކުރިއެވެ.

ލަމްހާގެ އެކުވެރި ފުލުސްމީހާ އެކަމުގައި މޭރީއާ ވާހަކަ ދައްކުމަށްފަހު ލަމްހާއާ ވާހަކަ ދެއްކުމުން، މާވިންއާ އޮތް ލޯބީގެ ގުޅުން ކަނޑާލާނެ ކަމަށް ލަމްހާ ބުނެފައި ވާކަމަށް ފުލުސް މީހާ ވަނީ ކޯޓުގައި ބުނެފައެވެ.

އޭނާ ބުނިގޮތުގައި މޭރީ މަރުވި ދުވަހު ލަމްހާ އޭނާއަށް ގުޅާފައި، މޭރީ އޭނާގެ އަމިއްލަ ނަފްސަށް ގެއްލުން ދީގެން މާވިން ޑީޕޯޓްކޮށްލަން އުޅެނީ ކަމަށް ބުންޏެވެ. އަދި ފަހުން، މޭރީ މަރުވި ވާހަކަ އޭނާއަށް ގުޅާފައި ބުނީ ވެސް ލަމްހާ ކަމަށް ހެކިވެރި ފުލުސް ބުންޏެވެ.

ލަމްހާ އެގޮތަށް ބުނުމުން އައިޖީއެމްއެޗަށް ދިޔައިރު އެތަނުން ލަމްހާއާ ދިމާވުމުން، މޭރީ ދަންޖެހިގެން މަރުވީ ކަމަށް ލަމްހާ ބުނި ކަމަށް ހެކިވެރިޔާ ބުންޏެވެ. އަދި ހޮސްޕިޓަލްގައި މޭރީގެ ހަށިގަނޑު ބާއްވާފައި އޮއްވާ އޭނާއަށް ދެއްކީ ވެސް ލަމްހާ ކަމަށް އޭނާ ބުންޏެވެ.