ހިޔާ ފްލެޓު ކުލި ކުޑަކުރުމަށް އެދުމުން ރައީސް ޞާލިހު ދެއްވީ 3 އޮޕްޝަނެއް!

ހިޔާ ފްލެޓުތަކުގެ ކުލި ކުޑަކުރެވިދާނެ އޮޕްޝަންތަކެއް ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހު ވިދާޅުވެފައިވާކަމަށް ހިޔާ ފްލެޓުތަކުގެ ކަންކަމުގައި އިސްނަގައިގެން ހަރަކާތްތެރިވާ ބޭފުޅަކު "ވޮއިސް" އަށް ވިދާޅުވެއްޖެ އެވެ.

ހިޔާ ފްލެޓުގެ ކުލި ކުޑަކުރުމަށް އެދި ފްލެޓުތަކުގައި ދިރިއުޅޭ ގިނަ ބަޔަކު އަޑުއުފުލާ، ކުލި ކުޑަކުރަން ގޮވާލާ ޕެޓިޝަނެއްގައި ސޮއިކުރަން ފަށާފައިވާ މި ދަނޑިވަޅުގައި ހިޔާ ފްލެޓުތަކުގެ ކަންކަމުގައި އިސްކޮށް ހަރަކާތްތެރިވާ މީހުންނާއި ރައީސް ޞާލިހުވަނީ މިއަދު ބައްދަލުކުރައްވާފަ އެވެ.

އެ ފަރާތްތަކާއި ރައީސް ޞާލިހު މިއަދު ބައްދަލުކުރައްވާފައިވަނީ ހިޔާ ފްލެޓުތަކުގެ ދިރިއުޅޭ ރައްޔިތުންގެ ކަންބޮޑުވުން ހިއްސާކުރުމަށް އެމަނިކުފާނާ ބައްދަލުކުރުމަށް އެދި ފްލެޓުތަކުގެ މަންދޫބުން އެތައް ފަހަރެއްގެ މަތިން އެދުމުންކަމަށް ވޮއިސްއަށް މައުލޫމާތު ދިން ބޭފުޅާ ވިދާޅުވި އެވެ.

މިއަދުގެ އެ ބައްދަލުވުމުގައި ކުއްޔާއި ގުޅޭގޮތުން ރައީސް ޞާލިހު ހިޔާ ސަރަހައްދުގެ ރައްޔިތުންނަށް ވަނީ ކުލި ކުޑަކުރެވިދާނެ އޮޕްޝަންތަކެއް ދެއްވާފަ އެވެ.

އެގޮތުން އެއް ގޮތަކީ އެޕަރޓްމަންޓްތަކުގެ ފިނިޝިން މަސައްކަތްތަކަށް ނެގި ލޯނުތައް ފުރިހަމަކުރުމަށް، 5 އަހަރުގެ މުއްދަތަކަށް ފްލެޓްތަކުގެ ކުލި ކުޑަކުރުންކަމަށް ވިދާޅުވިއެވެ. އެހެން ނޫންނަމަ ހިޔާ ފްލެޓަށް ކުލި ނުދެއްކޭ، މާލީ ޙާލަތު ދަށް އާއިލާތައް ދެނެގަނެ އެފަދަ އާއިލާތަކަށް ކުލިކުޑަކޮށް ދެވިދާނެކަމަށް ވިދާޅުވިއެވެ.

އޭގެ އިތުރުން ތިންވަނަ އޮޕްޝަނަކަށް ހިޔާ މަޝްރޫއުގެ ލޯނު 30 އަހަރަށް ދަންމާލައިގެން ފްލެޓުތަކުގެ ކުލި މިހާރަށްވުރެ ކުލި ކުޑަކުރެވިދާނެކަމަށް ރައީސް ޞާލިހު ވިދާޅުވި އެވެ.

އެހެން ނަމަވެސް، ހިޔާ ފްލެޓުތަކުގެ ކުލި ކުޑަކުރުމަށް ހަމަހަމަ އުސޫލެއް ޤާއިމުކުރުމަށް ބައްދަލުވުމުގައި ބައިވެރިން ވަނީ ހުށައަޅާފަ އެވެ.

"ރައީސް ވިދާޅުވީ ރޯދަަހުގެ ކުރިއަށް ތިކަން ވޭތޯ (ކުލި ކުޑަކުރެވޭތޯ) ބެލީމޭ، އެކަމަކު ކަންތައްތައް ހުރިގޮތުން ވާގޮތެއް ނުވިއޭ. 3 އޮޕްޝަނެކޭ އޮތީ، 1 އޮޕްޝަނަކީ މިދޭތެރެއިން އެޗްޑީސީ މެދުވެރިކޮށް ސާވޭއެއް ކުރީމޭ.. 970 މީހުންނޭ ބުނީ ކުލި ބޮޑުކަމަށް. ދެން އަހަރުމެން ބުނިން ތި އަދަދެއް ނާންނާނެއޭ. މައުލޫމާތު ނުބައޭ. ދެން ބުނިން ކުލި ކުޑަވާން ޖެހޭނީ އެންމެނަށް އެއްކޮށޭ. އެހެން ބުނީމަ ބުނީ ދެން އޮތް ގޮތަކީ ސަރުކާރުން ލޯނުގެ މުއްދަތު 30 އަހަރަށް އިތުރުކޮށްފައި އެއްކޮށް ކުލި ކުޑަކޮށްލުމޭ. ދެން އަހަރުމެން ބުނިން ތިޔޭ އަސްލު ބޭނުންވާ ގޮތަކީ"

ހިޔާ ފްލެޓުގެ ކުލީގެ މައްސަލައިގައި ރައީސް ޞާލިހާއި ބައްދަލުކުރެއްވި ބޭފުޅެއް

ރައީސް ޞާލިހު މިފަދައިން ވިދާޅުވި ނަމަވެސް ފްލެޓުތަކުގެ ކުލި ކުޑަކޮށްދޭނެ ވަކި މުއްދަތެއް އެ ބައްދަލުވުމުގައި ވިދާޅުވެފައެއް ނުވެއެވެ. އަދި ކުޑަކޮށްދޭނެ ވަރެއްވެސް ހާމަކުރައްވާފައެއް ނުވެއެވެ.

އެ ބައްދަލުވުމުގައި ރައީސް ޞާލިހު ހަމައެކަނި ވިދާޅުވީ ލޯނުދައްކާ މުއްދަތު 30 އަހަރަށް ދަންމާލައިގެން ހިޔާ ފްލެޓުގައި ދިރިއުޅޭ ފަރާތްތަކުން ދައްކަންޖެހޭ ކުލި ކުޑަކުރެވިދާނެ އޮޕްޝަން އޮތް ވާހަކައެވެ.

"އޭނާ އެއްބަސްވި ކުލި ކުޑަކޮށްދޭނެކަމަށް. އެކަމަކު ވަކި މުއްދަތެއް ވިދާޅެއް ނުވޭ. ދެން ސީދާ ވަކި ވަރެއްވެސް ވިދާޅެއް ނުވޭ. ވިދާޅުވީ ލޯނު ދައްކާ މުއްދަތު 30 އަހަރަށް ހަދާފަ ކުލި ކުޑަކުރެވިދާނެކަމަށް. އަހަރުމެން އުންމީދު ކުރަނީ ރައީސް ޔާމީންގެ އިރު އޮތް ވަރަށް އެންމެ ކުޑަވެގެން ބަދަލުވުން"

ހިޔާ ފްލެޓުގެ ކުލީގެ މައްސަލައިގައި ރައީސް ޞާލިހާއި ބައްދަލުކުރެއްވި ބޭފުޅެއް

ވޮއިސްއަށް މައުލޫމާތުދެއްވި ބޭފުޅާ ވިދާޅުވީ ލޯނުގެ މުއްދަތު ދަންމާލައިގެން ނަމަވެސް ކުލި މިހާރަށްވުރެ ކުޑަ ކުރެވޭކަމަށް ވާނަމަ ފްލެޓުތަކުގައި ދިރިއުޅޭ ފަރާތްތަކަށް މުހިންމީ އެފަދަ ލުއި ފަސޭހައެއް ލިބުން ކަމަށެވެ.

އެހެން ނަމަވެސް ކުރީ ސަރުކާރުން ކަނޑައަޅާފައިވާ އަގަށް 5500 ރުފިޔާއަށް ފްލެޓުތަކުގެ ކުލި ކުޑަނުކުރެވެންވީ ސަބަބެއް ނެތްކަމަށް އޭނާ ވިދާޅުވި އެވެ.

އަދި ލޯނު މުއްދަތު ދަންމާލައިގެން ކުލި ކުޑަކުރާނަމަ ކުރީ ސަރުކާރުން ކަނޑައަޅާފައިވާ ވަރަށް ކުޑަކުރާނެކަމަށް އުންމީދުކުރާކަމަށް ވެސް އޭނާ ވިދާޅުވި އެވެ.