ހޯމް މިނިސްޓަރު އިމްރާނަކީ ބޮޑު ފިނޑިއެއް: ސައީދު

ހޯމް މިނިސްޓަރު އަދި އަދާލަތު ޕާޓީގެ ރައީސް އިމްރާނު އަބްދުالله އަކީ ބޮޑު ފިނޑިއެއްކަމަށް ޕީއެންސީގެ ނައިބު ރައީސް އަދި މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ.

ސައީދު މިފަދައިން ވިދާޅުވެފައިވަނީ ޗެނަލް-13 ގެ ނިއުސްޓޯކް ޕްރޮގްރާމުގައި ކުރި ސުވާލަކަށް ޖަވާބުދެއްވަމުން ނެވެ.

ވާދަވެރި ސިޔާސީ ލީޑަރު ޖަލުގައިގެ މައްޗަށް ކޮށްފައިވާ ޖަލު ހުކުމެއް ތަންފީޒުކުރައްވަމުން ދާއިރު، ހޯމް މިނިސްޓަރު އިމްރާނު އަބްދުالله އިސްވެ ހުންނަވާ އެމަނިކުފާނަށް އެކިވަރުގެ އުނދަގޫތައް ކުރައްވަމުން ގެންދަވާކަމަށް އިދިކޮޅުން ދަނީ ތުހުމަތު ކުރައްވަމުން ނެވެ.

އެގޮތުން މާފުށީ ޖަލުގައި އެމަނިކުފާނު ބަހައްޓަވާފައި ހުންނަ ގޮޅީގައި ކެމެރާ ހަރުކޮށްގެން ބެލުންފަދަ ކަންކަން އިމްރާނު ކުރައްވާކަމަށް އިދިކޮޅުން ތުހުމަތު ކުރެއެވެ. އޭގެ އިތުރުން އަދާލަތު ޕާޓީގެ ސްލޮޓެއްގައި ރައީސް އޮފީހުގެ ޗީފް އޮފް ސްޓާފުގެ މަގާމުގައި ހުންނެވި އަލީ ޒާހިރު މެދުވެރިކޮށް ރައީސް ޔާމިނުގެ މައްސަލަތަކަށް ނުފޫޒު ފޯރުވަމުންދާ ކަމަށް އިދިކޮޅު ފަރާތްތަކުން ދަނީ ތުހުމަތު ކުރައްވަމުން ނެވެ.

އެހެންކަމުން އިދިކޮޅުން އެކަންކަން ފާހަގަކުރައްވާއިރު، ހޯމް މިނިސްޓަރު އިމްރާނު ހުންނަވަނިކޮށް ރައީސް ޔާމީން މިނިވަން ކުރެވިދާނެކަމަށް ޤަބޫލުކުރަންތޯ ނިއުސްޓޯކް ޕްރޮގްރާމުގައި ވަނީ ސުވާލުކޮށްފަ އެވެ.

ސައީދު ވިދާޅުވީ ހޯމް މިނިސްޓަރު އިމްރާނަކީ ސާބިތު ނުހިފޭ ވާހަކަ ދެއްކުން ފިޔަވައި އިތުރުކަމެއް ކުރެއްވޭނެ ބޭފުޅެއް ނޫން ކަމަށެވެ.

ރައީސް ޔާމިނުގެ ޒައާމަތުގައި 2015 ވަނަ އަހަރު މޭޑޭގައި ބޮޑު އެއްވުމެއް ބާއްވާ ކަރުދާސްތަކެއް ދައްކާ ޝަހީދު ޑރ އަފްރާޝީމާއި ގެއްލުވާލި މިނިވަން ނޫހުގެ ނޫސްވެރިޔާ އަހުމަދު ރިލްވާނުގެ މައްސަލައިގެ ޑޮކިއުމަންޓުތައް ކަމަށް ބުނެ ކަރުދާސްތަކެއް އިމްރާނު ނުދައްކާތޯ ސައީދު ސުވާލު ކުރެއްވި އެވެ. އަދި އެ ފަރާތްތަކުގެ މަރާއި ރައީސް ޔާމިނާއި ގުޅުވާ އެމަނިކުފާނުގެ އިސްތަށިފުޅުގައި އިލްޒާމުތައް ނާޅުވާތޯ އެއްސެވިއެވެ.

މިއަދު ހޯމް މިނިސްޓަރުގެ މަގާމުގައި ހުންނަވާއިރު، އެ ޑޮކިއުމަންޓުތައް ކޮބައިތޯއާއި، އެ މަރުތަކަށް އޭނާ އަށް އެއްވެސް އިންސާފެއް ހޯދިއްޖެތޯ ސައީދު ވަނީ ސުވާލުކުރައްވާފަ އެވެ.

އެކަންކަން ފާހަގަކުރައްވާ ސައީދު ވިދާޅުވީ ގަދަ ބަސް ވިދާޅުވި ނަމަވެސް އިމްރާނަކީ ބޮޑު ފިނޑިއެއް ކަމަށެވެ.

"އިމްރާނަކީ ފިނޑިއެއް. ހޯމް މިނިސްޓަރު އިމްރާނަށް ވުރެ ބޮޑު ފިނޑިއެއް މި ރާއްޖޭގައި ނުހުންނާނެ"

ޕީއެންސީގެ ނައިބު ރައީސް ސައީދު

ސައީދު ވިދާޅުވީ ރައީސް ޔާމިނުގެ މައްސަލައަށް ނުފޫޒު ފޯރުވުމަށް ސަރުކާރުން ކިތަންމެހާ ވެސް މަސައްކަތްތަކެއް ކުރަމުން ގެންދާ ކަމަށެވެ.

އަދި ސަރުކާރުން އެހާ ބޮޑަށް އެ މައްސަލަތަކަށް ނުފޫޒު ފޯރުވަނީ ރިޔާސީ އިންތިޚާބުގައި އެމަނިކުފާނަށް ވާދަ ނުކުރެވޭނެ ގޮތް ހެދުމުގެ ބޭނުމުގައި ކަމަށެވެ.

އެހެން ނަމަވެސް އެމަނިކުފާނަކީ މައުސޫމު ބޭފުޅެއް ކަމަށާއި، އަދި އެކަން ޝަރުއީ ކޯޓުތަކުން ވަރަށް އަވަހަށް ސާބިތުވެގެންދާނެ ކަމުގެ ޔަގީންކަން އޮތްކަމަށް ސައީދު ވިދާޅުވި އެވެ.

އެއާއެކު ސައީދު ވިދާޅުވީ ރައީސް ޔާމީން ރިޔާސީ އިންތިޚާބުގައި ވާދަކުރައްވާ، މި ސަރުކާރު ބަލި ކުރައްވާނެ ކަމަށެވެ. އަދި ދެން މި ރާއްޖޭގައި އުފެދިގެންދާނީ އެމަނިކުފާނުގެ ޒައާމަތެއް ކަމަށެވެ. އެކަން ހޯމް މިނިސްޓަރު އިމްރާނަށް ވެސް ރަނގަޅަށް އެނގިވަޑައިގަންނަވާ ކަމަށް ސައީދު ވިދާޅުވި އެވެ.