ޖޭއެސްސީ ބިލު އޮތް ގޮތުން ޖުޑިޝަރީ އިސްލާހުކުރުމުގެ ނިޔަތް ނެތްކަން ސާފު: ޑރ ޖަމީލު

ޖުޑިޝަލް ސާވިސް ކޮމިޝަންގެ ކޮމްޕޮސިޝަން ބަދަލުކުރުމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވީ ވައުދުފުޅު ފުއްދުމަށް މަޖިލީހަށް ހުށައެޅި ބިލު ފަރުމާކޮށްފައި އޮތް ގޮތުން ޖުޑިޝަރީ އިސްލާހުކުރުމުގެ އެއްވެސް ނިޔަތެއް ސަރުކާރުގެ ނެތްކަން ހާމަވާކަމަށް ކުރީގެ ނައިބުރައީސް ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ.

ޑރ ޖަމީލު މިފަދައިން ވިދާޅުވެފައިވަނީ ޖޭއެސްސީ އިސްލާހުކުރަން މަޖިލީހަށް ހުށައެޅި ބިލާއެކު ޝަރުއީ ދާއިރާ އިސްލާހުކުރުމަށް ސަރުކާރުން ވީ ވައުދު ފުއްދިއްޖެކަމަށް ބަންޑާރަ ނައިބު އިބްރާހިމް ރިއްފަތު ވިދާޅުވުމާއި ގުޅިގެން ކުރެއްވި ޓްވީޓެއްގަ އެވެ.

އެގޮތުން ޑރ ޖަމީލު ވިދާޅުވީ ޖޭއެސްސީ އިސްލާހުކުރަންކަމަށް ބުނެ ހުށައެޅި ބިލަކީ ބޮޑު އިޅުވާލުމެއް ކަމަށެވެ. އެގޮތުން އެ ކޮމިޝަނުގައި ސަރުކާރުގެ ވަޒީރުންނާއި އެމްޑީޕީގެ މެމްބަރުން ތިއްބަވައިގެން އެ ކޮމިޝަން މިނިވަންވާނެ އެއްވެސް ގޮތެއް ނޯންނާނެކަމަށް ޑރ ޖަމީލު ވިދާޅުވި އެވެ.

ޖޭއެސްސީ މިހާރު އެތުރިފައިވާ ގޮތަށް ބަލާއިރު، އާންމުންގެ އެންމެ ބޮޑު ކަންބޮޑުވުމެއް އޮތީ، އެ ކޮމިޝަނުގައި ސިޔާސީ ބޭފުޅުން ތިއްބަވާތީކަން އެ ބިލާގުޅިގެން އާންމުންގެ ޚިޔާލު ހޯދުމަށް ކުރި މަސައްކަތުން ފާހަގަކުރެވިފައިވާކަމަށް އޭޖީ އޮފީހުން ވެސް ވަނީ ހާމަކޮށްފަ އެވެ.

އެހެން ނަމަވެސް، ޖޭއެސްސީގެ ކޮމްޕޮސިޝަން ބަދަލުކުރުމަށް ފޮނުވި އިސްލާހުގައި ވެސް، ސިޔާސީ މީހުންނަށް ނުތިބޭގޮތަށް އިސްލާހު ގެނެސްފައެއް ނުވެއެވެ.

އެކަމަށް އިޝާރާތްކުރައްވާ ޑރ ޖަމީލު ވަނީ ބަހުގެ ހަމަލާތަކެއް ވެސް ރައްދުކުރައްވާފަ އެވެ.

"ތިމާމެންނަށް ހެޔޮވަރަށް ސޫޓް ފަހަން އުޅެނީ އަބަދު މަގާމުގައި ތިބޭނެކަމަށް ދެކިގެންބާ؟ ނަމަކަށް ކަމެއް ކޮއްލީ"

ކުރީގެ ނައިބު ރައީސް ޑރ މުޙައްމަދު ޖަމީލު އަހުމަދު

ޖުޑީޝަލް ސާރވިސް ކޮމިޝަން، ޖޭއެސްސީ އެކުލެވިގެންވާ ގޮތް ބަދަލުކޮށް، އެ ކޮމިޝަންގެ މެންބަރުންގެ ޢަދަދު 7 މެމްބަރުންނަށް މަދުކުރުމަށް ބަންޑާރަ ނާއިބުގެ އޮފީހުން ރައްޔިތުންގެ މަޖިލީހަށް ބިލު ހުށައަޅައިފި އެވެ.

މީގެ ކުރިން ޖޭއެސްސީ އިސްލާހުކުރުމަށް މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ތިން ފަހަރު މަޖިލީހަށް ހުށައަޅާފައި ވެއެވެ.

އެހެން ނަމަވެސް ކޮންމެ ފަހަރަކުވެސް އެމްޑީޕީ ސުޕަމެޖޯރިޓީ އޮންނަ ރައްޔިތުންގެ މަޖިލީހުން އެ އިސްލާހުތައް ވަނީ ބޭރުކޮށްލާފަ އެވެ.

އެއާއެކު ދައުރުގެ ފަހު އަހަރަށް މިހާ މުހިންމު ބިލެއް ފަސްކުރުމާއި ގުޅިގެން ވެސް ސަރުކާރަށް ގިނަ ފާޑުކިޔުންތަކެއް ވަނީ އަމާޒުވެގެން ގޮސްފަ އެވެ.