ގަޑި ދީފަ މިއަދުވެސް ރައީސް ޞާލިހު ބައްދަލެއް ނުކުރެއްވި: އިދިކޮޅު

އިދިކޮޅު ކޯލިޝަންގެ ލީޑަރުންނާއި ބައްދަލުކުރައްވަން ގަޑި ދިނުމަށްފަހު، އެބޭފުޅުން ރައީސް އޮފީހަށް ވަޑައިގަތުމުން ބައްދަލުނުކުރައްވާ ރައީސުލްޖުމްހޫރިއްޔާ އޮފީސް ދޫކުރައްވާ ވަޑައިގެންނެވިކަމަށް އެ ކޯލިޝަނުން ބުނެފި އެވެ.

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ޝަރީއަތްތައް ކުރިއަށް ގެންދާ ގޮތާއި، އެމަނިކުފާނުގެ އިންތިޚާބީ ހައްޤުތަކަށް ހުރަސްއެޅޭތީ އިދިކޮޅުގެ އޮތް ކަންބޮޑުވުންތަކާއެކު، އިދިކޮޅު ލީޑަރުން ރައީސް އޮފީހަށް ވަޑައިގަންނަވާތާ ދުވަސްކޮޅެއް ވެއްޖެ އެވެ.

ކޮންމެ ދުވަހަކުވެސް ހެނދުނު އެބޭފުޅުން ރައީސުލްޖުމްހޫރިއްޔާއާއި ބައްދަލުކުރެއްވުމަށް ރައީސް އޮފީހަށް ވަޑައިގެން އެތައް އިރެއް ހޭދަކުރެއްވުމަށްފަހު ބައްދަލުވާގޮތް ނުވެގެން އަނބުރާ ވަޑައިގަންނަވަން ޖެހެއެވެ.

ރައީސްއާއި ބައްދަލުކުރުމަށް އެދި އެތައް ސިޓީއެއް ފޮނުވާފައި ވީ ނަމަވެސް ޕްރޮޓޮކޯލުގެ ތެރެއިން އެ ސިޓީތައް ލިބިވަޑައިނުގަންނަވާ ކަމަށް ރައީސް އޮފީހުން ބުނުމާއި ގުޅިގެން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވަނީ ރައީސް އޮފީހުގައި ހުންނަވާ އަތުން ސިޓީއެއް ލިޔެ ހަވާލުވެސް ކުރައްވާފަ އެވެ.

އިދިކޮޅުން ބުނީ އިދިކޮޅުގެ ހުރި ކަންބޮޑުވުންތަކާއި ގުޅިގެން ރައީސް އާއި ބައްދަލުކުރެއްވުމަށް އެ ސިޓީއިން އެދުމުގެ އަންގާރަ ދުވަހުގެ 12:30 އަށް ރައީސްގެ އެޕޮއިންޓުމަންޓު ލިބިފައިވާކަމަށް އެ ކޯލިޝަނަށް އަންގާފައިވާ ކަމަށެވެ.

އެހެން ނަމަވެސް މިއަދުވެސް ރައީސް އޮފީހަށް އިދިކޮޅު ލީޑަރުން ވަޑައިގަތުމުން ރައީސުލްޖުމްހޫރިއްޔާ އެބޭފުޅުންނާއި ބައްދަލުކުރައްވާފައެއް ނުވެއެވެ. އަދި ދެއްވި ގަޑިއަށް ރައީސުލްޖުމްހޫރިއްޔާ އޮފީހުން ނިކުމެވަޑައިގެން މަންޒަރު ފެނުނުކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވަނީ މީޑިއާ މައުލޫމާތު ދެއްވަމުން ވިދާޅުވެފަ އެވެ.

"އަޅުގަނޑުމެންނަކަށް ނޭނގޭ ކިހެނެއްކަމެއް މި ވީކީ. އިއްޔެ އަޅުގަނޑުމެން ލީ ސިޓީއާއި އެކު މިއަދު ގަޑި ހަމަޖެހިފައިވާކަމަށް ބުނި، އެހެން ނޫނީ ތިބޭފުޅުންނަށް އެނގިވަޑައިގަންނަވާނެ އަޅުގަނޑުމެން އާންމުކޮށް އަންނަނީ 10:30 އަށް. މިއަދު އެ ގަޑިއަށް ނައިސް މަޑުކޮށްލީ 12:30 އަށް ގަޑި ހަމަޖެހިފައި އޮތްކަމަށް ވިދާޅުވީމަ. އެހެންވީމަ އަޅުގަނޑުމެން އައީ. އައިސް 12:35 - 40 ހާއިރު އަޅުގަނޑުމެންނަށް ފެނުނީ ރައީސް އޮފީހުން ނިކުމެ ވަޑައިގަތްތަން"

ޕީއެންސީގެ ރައީސް އަބްދުއްރަހީމް އަބްދުالله

އަބްދުއްރަހީމް ވިދާޅުވީ އިދިކޮޅު ކޯލިޝަނުން ރައީސުލްޖުމްހޫރިއްޔާ އާއި ބައްދަލުކުރައްވަން ކޮންމެ ދުވަހަކު ރައީސް އޮފީހަށް އަންނަނީ ކޮންމެހެން އެމަނިކުފާނު މޫނުފުޅު ރީތިކަމުން މޫނުފުޅު ބައްލަވާލުމަށްކަމަށް ނޫން ކަމަށެވެ.

އިދިކޮޅުން ކަންބޮޑުވުވާ ބޮޑެތި މައްސަލަތަކެއް ހުރުމުން އެކަމާއި ގުޅޭގޮތުން ރައީސުލްޖުމްހޫރިއްޔާ އާއި މަޝްވަރާކުރުމަށް ކަމަށެވެ.

އެގޮތުން އިދިކޮޅު ލީޑަރަށް ނުހައްގުން ޖަލުގައި އަނިޔާކުރާއިރު، މިއަދު ހުރިހާ މުއައްސަސާއަކާއި، މަޖިލީހުގެ މަސައްކަތް ވެސް އޮތީ ހުއްޓުވާފައިކަމަށް އަބްދުއްރަހީމް ވިދާޅުވި އެވެ. މުޅި ގައުމު ހުއްޓުމަކަށް ގެނެސްފައިވަނީ ރިޔާސީ އިންތިޚާބެއް ވެސް ބޯމަތީގައި އޮއްވާ ކަމަށް ވުމުން، ރައްޔިތުންގެ އެތައް ކަންބޮޑުވުންތަކެއް ވެސް ހުރިކަން އޭނާ ފާހަގަކުރެއްވި އެވެ.

އެހެންކަމުން އެކަންކަމާއި ގުޅިގެން މަޝްވަރާކޮށްލުމަށް، ކުޑަމިނުން ބައްދަލުކޮށްލަން ނުކުރޭނަމަ ރައްޔިތުން ރައީސް އޮފީސް ދޮށަށް އެއްވެސް ޖަވާބެއް ހޯދުމުގެ މަސައްކަތް ފަށަން ވެއްޖެކަމަށް އަބްދުއްރަހީމް ވިދާޅުވި އެވެ. އަދި ސަރުކާރުން އަމަލުކުރަމުންދާ ގޮތާއި ގުޅޭގޮތުން އަބްދުއްރަހީމް ވަނީ ކަންބޮޑުވުން ފާޅުކުރައްވާފަ އެވެ.