ހުޅުމާލޭގައި ހިނގި ކާރު އެކްސިޑެންޓެއްގައި ޑްރައިވަރު ނިޔާވެއްޖެ

ހުޅުމާލެގައި ހިނގި ކާރު އެކްސިޑެންޓެއްގައި ޓެކްސީ ޑްރައިވަރެއް ނިޔާވެއްޖެއެވެ.

ފުލުހުންގެ މީޑިއާ އޮފިޝަލަކު ވިދާޅުވީ، ހުޅުމާލެ ފޭސް1ގެ ހިތިގަސް މަގު ޕްލެޓިނަމް ކައިރީގައި ދެ ކާރެއް ޖެހި، ކޮންޓްރޯލް ނުވެ ގޮސް ޑިވިޑަރުތަކުގައި ޖެހި އެކްސިޑެންޓެއް ހިނގާފައިވާ ކަމަށް މިއަދު ހަވީރު 5:47 ގައި ފުލުހުންނަށް ރިޕޯޓްކޮށްފައިވާ ކަމަށެވެ.

އަދި، އެކްސިޑެންޓްގައި ތިން މީހުންނަށް އަނިޔާވެގެން ހުޅުމާޅެ ހޮސްޕިޓަލަށް ގެންގޮސްފައި ވާއިރު، އެތަނުން އެކަކު ނިޔާވެފައިވާ ކަމަށް ހޮސްޕިޓަލާއި ހަވާލާދީ މީޑިއާ އޮފިޝަލް ވިދާޅުވިއެެވެ.

މީގެ އިތުރުން މީޑިއާ އޮފިޝަލް ވިދާޅުވީ، ނިޔާވެފައި ވަނީ އެތަނުން އެއް ކާރު ދުއްވަން އިން ޑްރައިވަރު ކަމަށާ، އެ ކާރުގައި އެވަގުތު އިނީ ޑްރައިވަރު އެކަނިކަމަށެވެ. އަދި އެއީ 65 އަހަރުގެ ދިވެހި ފިރިހެނެއް ކަމަށްވެސް ވިދާޅުވި އެވެ.

މި މައްސަލަ ފުލުހުން ތަހުގީގު ކުރަމުންދާ ކަމަށްވެސް އޮފިޝަލް ވިދާޅުވި އެވެ.