އަޅުގަނޑު ކުރިމަތިލައިގެން މިއުޅެނީ ރައީސް ކަން ބޭނުންވެގެނެއް ނޫން، ޤައުމުގެ މުސްތަޤްބަލަށްޓަކައި: ޤާސިމް
އިންތިޚާބަށް ކުރިމަތިލައްވައިގެން އުޅުއްވަނީ ރާއްޖޭގެ ރައީސުލްޖުމްހޫރިއްޔާ ގެ މަގާމު ނުވަތަ އެހެންވެސް މަޤާމެއް ބޭނުންފުޅުވެގެން ނޫން ކަމަށާއި ކުރިމަތި ލައްވައިގެން އުޅުއްވަނީ ޤައުމުގެ މުސްތަޤްބަލަށްޓަކައި ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހިމް ވިދާޅުވެއްޖެއެވެ.
ޤާސިމް މިހެން ވިދާޅުވީ ރިޔާސީ ކެމްޕޭނަށް ރޭ ށ މިލަންދޫގައި ބޭއްވި ޖަލްސާގައި ވާހަކަދައްކަވަމުންނެވެ.
ޤާސިމް ވިދާޅުވީ ރިޔާސީ އިންތިޚާބަށް ކުރިމަތިލައްވަވާފަ ތިބި ކެންޑިޑޭޓުން ކުރިމަތި ލެއްވެވީ ކޮން މަޤްސަދެއްގައި ކަން އެނގިލައްވާނީ އެބޭފުޅުންނަށް ކަމަށެވެ.
"ހަމަގައިމުވެސް އަޅުގަނޑު ކުރިމަތިލައިގެން މިއުޅެނީ ރައީސުލް ޖުމްހޫރިއްޔާ ކަމުގެ މަޤާމަށް ކުރިމަތިލައިގެން އެކަން ހޯދުމުގެ އެދުންވެރިކަމާއި ޝައުޤުވެރިކަން އޮވެގެނެއް ނޫން" ޤާސިމް ވިދާޅުވިއެވެ.
ޤާސިމް ވިދާޅުވީ އޭނާ އިންތިޚާބަށް ކުރިމަތިލައްވައިގެން އުޅުއްވަނީ މިޤައުމުގެ މުސްތަޤްބަލް އުޖާލާކޮށް ދިވެހިރައްޔިތުންގެ ތަނަވަސްކަމާއި ދުޅަހެޔޮކަން އިތުރުކޮށް، ތަޢުލީމީ އަދި އަޚްލާޤީ ގޮތުން އަދި ހުރިހާ ސިފައެއްގައިވެސް ދުނިޔޭގެ އެހެން ޤައުމުތަކާއި ފައިހަމަކުރެވޭ ވަރުގެ ޤައުމެއްގެ ގޮތުގައި ހެދުމަށް ކަމަށެވެ.
ޤާސިމް ވިދާޅުވީ ދިވެހި ޤައުމުގެ މިނިވަން އޮތީ ދިވެހިންގެ އަތްމަތީގައިތޯ ބުނެ ކުރެވޭ ސުވާލުގެ ޖަވާބު އެބަ ހޯދަން ޖެހޭކަމަށެވެ. އަދި މިއަދުގެ ސަރުކާރުން ރާއްޖޭގެ ޤާނޫނާއި ޤާނޫނުއަސާސީ އާއި ޚިލާފު އެތައް ކަމެއް ވަނީ ކުރައްވައިފައި ކަމަށް ޤާސިމް ވިދާޅުވިއެވެ.
ޤާސިމް ވިދާޅުވީ އިންތިޚާބަށް ކުރިމަތިލެއްވީ ދިވެހިންގެ މިނިވަންކަމާއި އިސްތިޤްލާލު ދެމެހެއްޓުމަށްޓަކައި ކަމަށެވެ.
ށ އަތޮޅަށް ޤާސިމް ކުރައްވަމުން ގެންދަވާ ކެމްޕޭނު ދަތުރުފުޅުގައި މިއަދު ޤާސިމްގެ ޓީމުން ވަނީ ށ ފުނަދުއަށް ވަޑައިގެންފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
