އަޅުގަނޑުމެން މިތިބީ ހިނގައިގަންނާނެ ގޮތެއް ނޭނގިފައި؛ އެވަރަށް އޮޅުން އަރުވާލައިފި: ގާސިމް

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ މި ސަރުކާރުން ދިވެހިންނަށް ކަންކަން ވަރަށް ބޮޑަށް އޮޅުވާލާފައިވާ ކަމަށް ޖުމްހޫރީ ޕާޓީ (ޖޭޕީ) ގެ ލީޑަރ، އަދި ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.

ރިޔާސީ އިންތިހާބުގެ ކެމްޕެއިނަށް އުތުރުގެ ރަށްތަކަށް ކުރައްވަމުންދާ ދަތުރުފުޅުގެ ތެރެއިން ށ.ފުނަދޫ ރައްޔިތުންނާއި ބައްދަލުކުރައްވައި ވާހަކަ ދައްކަވަމުން ގާސިމް ވިދާޅުވީ، ގައުމެއްގެ މިނިވަންކަމާއި ރައްކާތެރިކަން ކަށަވަރު ނުކުރެވޭ ކަމަށް ވާނަމަ، ގެނެވޭނެ ތަރައްގީއެއް ނޯންނާނެ ކަމަށެވެ.

އަޅުގަނޑުމެން މިއަދު މިތިބީ ސުވާލު މާކެއްގެ ތެރޭގައިތޯ؟ ނުވަތަ ހަތަރެސްކަން ގޯޅިއެއްގެ މެދަށް އައިސް ހުއްޓުން އަރާފައިތޯ؟ ދާންވީ ކޮޅެއް ނޭނގިފައިތޯ، ރަނގަޅަށް ވިސްނާލީމަ އެނގޭނެ، ހަތަރެސްކަން ގޯޅިއެއްގެ މެދުތެރޭގައި މިތިބީ. ހިނގައިގަންނަންވީ ކޮން ކޮޅަކަށް ކަން ނޭނގިފައި. ރަނގަޅު މަގަކީ ކޮބައިކަން ބައެއް މީހުންނަށް ނޭނގިފައި މިތިބީ. އެވަރަށް އަޅުގަނޑުމެންނަށް މިއޮތީ އޮޅުން އަރުވާލާފައި.

ގާސިމް އިބްރާހިމް

ދިވެހިންނަށް ކަންކަން އޮޅުވާލާފައިވާ ކަމަށް ގާސިމް ވިދާޅުވާ ވާހަކައިގެ ތަފްސީލަށް ވަޑައިގަންނަވަމުން އޭނާ ވިދާޅުވީ، ދިވެހިރާއްޖޭގެ މިނިވަންކަން އޮތީ ވަރަށް ނާޒުކު ހާލަތެއްގައި ކަމަށެވެ. އެގޮތުން ދިވެހިރާއްޖޭގައި ދިވެހި ރައްޔިތުންނެކޭ އެއްފަދައިން އިންޑިޔާ ސިފައިން ހަރަކާތްތެރިވެ އުޅޭކަމަށް ގާސިމް ވަނީ ވިދާޅުވެފައެވެ.

"އޭގެ މިސާލެއް ދަންނަވާލާނަން. އަޅުގަނޑުމެން ގައުމުގައި ކިތައް ހިސާބުގައި އަޅުގަނޑުމެންގެ ސިފައިންނަށް، ފުލުހުންނަށް ވަދެ ޗެކް ނުކުރެވޭ ތަންތަން ހުރީ ކިތައް ތަނުގައިތޯ އަޅުގަނޑުމެން ބަލައިލަމާތޯ؟"

ގާސިމް އިބްރާހިމް

ގާސިމް ވިދާޅުވީ ދާދިފަހުން ރިޔާސީ ކެންޕެއިނަށް ހަނިމާދޫއަށް ވަޑައިގެން އެރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ދިޔަ ވަގުތު، އެ ސަރަހައްދުގައި ދިވެހި ފުލުހުންނާއި ސިފައިން ފިޔަވާ އިތުރު ބަޔަކު ހަމަ އެގޮތަށް ބައިބަޔަށް އެނބުރޭތަން ފެނުނު ކަމަށާއި، އެމީހުންނަކީ އިންޑިއާ ސިފައިން ކަމަށް ބައެއް މީހުން ބުނާ ކަމަށެވެ. އަދި އެމީހުން އެމީހުން ހަރަކާތްތެރިވަމުންދިޔައީ ގާސިމްގެ ސަލާމަތާއި ރައްކާތެރިކަމަށް ބުނި ކަމަށާ، ނަމަވެސް ދިވެހި ފުލުހުންނާއި ސިފައިން ތިއްްބާ އިންޑިއާ ސިފައިން އެކަން ކުރަންވީ ސަބަބެއް ނުވިސްނޭ ކަމަށް އޭނާ ވިދާޅުވި އެވެ.

ޤާސިމް ވިދާޅުވީ ވަކި ބޭފުޅަކު ވެރިކަމަށް ގެނައުމަށް އަވައްޓެރި ވަކި ގައުމަކުން ވަރަށް ބޮޑަށް ވިސްނުން ގެންގުޅޭކަމަށެވެ. އަދި އެކަންކަމުގެ ފަހަތުގައި ފޮރުވިފައިވާ ކަންތައްތަކެއް ހުރިކަން ހާމަވާ ކަމަށްވެސް ވިދާޅުވިއެވެ.

މީގެ އިތުރުން ގާސިމް ވިދާޅުވީ ފާއިތުވެދިޔަ ތިން ހަތަރު އަހަރުތެރޭ 3 ބިލިޔަނަށްވުރެ ގިނަ ޑޮލަރުގެ ފައިސާ ލޯނުގެ ގޮތުގައި ނަގާފައިވާކަމަށާ، އެ ފައިސާ ދައްކަން ޖެހެނީ ކިތައް އަހަރުން ކަމެއްވެސް ސަރުކާރަށް ނޭގޭ ކަމަށެވެ.

"މިއަދުގެ ދުނިޔޭގައި އެއްގޮތަކަށްވެސް ހަނގުރާމަވެރިން ނާންނާނެ ޤައުމު ހިފާން ހަނގުރާމަ ކުރާކަށް. އަދި އަމުދުން މިކަހަލަ ކުދިކުދި ޖަޒީރާ ޤައުމުތައް. އެހެންކަހަލަ އުކުޅުތައް ބޭނުންކޮށްގެން ފައިސާގެ ދަހިވެތިކަން ދީ ދަރަނިވެރިކޮށްގެން ތަންތަން ހިފަމުންދާނީ."

ގާސިމް އިބްރާހިމް

މިއާއެކު ގާސިމް ވަނީ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހަށް ދެވަނަ ދައުރަކަށް އިންތިހާބުކޮށްގެން، ދިވެހިރާއްޖެ ބަޔަކަށް ދަރަނިވެރި އަޅުވެތިވެގެން ދާނެކަން ފާހަގަކުރައްވައި އެކަން އެގޮތަށް ވާން ދިވެހިން ބޭނުންވޭތޯ ސުވާލު ކުރައްވާފައެވެ.