ފުލުހުންނަށް މަރުގެ އިންޒާރު ދިން މީހާ ދޫކޮށްލައިފި!
މާފަންނު ޕޮލިސް ސްޓޭޝަން ކައިރިއަށް ގުރޫޕަކުން އެއްވެ ފުލުހަކަށް މަރުގެ އިންޒާރު ދިން މައްސަލާގައި ހައްޔަރުކުރި މީހާ, އިއްޔެ ކުރިމިނަލް ކޯޓުން ދޫކޮށްލައިފި އެވެ.
މައުލޫމާތު ލިބިފައިވާ ގޮތުގައި ކްރިމިނަލް ކޯޓުގެ އިސް ގާޒީ އަހްމަދު ޝަކީލް ދޫކޮށްލި އެ މީހަކީ 31 އަހަރުގެ މީހެކެވެ. އޭނާ ހައްޔަރުކޮށް ބަންދާ މެދު ގޮތެއް ނިންމަން ކޯޓަށް ގެންދިޔައީ އިންޒާރުދީ، ބިރު ދެއްކުމުގެ ތުހުމަތުގައެވެ.
ނަމަވެސް, އިއްޔެ ކުރިމިނަލް ކޯޓަށް އޭނާގެ ބަންދު ޖަހަން ގެންދިޔުމުން ކަނޑައަޅާފައިވަނީ އޭނާގެ ހައްޔަރު ގޯސް ކަމަށެވެ. އެގޮތުން, އިއްޔެ އޭނާ ބަންދުން ދޫކޮށްލުމަށް ކޯޓުން ނެރުނު އަމުރުގައިވާ ގޮތުން, އެމީހާ ހައްޔަރުކޮށްފައިވަނީ ކުށުގެ ވެށިންނެއް ނޫނެވެ. އަދި, އޭނާ ހައްޔަރުކޮށްފައިވަނީ ވެސް ކޯޓު އަމުރެއް ނެތި އެވެ. ޖިނާއީ އިޖުރާއަތުގެ ގާނޫނުގައިވާ ގޮތުން, ކޯޓު އަމުރެއް ނެތި މީހަކު ހައްޔަރުކުރެވޭނީ ހަމައެކަނި ކުށުގެ ވެށިންނެވެ.
އެހެންކަމުން، އޭނާ ހައްޔަރުކޮށްފައިވަނީ އިޖުރާއަތާ އެއްގޮތަށް ކަމަށް ކަނޑައަޅެން ނެތުމުން, ކުރިމިނަލް ކޯޓުން ނިންމީ ބަންދު ނުޖަހައި, ދޫކޮށްލާށެވެ.
މައުލޫމާތު ލިބިފައިވާ ގޮތުގައި، ޕޮލިސް ސްޓޭޝަނަށް ވަދެ, އެމީހާ އެތަނުގައި ތިބި ފުލުހުންނަށް އިންޒާރު ދިނީ އެ ސްޓޭޝަން ކައިރީގައި ހުންނަ އީގަލްސް ދަނޑު ކައިރީގައި ވައްކަމުގެ ތުހުމަތުވާ މީހަކު ހައްޔަރުކުރަން ފުލުހުން މަސައްކަތް ކުރަމުން ދަނިކޮށެވެ.
ވައްކަމުގެ ތުހުމަތުވާ މީހާ ހައްޔަރުކުރުމުގެ މަސައްކަތް ކުރަނިކޮށް, އެމީހާ އައިސް އިންޒާރު ދިނުމާއެކު, އޭނާ ވެސް އެ ސަރަހައްދުން ހުއްޓުވައި, ހައްޔަރުކުރި އެވެ.
އެ މައްސަލައިގައި އެ ދުވަހު ޕޮލިސް ކޮމިޝަނަރު ވިދާޅުވީ ފުލުހުންގެ އިދާރާއަށްވަދެ ކޮންސްޓަބަލްއަކަށް މަރުގެ އިންޒާރުދީފައިވާތީ މީހަކު ހައްޔަރުކޮށްފައިވާ ކަމަށެވެ. އަދި އެ އަމަލު ހިންގި މީހުންނަށް ފިޔަވަޅު އަޅާނެ ކަމުގެ އިންޒާރުވެސް ކޮމިޝަނަރ ވަނީ ދެއްވާފައެވެ.
"ޖަމާއަތް ހަދައި ކުށްކުރުމާއި އާންމު އިޖުތިމާއީ މިންގަނޑުތަކާއި ހިލާފު އަމަލުތައް ހިންގާ އަދި ރައްޔިތުންގެ ހިތްތަކަށް ބިރުވެރިކަން ވަންނަ ގޮތަށް ހަރަކާތްތެރިވާ ގުރޫޕުތަކާ ދެކޮޅަށް ފިޔަވަޅު އަޅާނަން،" ސީޕީ ހަމީދު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
