އަންނަ އަހަރު ސަޕްލިމެންޓްރީ ބަޖެޓެއް ހުށައެޅުމަށް މަރުކަޒީ ބޭންކު ދެކޮޅު
2023 ވަނަ އަަހަރަށް ކަނޑައަޅާ ދައުލަތުގެ ބަޖެޓާއެކު ސަޕްލިމެންޓްރީ ބަޖެޓެއް ހުށައެޅުމަކީ މައުކަޒީ ބޭންކު (އެމްއެމްއޭ) އިން ރުހޭކަމެއް ނޫންކަން ހާމަކުރައްވައިފިއެވެ.
ސަރުކާރުން ދަނީ އަންނަ އަހަރަށް ހުށަހަޅާ 40.5 ބިލިއަން ރުފިޔާގެ ބަޖެޓާއެކު ސަޕްލިމެންޓްރީ ބަޖެޓެއް ވެސް މަޖިލީހަށް ފޮނުވަން ތައްޔާރު ވަމުންނެވެ. ސަޕްލިމެންޓްރީ ބަޖެޓު ހުށަހަޅާ ސަބަބެއް ކަމަށް ފިނޭންސުން ނެރުނު ފިސްކަލް ސްޓްރެޓެޖީ އަންގައިދޭ ބަޔާން 2023 - 2025 ގައިވާ ގޮތުން، އަންނަ އަހަރު ހަރަދު ހުންނާނީ 39.7 ބިލިއަން ރުފިޔާގަ އެވެ.
އެހެންކަމުން މިއީ ކުރިން އަންދާޒާކުރި ހަރަދަށްވުރެ 16.5 ޕަސެންޓް އިތުރުވުމެއް ކަމަށް ބުނެފައިވެ އެވެ.
އެހެން ނަމަވެސް އަންނަ އަހަރު ދުނިޔޭގެ ބާޒާރުގައި ތަކެތީގެ އަގު އެއް އެއްވަރެއްގައި ހިފެހެއްޓި، ބަޖެޓުގެ ސިޔާސަތުތައް ހަރުދަނާކޮށް ތަންފީޒު ކޮށްފިނަމަ ސަޕްލިމެންޓްރީ ބަޖެޓެއް ބޭނުން ނުވާނެ ކަމަށް އެމްއެމްއޭއިން ވަނީ ބުނެފައެވެ.
އެމްއެމްއޭއިން މިފަދައިން ބުނެފައިވަނީ ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑާ) ކުރެއްވި ސުވާލަކަށް ލިޔުމުން ޖަވާބުދެއްވަމުންނެވެ.
ސަރުކާރުން ސަޕްލިމެންޓްރީ ބަޖެޓެއް ހުށަޅައިފިނަމަ މިއީ މި ސަރުކާރުން ހުށަހަޅާ ތިންވަނަ ސަޕްލިމެންޓްރީ ބަޖެޓެކެވެ. ރައީސް އިބްރާހީމް މުހައްމަދު ސޯލިހް ސަރުކާރުން 2019 ވަނަ އަހަރު 1.7 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހެޅި އެވެ. އަދި 2021 ވަނަ އަހަރަށް ފާސްކޮށްދިން ބަޖެޓަށްވުރެ އިތުރު ވެގެން ދެ ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހެޅި އެވެ.
އެމްއެމްއޭއިން ބުނީ ސަޕްލިމެންޓްރީ ބަޖެޓެއް ހުށައަޅަން ޖެހޭ ސަބަބުތަކަށް ބަލާއިރު، ދުނިޔޭގެ އިގްތިސޯދަށް ކުރިމަތިވާ ހީނަރުކަމުގެ ސަބަބުން ތަކެތީގެ އަގުތައް އުފުލި ސަރުކާރުން ރައްޔިތުންނަށް ފޯރުކޮށްދޭ ހިދުމަތް ފޯރު ކޮށްދިނުމަށް ކުރިން އަންދާޒާ ކުރި ވަރަށްވުރެ އިތުރަށް ހަރަދު ކުރަން ޖެހުން ހިމެނެ އެވެ. އަދި ސަރުކާރުގެ ހަރަދު ހަމަޖެއްސުމާއި އާމްދަނީ ހޯދުމަށް ގެންނަން ޖެހޭ ގާނޫނުތައް ލަސްވުމާއި ތަންފީޒު ކުރަން ޖެހޭ ތަންފީޒު ނުވުން ފަދަ ސަބަބުތައް ހިމެނޭކަމަށެވެ.
އެހެންނަމަވެސް، އަންނަ އަހަރުގެ ބަޖެޓު އެކުލަވާލުމުގައި ފާއިތުވެދިޔަ އަހަރުތަކުގައި ބަޖެޓަށް ކުރެވުނު އާމްދަނީ އާއި ހަރަދާއި ފައިނޭންސިންގެ މައްޗަށް ރިއާޔަތްކޮށް ފާސް ކުރަން ޖެހޭ ގާނޫނުތަކާއި ތަންފީޒު ކުރަން ޖެހޭ ގާނޫނުތައް ހަރުދަނާކޮށް ތަންފީޒު ކުރެވިއްޖެނަމަ ސަޕްލިމެންޓްރީ ބަޖެޓެއް ހުށަނާޅައި އަންނަ އަހަރުގެ ހަރަދުތައް ހަމަޖެއްސޭނެކަމަށް އެމްއެމްއޭއިން ވަނީ ބުނެފައެވެ.
ވަކިން ހާއްސަކޮށް 2018 ވަނަ އަހަރަކީ ވެސް ރިޔާސީ އިންތިހާބު އޮތް އަހަރަކަށްވެފައި އެ ފަހަރު ސަރުކާރުން ސަޕްލިމެންޓްރީ ބަޖެޓެއް ހުށަހަޅާފައި ނެތްކަން މަރުކަޒީ ބޭންކުން ވަނީ ފާސްކޮށްފައެވެ.
ސަރުކާރުން ސަޕްލިމެންޓްރީ ބަޖެޓެއް ހުށަޅައިފިނަމަ މިއީ މި ސަރުކާރުން ހުށަހަޅާ ތިންވަނަ ސަޕްލިމެންޓްރީ ބަޖެޓެކެވެ. ރައީސް އިބްރާހީމް މުހައްމަދު ސޯލިހް ސަރުކާރުން 2019 ވަނަ އަހަރު 1.7 ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހެޅި އެވެ.
އަދި 2021 ވަނަ އަހަރަށް ފާސްކޮށްދިން ބަޖެޓަށްވުރެ އިތުރު ވެގެން ދެ ބިލިއަން ރުފިޔާގެ ސަޕްލިމެންޓްރީ ބަޖެޓެއް ހުށަހެޅި އެވެ.
އެއާއެކު މިއަންނަ އަހަރުގެ ބަޖެޓާއެކު ހުށައެޅުމަށް މަސައްކަތް ކުރަނީ މި ސަރުކާރުގެ 3 ވަނަ ސަޕްލިމަންޓްރީ ބަޖެޓުކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
