ނުކުޅެދޭ ކުއްޖަކު ރޭޕްކުރި ޅިޔަނަށް 18 އަަހަރުގެ ޖަލު ހުކުމެއް!

ނުކުޅެދުންތެރިކަން ހުންނަ އަންހެން ކުއްޖެއް ރޭޕްކުރުމުގެ ސަބަބުން އެކުއްޖާ ބަލިވެއިން މައްސަލައާ ގުޅިގެން ހައްޔަރު ކުރި އެ އަންހެން ކުއްޖާގެ ޅިޔަނު، 18 އަހަރަށް ޖަލަށް ލާން ހުކުމްކޮށްފި އެވެ.

ނުކުޅެދުންތެރިކަން ހުންނަ އުމުރުން 15 އަހަރުގެ އަންހެން ކުއްޖަކު ރޭޕްކުރުމުގެ ސަބަބުން އެ ކުއްޖާ ބަލިވެ އިން މައްސަލާގައި އެކުއްޖާގެ ޅިޔަނު ފ. ފީއަލީ/ފީރޯޒްގެ، އިބްރާހިމް ޝާފިއު (37އ) ފުލުހުން ހައްޔަރުކުރީ 2020 ވަނަ އަަހަރުގެ ޖުލައި ދެވަނަ ދުވަހުއެވެ.

އަދި ޖެންޑާރ މިނިސްޓްރީން ވަނީ ރޭޕް ކުރުމުގެ ސަބަބުން ބަނޑުބޮޑުވި ކުއްޖާ ދައުލަތަށް ނަގައި ޑޮކްޓަރުންގެ ލަފާއާއި އެއްގޮތަށް އޭނާގެ ބަނޑުގައި އޮތް ދަރިފުޅުވެސް ވަނީ އެބޯޓްކޮށްފައެވެ. ނަމަވެސް ފަހުން އެ ކުއްޖާ ވަނީ އާއިލާއާ ހަވާލު ކޮށްފަ އެވެ.

މި މައްސަލާގައި ޝާފިއުގެ މައްޗަށް ދައުލަތުން ދައުވާ ކުރީ އިތުބާރު ކުރެވޭ މަގާމެއްގައި ހުރެ ކުޑަ ކުއްޖަކާއި މެދު ޖިންސީ އަމަލެއް ހިންގުމުގެ ކުށުގެ ދައުވާއެވެ.

އެ މައްސަލަ ބެލުމަށް ފަހު ކްރިމިނަލް ކޯޓުން ނިންމީ އޭނާ 18 އަހަރަށް ޖަލަށް ލާށެވެ. ނަމަވެސް އޭނާ ޖަލުގައި ހޭދަކުރި ދުވަހަށް ރިއާޔަތްކުރުމަށް ފަހު 15 އަހަރާއި އަށް މަހާއި 11 ދުވަހަށް ޖަލަށް ލާން ހުކުމް ކޮށްފައި ވެއެވެ.

ޝާފިއު ރޭޕް ކުރި ކުއްޖާ އަކީ ވަރަށް ބޮޑަށް އޯޓިޒަމް ހުންނަ ކުއްޖެއް ކަމަށް މައުލޫމާތު ލިބެއެވެ. މެދު ރާއްޖެތެރޭގެ ރަށެއްގައި ދިރިއުޅޭ އެ ކުއްޖާ ބަނޑުބޮޑުކަން އެނގުނީ މައްސަރުގެ ކަންތައް ނުޖެހި 3-4 މަސް ވުމުން ޑޮކްޓަރަށް ދެއްކުމުންނެވެ. އާއިލާގެ އެދުމުގެ މަތިން ޓެސްޓު ހަދައި ބެލިއިރު އެ ކުއްޖާގެ ބަނޑަށް ވަނީ ތިން މަސްވެފައެވެ.