ޖަމިއްޔަތުއްސަލަފުން ކުޅުދުއްފުށީގައި ކުރިއަށް ގެންދިޔަ ނަމާދު ވޯކްޝޮޕް ނިންމާލައިފި

ޖަމިއްޔަތުއްސަލަފާއި ހދ. ކުޅުދުއްފުށީ ހިރަފުސް ޖަމިއްޔާއާއި ގުޅިގެން އެރަށުގައި ކުރިއަށް ގެންދިޔަ ނަމާދު ވޯކްޝޮޕް ކާމިޔާބު ކަމާއިއެކު ނިންމާލައިފިއެވެ.

އުމުރުން 8 އަހަރާއި 12 އަހަރުގެ ދެޖިންސުގެ ކުދިންނަށް ހުޅުވާލައިގެން ހިލޭ ކުރިއަށް ގެންދިޔަ މި ވޯރކްޝޮޕް ކުރިއަށް ގެންގޮސްފައިވަނީ މިމަހު 17 ވަނަ ދުވަހުން 19 ވަނަ ދުވަހާއި ހަމައަށެވެ. މި ވޯކްޝޮޕްގައި ދަރިވަރުންނަށް ކިޔަވައިދެއްވީ އައްޝައިޚް މުޖުތަބާ ހަމީދާއި، އައްޝައިޚް ޝިހާމް މުހައްމަދެވެ.

ޖުމުލަ 227 ކުދިން ބައިވެރިވެގެން ކުރިއަށް ގެންދިޔަ މި ވޯކްޝޮޕް ގެ ތެރެއިން ފަރުޟު ނަމާދުތައް އެންމެ ފުރިހަމައަށް ކުރާނެ ގޮތުގެ އިތުރުން ސުންނަތް ނަމާދުތަކާއި ކަށުނަމާދު ކުރާނެ ގޮތްވެސް ކުދިންނަށް ވަނީ ދަސްކޮށްދީފައެެވެ.

ނަމާދުކުރާނޭ ގޮތް ކުދިންނަށް ކިޔައި ދިނުމުގެ އިތުރުން ދީނީ ހޭލުންތެރިކަން އިތުރު ކުރުމަށް ކުދިންނާއި އެކުދިންގެ ބެލެނިވެރިންނަށް މި ވޯކްޝޮޕް ގެ ތެރެއިން ވަނީ މައުލޫމާތު ދީފައެވެ. އެގޮތުން، މި ވޯކްޝޮޕް ގައި ބައިވެރިވި ދަރިވަރުންގެ ބެލެނިވެރިންނަށްވެސް ދަރިން ތަރުބިއްޔަތު ކުރުމާއި ގުޅޭ ގޮތުން މައުލޫމާތު ދިނުމާއި، ޚާއްސަކޮށް އިންޓަރނެޓަށް އެކުދިން ހުޅުވާލެވޭއިރު ސަމާލުވާންޖެހޭ ކަންކަމާއި ގުޅޭގޮތުން ހޭލުންތެރިކުރުމުށް ސެޝަނެއް ވަނީ ކުރިއަށް ގެންގޮސްފައެވެ.

މި ނަމާދު ވޯކްޝޮޕާއި ގުޅޭގޮތުން 'ވޮއިސް'އަށް މައުލޫމާތު ދެއްވަމުން ހިރަފުސް ޖަމިއްޔާގެ ރައީސް މުހައްމަދު ހަސަން ވިދާޅުވީ، މިފަދަ މި ވޯކްޝޮޕްގެ ޒަރީޢާއިން ދަރިވަރުންނާއި ބެލެނިވެރިންނަށް މުހިންމު މައުލޫމާތު ތަކެއް ލިބިގެން ގޮސްފައިވާ ކަމަށެވެ. އަދި އެ ވޯކްޝޮޕާއި މެދު ބެލެނިވެރިންވެސް ވަރަށް ހިތްހަމަޖެހޭ ކަން ފާހަގަކުރައްވައި އޭނާ އިތުރަށް ވިދާޅުވީ، އެފަދަ އިތުރު ވޯކްޝޮޕްތައް ދަރުވަރުންނާއި ބެލެނިވެރިންވެސް ކުރިއަށް ގެންދިޔުމަށްވެސް ބެލެނިވެރިން އެދެމުން އަންނަ ކަމަށެވެ.