ފޮރިން މިނިސްޓަރު ޝާހިދުގެ އިސްތިއުފާއަށް ގޮވާ ގެކޮޅު ކުރިމަތީ އިދިކޮޅުން މުޒާހަރާކޮށްފި
ފޮރިން މިނިސްޓަރު ޝާހިދުގެ ގެކޮޅު ކުރިމައްޗަށް އެއްވެ، އޭނާގެ އިސްތިއުފާއަށް ގޮވާލާ އިދިކޮޅުން މުޒާހަރާކޮށްފިއެވެ.
ރޭ އިދިކޮޅުން މި މުޒާހަރާ ފަށާފައިވަނީ 9:00 ހާއިރުގައެވެ. އިދިކޮޅުގެ މުޒާހަރާ ފެށިއިރުވެސް އެ ސަހަރައްދުގައި ފުލުހުން ދިޔައީ ހަރަކާތްތެރިވަމުންނެވެ. އަދި މުޒާހަރާ ފެށިތާ ކުޑަ ވަގުތުކޮޅެއްގެ ތެރޭގައި ފުލުހުން ވަނީ މުޒާހަރާގެ ބައިވެރިން ފަހަތައް ޖައްސާ މުޒާހަރާ ރޫޅާލާފައެވެ.
މުޒާހަރާގެ ތެރެއިން އެކަކު ހައްޔަރުވެސް ކޮށްފައިވެ އެވެ. އެހެން ނަމަވެސް، ރޭގެ ވަގުތެއްގައި ހައްޔަރު ކުރި މީހާ ވަނީ ދޫކޮށްލާފައެވެ.
އިދިކޮޅުން ރޭ ޝާހިދުގެ އިސްތިއުފާއަށް ގޮވާލާ އޭނާގެ ގެކޮޅު ކައިރިއަށް އެއްވީ، ޝާހިދަކީ މި ސަރުކާރުން ހިންގާ ޖަރީމާތަކުގައި ފުރިހަމަޔަށް ބައިވެރިވާ ވަޒީރަކަށް ވާތީކަމަށް އިހުތިޖާޖުގެ ބައިވެރިން ވަނީ ބުނެފައެވެ. އަދި ޝާހިދަކީ މި ސަރުކާރުގެ ތެރެއިން ނުހައްގުން އެންމެ ގިނަ މާލީ މަންފާ ހޯދާ އެއް ވަޒީރުކަންވެސް އިހުތިޖާޖުގެ ބައިވެރިން ފާހަގަކުރިއެވެ.
ޝާހިދުގެ އިސްތިއުފާއަށް އިދިކޮޅުން ގޮވާލާފައިވާއިރު، ރޭގެ މުޒާހަރާގައި އިދިކޮޅުން ވަނީ ޑިފެންސް މިނިސްޓަރު މާރިޔާ ދީދީ އަދި ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުގެ އިސްތިއުފާއަށްވެސް ގޮވާލާފައެވެ.
މުޒާހަރާއަށް ޖާގަ ނުދީ ކުޑަ ވަގުތުކޮޅެއްގެ ތެރޭގައި ރޭގެ މުޒާހަރާ ފުލުހުން ރޫޅާލާފައި ވީ ނަމަވެސް، ސިލްސިލާގޮތެއްގައި މިފަދަ މުޒާހަރާތައް ކުރިއަށް ގެންދާނެކަމަށް އިދިކޮޅުން ވަނީ ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
