މި ސަރުކާރުގެ ބޭނުމަކީ ރައީސް ޔާމީން ސިޔާސީ މައިދާނުން ގެއްލުވާލުން: އިދިކޮޅު

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުގެ ބޭނުމަކީ ކުރީގެ ރައީސް އަދި އިދިކޮޅު ކޯލިޝަންގެ ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް ސިޔާސީ މައިދާނުން ގެއްލުވާލުން ކަމަށް އިދިކޮޅުން ބުނެފިއެވެ.

އިދިކޮޅުން ފަށާފައިވާ ރިޔާސީ އިންތިހާބުގެ ކެންޕެއިނަށް ކ. އަތޮޅަށް ކުރާ ދަތުރު ފަށަމުން ނޫސްވެރިންނާއި ބައްދަލުކުރައްވައި ވާހަކަ ދައްކަވަމުން ޕީޕީއެމްގެ ނައިބު ރައީސް އަހްމަދު ޝިޔާމް ވިދާޅުވީ، އިދިކޮޅު ގެ މި ދަތުރަކީ އަދުގެ ސަރުކާރުން ރައްޔިތުންނަށް ޖައްސާފައިވާ ހާލު ހާމަކޮށްދެއްވުމަށް ކުރާ ދަތުރެއް ކަމަށެވެ.

"ތަކެތީގެ އަގު ބޮޑު ވެއްޖެ. ގައުމު އަނެއްހެން ދަންނަވާލާނަމަ، މަގުމަތީގައި އަޅުގަނޑުމެންނަށް އިވޭ ބަހުންނަމަ " ދަވާލައިފި". ރައްޔިތުން ފެލާލައިފި. އެހެންވީމާ ރައްޔިތުންނާ ހިސާބަށް އަޅުގަނޑުމެން މިދަނީ މި ސަރުކާރުން ރައްޔިތުންނަށް ޖައްސާފައިވާ ހާލަތު ބުނެދޭންވެގެން." ޝިޔާމް ވިދާޅުވި އެވެ.

މީގެ އިތުރުން، އަދުގެ ރައްޔިތުންގެ ހާލަތު ބަދަލުކުރުމަށް އިދިކޮޅުން ރާވާފައިވާ ކަންކަމާއި، އިދިކޮޅުގެ ކެންޑިޑޭޓް ރައްޔިތުންނަށްޓަކައި ކުރުމަށް ރާވަވާފައިވާ ކަންކަން ރައްޔިތުންނަށް ހާމަކޮށްދިނުންވެސް މި ދަތުރުގެ ތެރެއިން ކުރިއަށްދާނެ ކަމަށް ޝިޔާމް ވިދާޅުވިއެވެ.

މިއާއެކު ޝިޔާމްވަނީ އަދުގެ ސަރުކާރުން ރައީސް ޔާމީން އެއް އިދާރާއިން އަނެއް އިދާރާއަށް ދުއްވައި، އެމަނިކުފާނު ސިޔާސީ މައިދާނުން ގެއްލުވާލުމަށް މަސައްކަތްކުރާ ކަމަށްވެސް ވިދާޅުވެފައެވެ.

"ރައީސް ޔާމީން މި ހުންނެވީ އެއްވެސް ދިމާލަކަށް ވަޑައިނުގެންނެވޭ ހާލަތެއްގައި. އެނގިވަޑައިގަންނަވާނެ ދެއިރު ދެ ދަޅައަށް ކަހަލަ ގޮތަކަށް ކޮންމެވެސް މުއައްސަސާއަކަށް އެމަނިކުފާނު އެބަ ހާޒިރުކުރޭ. މިސަރުކާރު ވެރިކަމަށް އައިއްސުރެ ރައީސް އިބްރާހިމް މުހައްމަދު ޞާލިހު ގެ އެންމެ ބޮޑު މަގުސަދަކަށްވީ، އެމަނިކުފާނު 2018 ގެ ރިޔާސީ އިންތިހާބުގެ ކެމްޕެއިން ގައި އެމަނުކުފާނު ރައްޔިތުންނަށް ވެވަޑައިގެންނެވި ވައުދުތައް ފުއްދުމެއް ނޫން. ރައީސް ޔާމީން ސިޔާސީ ގޮތުން، ސިޔާސީ މައިދާނުން ގެއްލުވާލުން. މައިގަނޑު މަގުސަދަކީ. އަދި އެގޮތަށް މަސައްކަތް ވެސް ކުރަނީ." ޝިޔާމް ވިދާޅުވި އެވެ.

ޝިޔާމް ވިދާޅުވީ، އަދުގެ ސަރުކާރަށް ލިބޭހާ ފައިސާއެއްވެސް ހޭދަކުރަމުން ދަނީ ރައީސް ޔާމީން ސިޔާސީ މައިދާނުން ގެއްލުވާލުމުގެ މަސައްކަތަށް ކަމަށާ، އެކަން ކުރުމަށްޓަކައި ރައީސް ޞާލިހަށް ތާއިދުކުރައްވާ އެންމެނަށް އެމަނުކުފާނު އަންނަނީ ވަޒީފާ ދެމުންކަމަށެވެ.

މީގެ އިތުރުން، ދިވެހިރާއްޖޭގެ އެއްވެސް ސަރަހައްދެއްގައި ބޮޑު މަޝްރޫއެއް ނުހިންގާ ނަމަވެސް ދައުލަތް އެއްކޮށް ފެލާލާފައިވާ ކަމަށްވެސް ޝިޔާމް ވިދާޅުވިއެވެ.

އެހެން ކަމުން، ކ އަތޮޅުގެ ހުރިހާ ރައްޔިތުންނާއި، ރާއްޖޭގެ ހާލަތު ބަދަލު ކުރާން ބޭނުންވާ ހުރިހާ ފަރާތްތަކަށް ވެސް، ޝިޔާމް ވަނީ މިމަހު 23 ވަނަ ދުވަހުގެރޭ 8:30 ގައި ކާނިވަލް ސަރަހައްދުގައި އިދިކޮޅުން ބާއްވާ ފެލާލައިފި ޖަލްސާގައި ބައިވެރިވުމަށް ދައުވަތު އަރުވާފައެވެ.