ފުއްގިރި ހިޔާނާތުގެ މައްސަލައިގެ ޝަރީއަތުން އިސް ގާޒީ ޝަކީލް ތަނާޒުލްވެއްޖެ

މޯލްޑިވްސް މާރކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) މެދުވެރިކޮށް ރ. ފުއްގިރި ދޫކުރުމުގެ މުއާމަލާތާއި ގުޅުވާ ކުރީގެ ރައީސް ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭ މައްސަލައިގެ ޝަރީއަތާ ހަވާލުވެ ހުންނެވި ކްރިމިނަލް ކޯޓުގެ އިސް ގާޒީ އަހުމަދު ޝަކީލް އެ މައްސަލައިން ތަނާޒުލްވެއްޖެ އެވެ.

ގާޒީ ޝަކީލު ފުއްގިރި މައްސަލައިން ތަނާޒުލްވެވަޑައިގެންނެވި ސަބަބެއް ކްރިމިނަލް ކޯޓުން ސާފުކޮށްދީފައި ނުވާއިރު އެ ކޯޓުން ބުނީ ގާޒީ ޝަކީލް ތަނާޒުލްވުމުން އެ މައްސަލައިގެ ޝަރީއަތް ދެން ކުރިޔަށް ގެންދާނީ އެ ކޯޓުގެ ގާޒީ އަލީ ނަދީމް ކަމަށެވެ.

އެމްއެމްޕީއާރުސީ މެދުވެރިކޮށް ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން ރައީސް ޔާމީންގެ މައްޗަށް ދެ ދައުވާއެއް އުފުލާފައިވާއިރު، އެ މައްސަލަ މަދަނީ މިންގަނޑުން ބެލުމަށް ކްރިމިނަލް ކޯޓުން ވަނީ ނިންމާފައެވެ. މިހާރުވެސް އެ މައްސަލަ ކޯޓުގައި އޮތް އިރު މައްސަލައިގެ އަޑުއެހުމެއް ނުބާއްވާތާ އަހަރެއްހާ ދުވަސް ވެއްޖެއެވެ.

މި މައްސަލާގައި ލ ރައީސް ޔާމީންގެ އިތުރުން، މއ.ކުރިކީލަހިޔާ އަހުމަދު ކްރިކް ރިޒާގެ މައްޗަށާއި، ސަން ކޮންސްޓްރަކްޝަން އެންޑް އިންޖިނިއަރިން އަދި ސަން އިންވެސްޓްމަންޓްގެ މައްޗަށްވެސް ދައުލަތުން ދައުވާ ކޮށްފައިވެއެވެ.

ޔާމީންގެ މައްޗަށް އުފުލާފައިވަނީ މަނީ ލޯންޑަރިންގެ ދައުވާ އަދި ރިޝްވަތު ގަބޫލުކުރުމުގެ ދައުވާ އެވެ. ރިޒާގެ މައްޗަށް ކުރަނީ މަނީ ލޯންޑަރިންގެ ދައުވާ އަދި ރިޝްވަތު ހިފުމުގައި މެދުވެރިއަކަށް ވުމުގެ ދައުވާ އެވެ. ސަންގެ ދެ ކުންފުނީގެ މައްޗަށް މަނީ ލޯންޑަރިންގެ ދައުވާ އުފުލާފައިވެ އެވެ.

އަދި އެމްއެމްޕީއާރުސީގެ ޚިޔާނާތައި ގުޅުންހުރި ވ. އާރަށުގެ މައްސަލަ ކްރިމިނަލް ކޯޓުގައި ވަރަށް ބާރަށް ކުރިއަށްދާއިރު އެ މައްސަލަ އޮތީ ހުކުމާ ހަމައަށް ވާސިލްވެފަ އެވެ. މި އަހަރު ނިމުމުގެ ކުރިއަށް ހުކުމް ބޭއްވުމުގެ އަޑުއެހުން ބާއްވާނެ ކަމަށް އެންމެ ފަހުން އަޑުއެހުން އޮތް ދުވަހު އިސް ގާޒީ ވިދާޅުވެފައިވެ އެވެ.

މި ދެ މައްސަލަ ވެސް ބައްލަވަނީ އިސް ގާޒީ އަހުމަދު ޝަކީލެވެ.