ނިއުކާސަލް ކަޓުވާލުމަށްފަހު، ޗެލްސީ ލީގު ކަޕްގެ ސެމީ ފައިނަލަށް

އިގިރޭސި ލީގުކަޕްގެ ކުއާޓާ ފައިނަލުގައި އަންގާރަދުވަހުގެ ރޭ ޕެނަލްޓީގައި ނިއުކާސަލް ޔުނައިޓެޑް ބަލިކޮށް މުބާރާތުގެ ސެމީ ފައިނަލުގެ ޖާގައެއް ޗެލްސީ އިން ހޯދައިފިއެވެ.

ޗެލްސީގެ ސްޓެމްފޯޑް ބްރިޖުގައި ކުޅުނު މިމެޗުގެ 90 މިނެޓްގެ ކުޅުން ނިމުނުއިރު ދެ 1-1 ގެ ނަތީޖާއަކުން އެއްވަރުވެފައި އޮތުމުން ނަތީއްޖާނެރުމަށް ޖެހި ޕެނަލްޓީގައި ޗެލްސީ އިން ކުރިހޯދީ 4-2 ގެ ނަތީޖާއަކުންނެވެ. ޗެލްސީގެ ހަތަރު ޕެނަލްޓީ ވެސް އެޓީމުން ކާމިޔާބުކުރިއިރު، ނިއުކާސަލްގެ ހަތަރު ޕެނަލްޓީގެ ތެރެއިިން އެޓީމަށް ކާމިޔާބު ކުރެވުނީ ދެ ޕެނަލްޓީއެވެ. އެޓީމު ޓްރެޕިއާ ޖެހި ޕެނަލްޓީ ގޯލާއި އަމާޒުނުވެ ބޭރަށް ދިޔައިރު، މެޓް ރިޗީ ކުރިއަށް ފޮނުވާލި ޕެނަލްޓީ ޗެލްސީގެ ކީއްޕަރު ޕެޓްރޮވިޗް ވަނީ ހުޝިޔާރުކަމާއެކު ދިފާއުކޮށްފައެވެ.

މެޗުގެ ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން ޗެލްސީ އިން މެޗު ޑޮމިނޭޓުކުރި އިރު، މިފާހުގައި އެޓީމުން އެންމެ ހުސް ފުރުސަތެއް ލިބުނީ އިގިރޭސި މިޑްފީލްޑަރު ކޯނޯ ގަލެގާރ އަށެވެ.

ފުރަތަަމަ ހާފު 7 ވަނަ މިނެޓުގައި ނިއުކާސަލްގެ ޕެނަލްޓީ އޭރިއާ ތެެރެއިން މުޅިން ހުސްކޮށް ހުރެ ލިބުނު ފުރުސަތުގައި އޭނާ ފޮނުވާލި ހަމަލާ އަމާޒުވީ ގޯލުގެ ހުރަސް ދަނޑިއަށެވެ. ނަމަވެސް އޭގެ 9 މިނެޓް ފަހުން ޗެލްސީގެ ފަހަތުން ހެދުނު ގޯހެއްގެ ފައިދާ ނިއުކާސަލް ޔުނައިޓެޑުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ތަޖުރިބާކާރު ފޯވާޑް ވިލްސަން އެވެ.

ނިއުކާސަލްގެ ލަނޑަށްފަހު ޗެލްސީ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުގެ ފޯވާޑް ރަހީމް ސްޓާލިން ގެ އިތުރުން  އާމަންޑޯ ބްރޯޖާ އަށް ވަނީ ލަނޑުޖަހާނެ ރަގަޅު ހުސް ފުރުސަތުތަކެއް ލިބި ބޭނުން ނުކުރެވިފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން ނިއުކާސަލް ޔުނައިޓެޑް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޗެލްސީގެ މުޅި ޓީމު ކުރިއަށް ޖެހިގެން ކުޅެމުންދިޔަ އިރު، މިހާފުގައި މެޗުގެ ނަތީޖާ އެއްވަރުކުރުމަށް އެޓީމުގެ ފޯވާޑް ނިކޮލަސް ޖެކްސަންގެ އިތުރުން ރަހީމް ސްޓާލިން އަށް ލިބުނު ފުރުސަތުތަކުގެ ބޭނުން ކުރެވޭގޮތެއް ނުވިއެވެ. އަދި މިހާފުގައި ނިއުކާސަލްގެ ފަރާތުން ފެނިގެންދިޔައީ ވަރަށް ޑިފެންސިވް ކުޅުމެކެވެ.

ޗެލްސީ އިން މެޗުގެ ނަތީޖާ އެއްވަރުކުރި ލަނޑު ފަހުހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ޔުކުރެއިން ފޯވާޑް މުޑްރިކް އެވެ. މިއީ ނިއުކާސަލްގެ ޑިފެންޑަރު ޓްރެޕިއާ އަށް ހެދުނު ގޯހެއްގެ ފައިދާ ނަގައި އޭނާ ކަމިޔާބުކުރި ލަނޑެކެވެ. މިލަނޑާއެކު މެޗުގެ ފުރިހަމަ ވަގުތުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މިމުބާރާތުގެ ކުއާޓާ ފައިނަލުގައި މިރޭ ފުލަމް އާއި އެވަޓަން ވާދަކުރި މެޗު 1-1 ގެ ނަތީޖާއަކުން އެއްވަރުވެ ޕެނަލްޓީގައި 2-1 ގެ ނަތީޖާއަކުން މޮޅުވެ، ސެމީގެ ފުރުސަތު ހޯދީ ފުލަމް އިންނެވެ. އަދި މިޑުލްސްބަރާ އާއި ޕޯޓް ވެލް ވާދަކުރި މެޗު 3-0 ގެ ނަތީޖާއަކުން ކާމިޔާބުކޮށް މިޑުލްސްބަރާ އިން ވެސް ވަނީ ސެމީގެ ޖާގައެއް ކަށަވަރުކޮށްފައެވެ.