ފަތުރުވެރިކަމަށް އައު މާކެޓުތައް ހޯދަން ދިރާސާ ފަށައިފިން: އެމްއެމްޕީއާރުސީގެ އެމްޑީ

ދިވެހިރާއްޖޭއަށް ފަތުރުވެރިން ގެނެވޭނެ އައު މާކެޓުތަކެއް ހޯދުމަށް ދިރާސާ މަސައްކަތްތަކެއް ފަށާފައިވާކަމަށް ރާއްޖޭގެ ފަތުރުވެރިކަން ޕްރޮމޯޓު ކުރުމަށް ހަދާފައިވާ ކުންފުނި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ މެނޭޖިންގ ޑިރެކްޓަރު ފާތުމަތު ތައުފީގު ވިދާޅުވެއްޖެ އެވެ.

އޭނާ މިފަދައިން ވިދާޅުވެފައި ވަނީ ރާއްޖެއަށް ޒިޔާރަތްކުރި 1.8 މިލިއަން ވަނަ ފަތުރުވެރިޔާއަށް މަރުހަބާ ކިޔުމަށް ބޭއްވި ޚާއްސަ ހަރަކާތަށްފަހު ނޫސްވެރިންނަށް ދެއްވި އިންޓަވިއުއެއްގަ އެވެ.

އެގޮތުން ރާއްޖޭގެ ފަތުރުވެރިކަމުގެ ސިނާއަތު މިހާރަށްވުރެ ފުޅާކޮށް، ރާއްޖެ އަންނަ ފަތުރުވެރިން އިތުރުކުރުމަށްޓަކައި އައު މާކެޓުތަކެއް ހޯދުމުގެ މަސައްކަތް ކުރައްވާނެކަމަށް ފާތުމަތު ތައުފީގު ވިދާޅުވި އެވެ.

އަދި މިހާރު އެމްއެމްޕީއާރުސީން، އައު މަކެޓުތައް ހޯދުމުގެ ގޮތުން ދިރާސާ މަސައްކަތްތަކެއް ފަށާފައިވާކަމަށް އޭނާ ވަނީ ހާމަކުރައްވާފަ އެވެ.

"އަޅުގަނޑުމެން ޕްލޭންކޮށްފައި މިހުރީ.. ރާއްޖެއަކީ ވަރަށް އެސްޓަބްލިޝްޑް ޑެސްޓިނޭޝަނެއް ޓުއަރިޒަމް ދާއިރާގައި. ދެން ހަމަ އަޅުގަނޑުމެން ރިސާވެއް ހަދަމުން، ރިސާޗު ހެދުމަށް ސްޓްރެޓެޖިކް އެކްޝަން ޕްލޭނެއް ހަދަމުން މިދަނީ ރާއްޖެއަށް އިތުރު މާކެޓުތަކެއް ހޯދަން، އެކްސްޕްލޯ ކުރެވެން ހުރި ދިމަދިމާ ހޯދަން"

އެމްއެމްޕީއާރުސީގެ އެމްޑީ ފާތުމަތު ތައުފީގު

މީގެ އިތުރުން ފާތުމަތު ތައިފީގު ވިދާޅުވީ އެމްއެމްޕީއާރުސީގެ ބްރޭންޑިންއަށް ބަދަލުތަކެއް ގެނެސް، މިހާރަށްވުރެ ބޮޑަށް ރާއްޖެ އިސްތިހާރު ވެގެންދާނެ ގޮތަށް ބްރޭންޑިންއަށް ބަދަލުތަކެއް ގެނައުމަށް ވެސް ވިސްނަވާ ކަމަށެވެ.

ދިވެހިރާއްޖެއަށް އެންމެ ގިނަ ފަތުރުވެރިން އައި ސަރުކާރަށް މި ސަރުކާރު ހެދުމަށް ޓުއަރިޒަމް މިނިސްޓްރީން މަސައްކަތްކުރަމުންދާ ޓުއަރިޒަމް މިނިސްޓަރު ފައިސަލް އިބްރާހީމް ވަނީ ވިދާޅުވެފައެވެ.

އޭގެ އިތުރުން ފަތުރުވެރިކަމުން ލިބޭ އާމްދަނީ 4 ބިލިއަނުން 6 ބިލިއަން ރުފިޔާއަށް އިތުރުކުރުމަކީ ސަރުކާރުގެ އަމާޒުކަމަށާއި އެ އަމާޒު ހާސިލްވާނެކަމުގެ ޔަގީންކަން އޮންނަވާކަމަށް ވެސް މިނިސްޓަރު ވަނީ ވިދާޅުވެފަ އެވެ.