މުސާރަ ބޮޑުކުރަން ކޮމިޓީގައި އެންމެން ވެސް ރުހި ގަބޫލުވި: އެމްޑީޕީ

ރައްޔިތުންގެ މަޖިލީހުން ކަނޑައަޅަންޖެހޭ ދާއިރާތަކުގެ މުސާރަ ބޮޑުކުރީ ކޮމިޓީގައި މަޝްވަރާކުރުމަށްފަހު އެންމެން ވެސް ރުހި ގަބޫލުވެގެން ކަމަށް ރައްޔިތުންގެ މަޖިލީހުގެ މެޖޯރިޓީ ޕާޓީ އެމްޑީޕީން ބުނެފި އެވެ.

ރައްޔިތުންގެ މަޖިލީހުގެ މެންބަރުން ހިމެނޭހެން، މަޖިލީހުން ކަނޑައަޅަންޖެހޭ ދާއިރާތަކުގެ މުސާރަތައް "އިންތިހާއަށް" ބޮޑުކުރުމާއި ގުޅިގެން އެމްޑީޕީއަށް ބޮޑެތި ފާޑުކިޔުންތަކެއް އަމާޒުވާން ފެށުމުން، އެމްޑީޕީގެ ޕާލަމެންޓްރީ ގުރޫޕުން ވަނީ ނޫސްވެރިންގެ ބައްދަލުވުމެއް ބާއްވާ މުސާރަތައް ބޮޑުކުރަން ނިންމި ގޮތުގެ ތަފްސީލު ހާމަކޮށްފަ އެވެ.

އެގޮތުން އެ ބައްދަލުވުމުގައި ވާހަކަފުޅު ދައްކަވަމުން އެމްޑީޕީގެ ޕީޖީ ލީޑަރު އަދި މަޖިލީހުގެ އަލިފުށި ދާއިރާގެ މެންބަރު މުހައްމަދު ރަޝީދު ހުސެއިން (ބިގޭ) ވިދާޅުވީ ރައްޔިތުންގެ މަޖިލީހުން ކަނޑައަޅަންޖެހޭ މުސާރަތައް ބޮޑުކޮށްދިނުމަށް އެދެމުންދާތާ ދުވަސްތަކެއްވެއްޖެ ކަމަށެވެ.

އެގޮތުން ކައުންސިލްތަކާއި އަދުލުއިންސާފުގެ ދާއިރާގައި މަސައްކަތް ކުރައްވާ ބޭފުޅުންނާއި ރައީސް އޮފީހުގެ މަސްލަހަތު އޮންނަ ތަންތަނުގެ މުސާރަ ބޮޑުކޮށްދިނުމަށް އެދި މަޖިލީހަށް ސިޓީ ހުށަހަޅާފައިވާކަން އޭނާ ފާހަގަކުރެއްވި އެވެ. އަދި އޭނާ ވަނީ ކައުންސިލްތަކުގެ ރައީސުން ގުޅިގެން މަޖިލީހުގެ ހުރިހާ މެންބަރުން ހިމެނޭ ވަޓްސްއަޕް ގުރޫޕެއް ހެދުމަށްފަހު މުސާރަ ބޮޑުކޮށްދިނުމަށް އެދިފައިވާކަން ވެސް ހާމަކުރައްވާފަ އެވެ.

"ފަނޑިޔާރުންގެ ޖަމިއްޔާއިން މަޖިލީހަށް ވަޑައިގެން، ސުޕްރީމްކޯޓުގެ ފަނޑިޔާރަކު ވެސް ހިމެނިވަޑައިގަންނަވާ ގޮތަށް، ފާއިތުވެދިޔަ 13 އަހަރު މުސާރައަށް އެއްވެސް ކުރިއެރުމެއް ނައިސް އޮތް ދާއިރާއެއްގެ ގޮތަށް އެބޭފުޅުން ވަރަށް އިންސާފުވެރިކަމާއެކު މަސައްކަތްތައް ގެންދަންޖެހޭ. އެހެން މަސައްކަތްތަކުގައި ނޫޅުއްވޭ ކަމަށްވާތީ، މުސާރައާއި ކުރިއެރުން ގެނެސްދެއްވުމަށްޓަކައި، އަދި ބައްދަލުކުރެއްވުމަށްފަހު ވެސް، ސިޓީތަކުން ވެސް އަޅުގަނޑުމެންނާ ވާހަކަދެކެވިފަ އެބަހުރި. އޭގެ އިތުރުން ކައުންސިލްތަކުން މުސާރަ ބޮޑު ކުރުމަށްޓަކައި އެލްޖީއޭއިން ވަނީ މަޖިލީހަށް ކައުންސިލްތަކުގެ އިހުސާސްތައް ހާމަކޮށް، މުސާރަ ބޮޑުކޮށްދިނުމަށް ބަޖެޓް ދިރާސާކުރާ ކޮމިޓީއަށް ފޮނުވާފައި"

އެމްޑީޕީގެ ޕީޖީ ލީޑަރު މުހައްމަދު ރަޝީދު ހުސެއިން

ބިގޭ އިތުރަށް ވިދާޅުވީ މުސާރަޔައް ބޮޑުކުރީ އެއް ހަމައަކުން، ނުވަތަ އެއް އުސޫލަކަށް ފައްތައިގެން ކަމަށެވެ. އަދި އެގޮތަށް ނިންމީ ހަމައެކަނި އެމްޑީޕީގެ ވިސްނުމަށް ނޫން ކަމަށާއި އެއީ ހުރިހާ އެންމެންގެ ރުހުމާއި ޚިޔާލާއެކު ނިންމި ނިންމުމެއް ކަމަށް އޭނާ ވިދާޅުވި އެވެ.

"މިވަގުތު އެ ކަންކަމާއި ފާޑުވިދާޅުވާ ފަރާތްތައް ހިމެނިވަޑައިގަންނަވާ މާލިއްޔަތު ކޮމެޓީގެ އިއްޒަތްތެރި މެންބަރުން ވެސް މި ދިރާސާ ކުރަމުންދިޔަ ވަގުތު އަޅުގަނޑުމެންނަށް ކޮމިޓީގެ ބޭފުޅުންގެ ފަރާތުން މައުލޫމާތު ލިބޭގޮތުގައި ވަރަށް އެއްބާރުލުން ދެއްވި، އެކަން ކުރުމުގެ ބޭނުމުގައި ވާހަކަ ދައްކަވާފައި ވަނީ. އެކަމަކު ސިޔާސީ ބޭނުމަށްޓަކައި މީޑިއާތަކުގައި ތަފާތު ގޮތްގޮތަށް ވާހަކަ ދެކެވިގެން ދިޔަ ނަމަވެސް މި ކަންކަން މިގޮތަށް ކުރުމަށްޓަކައި އަޅުގަނޑުމެންނާއި ހަމަޔަށް ބަޖެޓު ދިރާސާ ކުރެއްވި ދުވަސްވަރުގައި ވެސް އަދި އެ ނޫންވެސް ގޮތްގޮތުން އައި ހުށަހެޅުންތަކާއި އެއްގޮތަށް މުސާރަތަކަށް މި ގެނައި ކުރިއެރުން ގެންނަން ނިންމާފައި މިވަނީ"

އެމްޑީޕީގެ ޕީޖީ ލީޑަރު މުހައްމަދު ރަޝީދު ހުސެއިން

މަޖިލީހުގެ މެންބަރެއްގެ މުސާރައަކީ މިހާރު 62،500 ރުފިޔާއެވެ. އަދި ކޮމިޓީތަކުގެ ބައްދަލުވުންތަކަށް ވަޑައިގަންނަވާ މެންބަރުންނަށް 20،000 ރުފިޔާގެ އިނާޔަތެއް ލިބެއެވެ.

މަޖިލީހުގެ މާލިއްޔަތު ކޮމިޓީގެ އިއްތިފާގުން ވަނީ، މެންބަރުންގެ މުސާރަ 80،000 ރުފިޔާއަށް ބޮޑުކުރަން ފާސްކޮށްފައެވެ. މި ބަދަލާއެކު މެންބަރުންނަށް ކުރިއެކޭ އެއްގޮތަށް ކޮމިޓީ އެލަވަންސް ވެސް ލިބޭނެ އެވެ.

އެހެންކަމުން ކޮމިޓީ އެލަވަންސަށް ދޭ 20،000 ރުފިޔާ ހިމަނައިގެން މެންބަރެއްގެ މުސާރައިގެ ގޮތުގައި އެއްލައްކަ ރުފިޔާ ޖެހެ އެވެ.

ކޮމިޓީން މުސާރަތައް ބޮޑުކުރަން ނިންމި ނަމަވެސް އެ ނިންމުން ތަންފީޒުކުރަން ފަށާނީ މަޖިލީހުގެ ތަޅުމުން އެ ނިންމުން ފާސްވުމުން ނެވެ.