ރާއްޖެ މިއަދު ބޫޓާނާ ދެކޮޅަށް ނިކުންނަ މެޗަކީ ކުޅިވަރުގެ ތާރީހީ މެޗަކަށްވާނެ

ބައިނަލްއަޤްވާމީ ކުޅިވަރުގެ މުބާރާތަކުން މިހާތަނަށް ދިވެހިންނަށް ހޯދުނު އެންމެ ރަނގަޅު ކާމިޔާބީއަކީ ތައިލެންޑްގައި މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕް އޭ ބުނުމަކުން ދޮގަކަށް ނުވާނެއެވެ. މީގެ ކުރިންވެސް ރާއްޖެއިން ވަނީ ތަފާތު އެކިއެކި ކުޅިވަރުތަކުން ފާހަގަކޮށްލެވޭ ވަނަތައް ހޯދާފައެވެ. މީގެ ތެރޭގައި ޓީމް އިވެންޓްގެ އިތުރުން ވަކިވަކި އެތްލީޓުންގެ ލެވެލްގައި ހޯދި ކާމިޔާބީތައް ފާހަގަކޮށްލެވެއެވެ.

މިހާތަނަށް ރާއްޖެއިން ބައިނަލްއަޤްވާމީ ފެންވަރުގައި ހޯދުނު ކާމިޔާބީތަކަށް ބަލާއިރު ސާފް ފުޓްސަލް ޗެމްޕިއަންޝިޕް ވެގެން ގޮސްފައިވަނީ ރާއްޖޭގެ ކުޅިވަރު ތާރީހުގައިވެސް ވަރަށް ފާހަގަކޮށްލެވޭ މުބާރާތަކަށެވެ. ސަރަހައްދީ ޤައުމުތަކާ ވާދަކޮށް ރާއްޖެއިން މި މުބާރާތުގައި މިހާތަނަށް ވަނީ ފާހަގަކޮށްލެވޭފަދަ ފަހުރުވެރި ކާމިޔާބީތަކެއް ހޯދާފައެވެ. ފުޓްސަލް މުބާރާތުގައި ރާއްޖެ މިހާތަނަށް ކުޅުނު މެޗްތަކުގެ ތެރެއިން އެންމެ މެޗެއް ފިޔަވައި ދެންހުރި މެޗްތައް ކާމިޔާބުކޮށްފައިވަނީ ތަފާތުބޮޑު ނަތީޖާތަކުންނެވެ.

މި މުބާރާތުގައި އެންމެ ފުރަތަމަ ޕާކިސްތާނާ ދެކޮޅަށް ކުޅުނުމެޗް ރާއްޖެއިން ކާމިޔާބުކުރީ 7-1 ގެ ނަތީޖާއަކުންނެވެ. ދެވަނަ މެޗްގައި ބަންގްލަދޭޝްއާ ދެކޮޅަށް ކުޅެ ރާއްޖެ މޮޅުވީ، 6-1 ގެ ނަތީޖާއިންނެވެ. ތިންވަނަ މެޗްގައި ބިލިއަން މީހުންގެ އާބާދީއެއް އޮންނަ ގަދަފަދަ އަދި ވާދަވެރި އިންޑިއާ އަތުން ރާއްޖެ މޮޅުވީ 5-0 ގެ ނަތީޖާއިންނެވެ. އެންމެ ފަހުމެޗްގައި ނޭޕާލް އަތުން ރާއްޖެ މޮޅުވީ 2-1 ގެ ނަތީޖާއިންނެވެ.

މިމެޗްގައި ރާއްޖޭގެ ފުޓްސަލް ޓީމުގެ ފަރާތުން ޓީމެއްގެ ގޮތުގައި ވަރަށް ރަނގަޅު ކުޅުމެއް ފެނިގެންދިޔައިރު، ވަކިވަކި ކުޅުންތެރިންގެ ފަރާތުންވެސް ފެނިގެންދިޔައީ މުބާރާތުގެ އެހެންކުޅުންތެރިންނާ ތަފާތުކަމެވެ. ހާއްދަ ގޮތެއްގައި އަބްދުﷲ ޝާފިއު (ޝާއްޕެ) އަދި ކެޕްޓަން މުޙައްމަދު އިމްރާން ފާހަގަކޮށްލެވެއެވެ. މުބާރާތުގެ ކޮމަންޓޭޓަރުންވެސް ވަނީ ރާއްޖޭގެ ޓީމްގެ ކުޅުންތެރިންގެ ތޫނުފިލިކަން ފާހަގަޮށްފައެވެ. ހާއްސަ ގޮތެއްގައި އިންޑިއާ އާ ދެކޮޅަށް ކުޅުނު މެޗުން ކާމިޔާބު ހޯދިގޮތެވެ.

ސާފް ފުޓްސަލް ޗެމްޕިއަންޝިޕްގައި މިއަދު މުބާރާތުގެ ޗެމްޕިއަންކަން ކަށަވަރުކުރަން ރާއްޖެ ނިކުންނާނީ ބޫޓާނާ ދެކޮޅަށެވެ. މިމެޗުން އެއްވަރުކޮށްލައިގެންވެސް ރާއްޖެއަށް ތަށި ހޯދުމުގެ ފުރުސަތު އެބައޮތެވެ. މުބާރާތުގައި މިއަދު ރާއްޖެ ބޫޓާނާ ދެކޮޅަށް ނިކުންނަ މެޗް ފަށާނީ ރާއްޖެ ގަޑިން މެންދުރުފަހު 15:00 ގައެވެ.

ކޮންމެއަކަސް މިފަހަރުގެ ސާފް ފުޓްސަލް ސާފްޗެމްޕިއަންޝިޕް ރާއްޖެ ހޯދައިފިނަމަ ވެގެންދާނީ ޓީމް އިވެންޓަކުން ތަފާތު ނަތީޖާތަކެއް ނެރެގެން ރާއްޖޭގެ ޤައުމީޓީމެއް ބައިނަލްއަޤްވާމީ މުބާރާތެއްގެ ތަށި ހޯދާނޭ ފުރަތަމަ ފަަހަރަށެވެ.