އިނގިރޭސިވިލާތުގެ ސަފީރުކަމަށް ޖަމީލާ އައްޔަނުކޮށްފި
ލިޔުންތެރިޔާ
ޚަދީޖާ އަރުފާ
އިނގިރޭސިވިލާތަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރުގެ މަޤާމަށް ހ.ވައިޓްޑައިމަންޑް ޖަމީލާ ޢަލީ ޚާލިދު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު ޢައްޔަންކުރައްވައިފިއެވެ.
ޖަމީލާ އައްޔަނުކުރުމުގެ ރަސްމިއްޔާތު ބާއްވާފައިވަނީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ.
މިދިޔަ އެޕްރީލް މަހު އެ މަޤާމުގައި ހުންނެވި އިރުތިޝާމް އާދަމް ފޮރިން މިނިސްޓަރުކަމަށް ބަދަލުކުރެއްވުމާ ގުޅިގެން ސަފީރުގެ މަޤާމު އޮތީ ހުސްވެފައެވެ.
ޖަމީލާ ޢަލީ ޚާލިދަކީ ދައުލަތުގެ ތަފާތު މަޤާމުތައް އަދާކުރައްވާފައިވާ ބޭފުޅެކެވެ. އެ ގޮތުން 2017 ވަނަ އަހަރުން 2019 ވަނަ އަހަރަށް ޖަރުމަނުވިލާތުގައި ހުންނެވި ފުރަތަމަ ދިވެހި ސަފީރުގެ ޒިންމާ އުފުއްލަވައި ދެ ޤައުމުގެ ދެމެދުގައި އޮންނަ ގުޅުން ވަރުގަދަކުރެއްވުމަށް މަސައްކަތްކުރެއްވިއެވެ. ހަމައެހެންމެ ސިވިލް ސާވިސް ކޮމިޝަނުގެ ނައިބު ރައީސްކަމާއި ފޮރިން މިނިސްޓްރީގެ އެމްބެސެޑާ އެޓް ލާޖުގެ މަޤާމުވެސް ފުރުއްވާފައިވެއެވެ. ތަޢުލީމީ ދާއިރާއާއި މީޑިއާގެ ދާއިރާގައިވެސް ގިނަ އަހަރުތަކެއް ވަންދެން ޚިދުމަތްކުރައްވާފައިވެއެވެ.
އިނގިރޭސިވިލާތަކީ ގިނަ ޢަދަދެއްގެ ދިވެހި ދަރިވަރުން މަތީ ތަޢުލީމު ޙާޞިލުކުރަމުން އަންނަ ޤައުމެއް ކަމަށް ވާއިރު ރާއްޖޭގެ ފަތުރުވެރިކަމުގެ ޞިނާޢަތަށްވެސް މުހިންމު މާކެޓެއް ކަމުން އެ ޤައުމުގައި ހުންނަވާ ސަފީރުގެ ދައުރު ވަރަށް ބޮޑެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
