"ވަރަށް ސާފުކޮށް ބުނަން، މާލޭގެ ރައްޔިތުންނަށް ބިންކަނޑާ، އިން ވަކިކޮށް ގޯތި ދޭނީ އަޅުގަނޑު"
މާލޭ ރައްޔިތުންނަށް އިންވަކިކޮށް ގޯތި ދޭނީ އެމަނިކުފާނު ކަމަށް އަނެއްކާވެސް، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
މިރޭ އާޓިފިޝަލް ބީޗް ސަރަހައްދުގައި ބޭއްވި، ރައީސް ޞާލިހު ގެ ޕްރައިމަރީ ކެމްޕެއިން ޖަލްސާގައި ވާހަކަފުޅުދައްކަވަމުން، އެމަނިކުފާނު ވިދާޅުވީ، މާލެ ހަމަ ނޭވާއަށް ފެއްތުމަށް ކުރަންޖެހޭ ހުރިހާ ކަމެއް ކުރައްވާނެ ކަމަށާއި މާލޭގެ ރައްޔިތުންނަށް ބިން ކަނޑާ، އިންވަކިކޮށް، ގޯތި ދެއްވާނީ އެމަނިކުފާނު ކަމަށެވެ.
ކުޑަ ޝައްކެއްވެސް ނުކުރައްވާތި. ކުޑަ ޝައްކެއްވެސް ނުކުރައްވާތި. މާލެ ތޮއްޖެހި، މާލެ މާނޭވާއިން ހަމަ ނޭވާއަަށް ފެއްތުމަށް ކުރަންޖެހޭ ހުރިހާ ކަމެއް އަޅުގަނޑު ކުރާނަން. އަނެއްކާވެސް، އަނެއްކާވެސް ސާފު ބަހުން ދަންނަވަން. މާލޭގެ ރައްޔިތުން ބިންކަނޑާ، އިން ވަކިކޮށް ގޯތި ދޭނީ އަޅުގަނޑު. ދައުރެއްގެ ތެރޭގައި ފުރަތަމަ ފަހަރަށް މާލޭގައި ބިންގަލުން ފަށާ، ނިންމާ ފްލެޓްގެ ތަޅުދަނޑި އަތަށް ދޭނީ އަޅުގަނޑު.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މިއާއެކު ރައީސް ވިދާޅުވީ، ސަރުކާރުން ހުޅުމާލޭގައި އަޅަމުންދާ ފްލެޓްތައް މިއަދު ބައްލަވާލެއްވި ކަމަށާއި އެ ފްލެޓްތަކަކީ ތަފާތު ތަފާތު ފުލެޓް ތަކަކަށް ވާނެކަމަށެވެ. އަދި ކުރިއަށް އޮތް ރިޔާސީ އިންތިހާބަކީ ހުރިހާ ކަމެއް ނިންމާލުމަށް އެމްޑީޕީ އަށް ލިބޭ ފަހު ފުރުސަތު ކަމަށްވެސް ރައީސް ވިދާޅުވި އެވެ.
"މިކުރާ ކަންކަމުން އެއްދަނުގައި އެޖެހެނީ ދެ ބުޅި. އަތޮޅުތަކުގެ ތަރައްގީ ވަށާ ޖެހި އޭގެ ލުއި މާލެއަށް ލިބުން. މާލެ އަކީ ހަމަނޭވާ ލެވޭ ތަނަކަށްވުން. ހާސްކަމުން ނެއްޓި ހަމަޖެހޭ ދިރިއުޅުމެއް މުޅި ރާއްޖެ އަށް ލިބިދިނުން."
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު
މީގެ ކުރިން ވެސް މާލޭގައި ބޭއްވި ޕްރައިމަރީގެ ކެމްޕެއިން ބައްދަލުމުގައި ރައީސް ޞާލިހް ވަނީ މާލޭ ރައްޔިތުންނަށް ހާއްސަކޮށްގެން 7000 ފްލެޓާއި 5000 ގޯތި ދިނުމުގެ މަޝްރޫއު މިހާރުވެސް ކުރިއަށްދާ ކަމަށް ވިދާޅުވެފައެވެ.
އަދި އެމަޝްރޫއުގެ އިވެލުއޭޝަންގެ މަސައްކަތް މިހާރު ޕްލޭނިންގެ މިނިސްޓްރީން ކުރަމުން އަންނަ ކަމަށާ އެމަސައްކަތް ވީހާވެސް ރަނގަޅަށް ކުރާނެކަމަށެވެ. އަދި ފްލެޓާއި ގޯއްޗައް ޝަރުތު ހަމަވާ އެއްވެސް މީހަކު އެކަމުން ބާކީނުކުރާނެކަމަށާއި ޝަރުތު ހަމަވާ އެންމެނަށްވެސް ގޯއްޗާއި ފްލެޓް ދޭނެ ކަމަށްވެސް އެމަނިކުފާނު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
