ފަހަތުން އަރާ ފިއްލަދޫ ބަލިކޮށް ހއ. އަތޮޅު ޗެންޕިއަންކަން އުތީމަށް!

ސޮނީ ސްޕޯޓްސް ގޯލްޑަން ފުޓްސަލް ޗެލެންޖް 2023 ގެ ހއ. އަތޮޅުގެ ފައިނަލުގައި ފިއްލަދޫ އިން ލަނޑެއް ކާމިޔާބުކޮށް ލީޑު ހޯދާފައި ވަނިކޮށް ފަހަތުން އަރާ ދެ ލަނޑު ކާމިޔާބުކޮށް މުބާރާތުގައި އަލަށް ވާދަކުރި އުތީމުން އަތޮޅު ޗެންޕިއަންކަން ހޯދައިފިއެވެ.

ހުޅުމާލޭ ރެހެންދި ފުޓްސަލް ދަނޑުގައި މި ރޭކުޅެވުނު ހއ. އަތޮޅު ފައިނަލުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މި މެޗުގައި ފުރަތަމަ ލަނޑުޖަހައި ލީޑު ހޯދީ ފިއްލަދޫ އިންނެވެ. މި ލަނޑު ފުރަތަމަ ހާފު ނިމެން އުޅެނިކޮށް އެޓީމަށް ކާމިޔާބުކޮށްދިނީ އިހުވާން އެވެ. މި ލަނޑާއި އެކު މެޗުގެ ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީއްޖާއަކުން ފިއްލަދޫ ކުރީގައި އޮވެގެންނެވެ.

މި މުބާރާތުގައި މޮޅު ކުޅުމެއް ދައްކަމުން އަންނަ އުތީމުން ދެވަނަ ހާފު ފެށުމާއި އެކު ލަނޑެއް ކާމިޔާބުކޮށް މެޗުގެ ނަތީއްޖާ އެއްވަރުކުރިއެވެ. މި ލަނޑު އެޓީމަށް ކާމިޔާބުކޮށްދިނީ އައިހަމް އެވެ. އަދި މި މެޗުން އުތީމު މޮޅުވި ލަނޑު މެޗުނިމެން ފަސްވަރަކަށް މިނެޓަށް ވެފައިވަނިކޮށް އެޓީމަށް ކާމިޔާބުކޮށްދިނީ ރިޝްވާން އެވެ.

ފައިނަލް މެޗުގެ މޮޅު ކުޅުންތެރިއާގެ މަޤާމް ލިބުނީ މިރޭގެ މެޗުގައި އުތީމުގެ ފުރަތަމަ ލަނޑު ކާމިޔާބުކޮށްދިން އައިހަމް އަށެވެ. އަދި މުބާރާތުގެ އެންމެ ގިނަ ލަނޑުޖެހި ކުޅުންތެރިއާގެ މަޤާމް ލިބުނީ ވަށަފަރު ޓީމުގެ ސާޖިދު ރަޝީދު އަށެވެ. އޭނާ ވަނީ މުބާރާތުގައި ވަށަފަރު ޓީމަށް ހަ ލަނޑު ކާމިޔާބުކޮށްދީފައެވެ. މުބާރާތުގެ އެންމެ މޮޅު ކުޅުންތެރިޔާއަށް ހޮވުނީ ފިއްލަދޫ ޓީމްގެ ޖޯޒީ ނަމްބަރު 30، މުޙައްމަދު ހުޝާމްއެވެ.