ނަޑެއްލާ ބޯ ފެނަށް ޖެހިފައިވާތާ ދެ ހަފްތާ؛ ފެން ލިބޭނެ އިރެއް ނޭނގެ

ގދ.ނަޑެއްލާއިން ފެން ހުސްވެ އެ ރަށު ރައްޔިތުންނަށް ބޯ ފެން ލިބުމުގައި ދަތިކަން ކުރިމަތިވެފައިވާތާ ދެ ހަފްތާ ވެއްޖެއެވެ.

ނަޑެއްލާ ކައުންސިލްގެ ރައީސް މުހައްމަދު އަންޝައު "ވޮއިސް" އަށް މައުލޫމާތު ދެއްވަމުން ވިދާޅުވީ، ވާރޭ ނުވެހި ގިނަ ދުވަސް ވުމުގެ ސަބަބުން އެ ރަށުގެ ރައްޔިތުން ވަރަށް ބޮޑަށް ބޯ ފެނަށް ޖެހިފައިވާ ކަމަށެވެ.

އެގޮތުން ރައްޔިތުން ދިރިއުޅެމުންދާ ގޭގެއިން ފެން ހުސްވެފައިވާއިރު، އާއްމު ތާނގިން ވެސް މިހާރު ފެން ހުސްވެފައިވާ ކަމަށް އޭނާ ވިދާޅުވި އެވެ. އަދި ރައްޔިތުންނަށް ފެނުގެ ދަތިކަން ކުރިމަތިވެފައިވާކަން ސަރުކާރުގެ ކަމާއި ބެހޭ ފަރާތަށްވެސް އަންގާފައިވާ ކަމަށާ، ސަރުކާރުން މިހާރު އަންނަނީ ފެނަކައާއި ގުޅިގެން އެ މައްސަލަ ހައްލު ކުރުމަށް މަސައްކަތް ކުރަމުން ކަމަށް ބުނެފައިވާ ކަމަށް އަންޝައު ވިދާޅުވިއެވެ.

އަންޝައު އިތުރަށް ވިދާޅުވީ، އެހެން އަހަރުތަކުގައިވެސް އެ ވާރޭ ނުވެހި ގިނަ ދުވަސް ވުމުން ރަށް ފެނަށް ޖެހޭ ކަމަށާ، އެހެން އަހަރު ތަކުގައި ފެނަކައިން ފެން ފޯރުކޮށްދޭ ކަމަށެވެ. އެހެންނަމަވެސް، އެގޮތަށް ފެން ފޯރުކޮށްދިނުމަށް ސަރުކާރާއި ފެނަކަާއި ވެފައިވާ އެއްބަސްވުން ހަމަވެފައިވާތީ އާއި، އެރަށުގައި ފެން ޕްލާންޓް އެއްވެސް ހުންނާތީއާއި އެކު އެކަން އަދިވެސް ހަމަ ޖެހިފައި ނުވާ ކަމަށް އޭނާ ވިދާޅުވި އެވެ.

"އެހެން އަހަރު ތަކުގައި ސަރުކާރުގައި އެދުނީމާ ފެނަކައިން ފެން ފޯރުކޮށްދޭ. އެކަމަކު މިހާރު ފެނަކައާއި ސަރުކާރާއި ވެފައިވާ އެ އެއްބަސްވުމުގެ މުއްދަތު ވެސް ހަމަވެފައިވަނީ. ދެން މިރަށަކީ ފެން ޕްލާންޓެއްވެސް ހުންނަ ރަށެއް. މިހާރު އިންނަ ގޮތުން، ފެން ޕްލާންޓް ހުންނަ ރަށް ރަށަށް އެގޮތަށް ފެން ފޯރުކޮށެއް ނުދޭ. އެކަމަކު މިރަށު ހަދާފައި ހުރި ފެން ޕްލާންޓް އަދި ބޭނުން ކުރާކަށް ނުވެއް ފަށާ. އެހެންވީމާ އެއިންވެސް ފެން ނުލިބޭ." އަންޝައު ވިދާޅުވިއެވެ.

އަންޝައު ވިދާޅުވީ، ފެން ޕްލާންޓް ވެސް މާ ގިނަ ދުވަހެއް ނުވެ ބޭނުން ކުރަން ފަށާނެ ކަމުގެ މައުލޫމާތު ލިބޭ ކަމަށާ، އެހެން ނަމަވެސް އެއީ ކޮން އިރެއް ކަމެއް ނޭނގޭ ކަމަށެވެ. އަދި އެ ރަށަށް ފެން ފޯރުކޮށްދިނުމަށް ސަރުކާރުން މަސައްކަތް ކުރަމުންދާއިރު، ވަރަށް އަވަހަށް ލިބޭނެ ކަމަށް ވެސް ބުނެފައިވާ ކަމަށެވެ. އެހެންނަމަވެސް، އެއީ ކޮންއިރަކު ކަންވެސް އެނގިފައި ނުވާއިރު، ބެލެވޭ ގޮތުގައި މި ހަފްތާގައިވެސް ލިބިދާނެ ކަމަށް އޭނާ ބުނެފައިވެއެވެ.

ފެން ހުސްވެގެން އެ ރަށު ގިނަ ގޭގޭގެ މީހުން މިހާރު ބޭނުން ކުރަމުން އަންނަނީ ގަންނަ ފެން ކަމަށްވެސް އަންޝައު ވިދާޅުވިއެވެ.