ރައީސްގެ މޮޓޯކޭޑަށް އެހާ ފަސޭހަކޮށް ހުރަސް އެޅުނު ކަމީ ބިރުވެރި ކަމެއް: ވަހީދު

ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ މޮޓޯކޭޑަށް އެހާ ފަސޭހަކޮށް ހުރަސް އެޅުނު ކަމީ ބިރުވެރި ކަމެއް ކަމަށް ރައްޔިތުން މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.

ވައްޑެ މިހެން ވިދާޅުވެފައިވަނީ މިކަމަކީ ޕީޕީއެމްއިން ރާވައިގެން ކުރި ކަމެއް ކަމަށް މަރަދޫ ދާއިރާގެ މެމްބަރު އިބްރާހިމް ޝަރީފު ވިދާޅުވެ ކުރެއްވި ޓްވީޓަށް ރައްދު ދެއްވަމުންނެވެ.

އެގޮތުން ވައްޑެ ވަނީ ރައީސުލްޖުމްހޫރިއްޔާ ގެ މޮޓޯކޭޑް އަށް އެހާ ފަސޭހަކޮށް ހުރަސް އެޅުނު ކަމީ އެމަނިކުފާނުގެ ސަލާމަތާ ރައްކާތެރިކަން ބަލަހައްޓާ ފަރާތްތަކާ މެދު ސުވާލު އުފެދޭ ކަމެއް ކަމަށް ފާހަގަކުރައްވާފައެވެ.

ރައީސް ޞާލިހުގެ މޮޓޯކޭޓަށް އިދިކޮޅު މުޒާހަރާގެ ބައިވެރިން ހުރަސްއަޅާފައިވަނީ ބައިނަލްޢަޤްވާމީ އަންހެނުންގެ ދުވަހުގެ ރަސްމީ ޖަލްސާގައި ބައިވެރިވެވަޑައިގަތުަށް ފަހު އަނބުރާ ވަޑައިގެންނެވި މަގުމަތީގައެވެ.

އިދިކޮޅު މުޒާހަރާގެ ބައިވެރިންވަނީ ރައީސް ޞާލިހުގެ ކާރުކޮޅު ކުރިމައްޗަށް އަރާ ރައީސް ޔާމީން މިނިވަންކުރުމަށް ގޮވާލާ އަޑުއުފުލާފަ އެވެ.

އެމަނިކުފާނުގެ މައްޗަށް ކްރިމިނަލް ކޯޓުން ހުރީ "ހަރާން" ހުކުމެއް ކަމަށާއި، އެ ހުކުމް ކުރީ ރައީސް ޞާލިހު އަޑީގައި ހުންނަވާ ނުފޫޒު ފޯރުވައިގެންކަމަށް މުޒާހަރާގެ ބައިވެރިން ވަނީ ގޮވާލާފައެވެ. ތަކުރާރުކޮށް ރައީސް ޔާމީން ދޫކޮށްލުމަށް ބައިވެރިން ގޮވާލާފައި ވެއެވެ.

އިދިކޮޅުގެ މުޒާހަރާގެ ބައިވެރިން ރައީސް ޞާލިހުގެ ކާރުކޮޅު ކުރިމައްޗަށް އަރާ އަޑުއުފުލާފައިވަނީ އެމަނިކުފާނުގެ ސެކިއުރިޓީންގެ ހާޒިރުގައެވެ.