ގާސިމްގެ އެޑްވައިޒަރުކަން ގަބޫލުނުކޮށް، ހަނަފީ ޖޭޕީން ވަކިވެއްޖެ
އިމިގްރޭޝަން ކޮންޓްރޯލަރު މުހައްމަދު އަހުމަދު ހުސައިން (ހަނަފީ) އަށް ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރަކަށް ހަމަޖެއްސުމުން އެ މަގާމު ގަބޫލު ނުކުރައްވައި މިއަދު އެޕާޓީން ވަކިވެއްޖެއެވެ.
އިސްތިއުފާ ދިންކަން އަންގައި ހަނަފީ، ގާސިމަށް ފޮނުއްވި ސިޓީއެއްގައި ވިދާޅުވީ، ޖޭޕީގެ ވިސްނުން މިހާރު ހުރީ ގައުމަށް އެންމެ ފައިދާ ހުރި ގޮތް ކަމަށް އޭނާ އަށް ގަބޫލު ނުކުރެއްވޭ ކަމަށެވެ. އެހެންވެ، މިއަދުން ފެށިގެން ޖޭޕީން ވަކިވާން ނިންމެވީ ކަމަށް އޭނާ ވިދާޅުވި އެވެ.
"ޖުމްހޫރީ ޕާޓީގެ މެމްބަރެއްގެ ގޮތުގައި ހޭދަ މި ކުރެވުނު ދުވަސްތަކަކީ ޕާޓީ އަށް އިހުލާސްތެރި ހިދުމަތްތަކެއް ކޮށްދެވުނު ދުވަސްތަކެއް ކަމުގައި އަޅުގަނޑު ގަބޫލު ކުރަމެވެ. އަދި ޖުމްހޫރީ ޕާޓީގެ މެމްބަރެއްގެ ގޮތުގައި ހޭދަކުރި ދުވަސްތަކުގައި ޕާޓީގެ ލީޑަރެއްގެ ހައިސިއްޔަތުން މަނިކުފާނު ބެހެއްޓެވި ގާތްކަމަށްޓަކައި ވަރަށް އިހުލާސްތެރިކަމާއެކު ޝުކުރު އަދާކުރަމެވެ،" ހަނަފީގެ ސިޓީގައި ވެ އެވެ.
ހަނަފީ ވަނީ ޖޭޕީގެ ޑެޕިއުޓީ ލީޑަރު ކަމުގެ މަގާމަށްވެސް ކުރިމަތިލަައްވާފައެވެ. ނަމަވެސް އެ މަގާމަށް އޭނާ ހޮވިފައިނުވާއިރު، ގާސިމްގެ އެޑްވައިޒަރުގެ މަގާމް އޭނާއަށް ދީފައި ވަނީ ރޭގެ ވަގުތެއްގައެވެ.
ޖޭޕީން ދިން ފުރުސަތެއްގައި ހަނަފީ އިމިގްރޭޝަން ކޮންޓްރޯލަރުގެ މަގާމަށް އައްޔަން ކުރީ 2018 ވަނަ އަހަރުގެ ޑިސެމްބަރ 23 ވަނަ ދުވަހު އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
