ރައީސް ޞާލިޙް އައު ކޯލިޝަނާއި ބައްދަލުކުރައްވައިފި

ރައީސް އިބްރާހިމް މުޙައްމަދު ޞާލިޙް އައު ކޯލިޝަންގެ އިސްލީޑަރުންނާއި މުލިއާގޭގައި ބައްދަލުކުރައްވައިފިއެވެ.

މި ބައްދަލުކުރުމުގައި ބައިވެރިވެފައިވަނީ ކުރިންވެސް ރައީސް ޞާލިޙުގެ ކޯލިޝަންގައި އޮތް ޢަދާލަތު ޕާޓީގެ ރައީސް އަދި ހޯމް މިނިސްޓަރ ޝެއިޙް ޢިމްރާން ޢަބްދުﷲ އާއި އަލަށް ކޯލިޝަނާއި ގުޅުނު މޯލްޑިވްސް ޑިމޮކްރެޓިކް އެލައެންސްގެ ރައީސް އަދި މީދޫ ދާއިރާގެ މެމްބަރު އަހްމަދު ސިޔާމެވެ. މީގެ އިތުރުން އެމްޑީޕީ ގެ ބައެއް އިސްވެރިންނާއި އަނެއް ދެޕާޓީއިން ވެސް އިސް ލީޑަރުން ބައިވެރިވެފައިވެއެވެ.

ބައްދަލުވުމުގައި މަޝްވަރާކުރެވުނު ކަންކަން އަދި އެއްވެސް ޕާޓީއަކުން މީޑިއާތަކަށް ހިއްސާކޮށްފައެއް ނުވެއެވެ.

ރިޔާސީ އިންތިޚާބު ގާތް ވަމުން އަންނައިރު އިންތިޚާބުގައި ބައިވެރިވާ ފަރާތްތަކުގެ ވާދަވެރިކަން ދަނީ އިތުރުވަމުންނެވެ.

އެމްޑީޕީ އާއި ޢަދާލަތު އަދި އެމްޑީއޭ ގެ ކޯލިޝަނުން ރައީސް ޞާލިޙު އިންތިޚާބަށް ނެރުމަށް ނިންމާފައިވާއިރު ޕީޕީއެމް އަދި ޕީއެންސީގެ ކޯލިޝަނަށް އިތުރު ބަޔަކު އަދި ގުޅުފައެއް ނުވެއެވެ. އަދި ފާހަގަ ކޮށްލަން ޖެހޭ އަނެއް ކަމަކީ އެކޯލިޝަނުން ކެނޑިޑޭޓެއްގެ ގޮތުގައި ނެރުމަށް ނިންމާފައިވާ ކުރީގެ ރައީސް ޔާމިން ހުންނެވީ 11 އަހަރުގެ ޖަލު ހުކުމެއް ތަންފީޒު ކުރެއްވުމަށް ޖަލުގައި ކަމެވެ. ކޯލިޝަނާއި ލޯޔަރުންގެ ޓީމުން ކެނޑިނޭޅި ރައީސް ޔާމިން މިނިވަން ކުރުމަށް ދަނީ މަސައްކަތް ކުރަމުންނެވެ. ނަމަވެސް އެކަމުގެ އަލިމަގެއް އަދިއެއް ފެނިފައެއް ނުވެއެވެ.

ޖުމްހޫރީ ޕާޓީ އިން ނިންމާފައިވަނީ ރިޔާސީ އިންތިޚާބަށް އެޕާޓީގެ ކެނޑިޑޭޓަކު ނެރުމަށެވެ. އެޕާޓީއިން ކޯލިޝަން ހަދާނެ ކަމެއް ނުވަތަ ނުހާދާނެ ކަމެއް އަދި އެއް އެނގިފައެއް ނުވެއެވެ. ނަމަވެސް އިއްޔެ އެޕާޓީއިން ވަނީ ކުރީގެ ރައީސް މައުމޫނު ޢަބްދުލް ޤައްޔޫމްގެ އެމްއާރްއެމްގެ ލީޑަރޝިޕާއި ބައްދަލުކޮށްފައެވެ. އަދި އެމްއާރްއެމްގެ ފާރިސް މައުމޫނަކީ ރަނިން މޭޓަކަށް ކަމުދާނެ ބޭފުޅެއް ކަމަށް ޤާސިމް ވަނީ ވިދާޅުވެފައެވެ.

ރިޔާސީ އިންތިޚާބުގައި ވާދަކުރާނެ ކަމަށް އިޢްލާނު ކޮށްފައިވާ އެމްއެންޕީ އިން އެއްވެސް ޕާޓީ އަކާއި ނުވަތަ މިނިވަން ކެނޑިޑޭޓަކާއި ވެސް މަޝްވަރާ ކުރި ކަމެއް މީޑިއާތަކަށް އެނގިފައެއް ނުވެއެވެ.