ކުޑަކުދިންނާއި އަންހެނުންނަށް ކުރާ އަނިޔާގައި އިންސާފު ނުލިބޭތީ ޑިމޮކްރެޓްސްއިން ކަންބޮޑުވުން ފާޅުކޮށްފި

ކުޑަކުދިންނާއި އަންހެނުންނަށް ކުރާ އަނިޔާގައި އިންސާފު ނުލިބޭތީ "ދަ ޑިމޮކްރެޓްސް"އިން ކަންބޮޑުވުން ފާޅުކޮށްފިއެވެ.

ދަ ޑިމޮކްރެޓްސް އިން ނެރުނު ނޫސްބަޔާނެއްގައި ބުނީ، ކުޑަކުދިންނާއި އަންހެނުންނާއި އެހެނިހެން ފަރާތްތަކާމެދު ހިންގާ ޖިސްމާނީ، ނަފްސާނީ އަދި ޖިންސީ އަނިޔާގެ ސީރިއަށް މައްސަލަތައް ރިޕޯޓު ކުރާ މިންވަރު އިތުރުވެފައިވާ ކަމަށެވެ.

އެހެން ވީނަމަވެސް، އެ ކުށްތަކުގައި ޝާމިލުވާ ފަރާތްތަކުގެ މައްސަލަ ނުބެލި، ދައުވާ ނުއުފުލި، އަނިޔާ ލިބުނު ފަރާތްތަކުގެ ހައްގުތަކަށް އުނިކަން ލިބި، އިންސާފުން މަހުރޫމުވާ މައްސަލައިގައި ދަ ޑިމޮކްރެޓްސް ނުހަނު ކަންބޮޑުވުން ފާޅުކުރާ ކަމަށެވެ.

ކުޑަކުދިންގެ ހައްގުތައް ރައްކާތެރިކުރުމާއި، އަންހެނުންނަށް ކުރާ އަނިޔާއާއި، އަންހެނުންނާ މެދު ގެންގުޅޭ ތަފާތުކުރުންތައް ނައްތާލުމާބެހޭ ބައިނަލްއަގުވާމީ މުއާހަދާތަކާއި، އިންސާނީ ހައްގުތަކުގެ އާލަމީ އުސޫލުތައް ދިވެހިރާއްޖެއިންވެސް ބަލައިގަނެފައިވާކަން ފާހަގަކޮށް ޑިމޮކްރެޓްސްއިން ބުނީ، ދިވެހިރާއްޖޭގެ ގާނޫނުއަސާސީއާއި، ގާނޫނުތައްވެސް އެ ފަރާތްތަކަށް ހާއްސަ ރައްކާތެރިކަން ކަށަވަރުކޮށްދޭ ކަމަށެވެ.

"އެހެނަސް، ވަކި މަދުބައެއްގެ ސިޔާސީ މަގުސަދުތަކެއް ހާސިލު ކުރުމަށް ޖިންސީ ހާނީއްކައާއި، ގޯނާއާއި ފުރައްސާރައާއި، ރޭޕާއި، ގެވެށި އަނިޔާގެ އަނިޔާވެރި އަމަލުތައް ހިންގާކަމަށް ތުހުމަތު ކުރެވޭ އަދި ކުށް ސާބިތުވެފައިވާ ފަރާތްތައް އެކި މަރުހަލާތަކުގައި އެކި ގޮތަށް އަދަބުން ވީއްލި، މިނިވަން ކުރަމުންދާކަމީ ހިތާމަހުރި ކަމެއް" ޑިމޮކްރެޓްސްގެ ބަޔާނުގައިވެއެވެ.

މީގެ އިތުރުން ދަ ޑިމޮކްރެޓްސްއިން ބުނީ، އެމަގުން އަމަލު ކުރުމުގެ ސަބަބުން މުޅި ދިވެހި މުޖުތަމައުގެ ސަލާމަތާއި ރައްކާތެރިކަން ގެއްލިދާކަމަށް ގަބޫލު ކުރާ ކަމަށެވެ.

އެހެންކަމުން، ދިވެހިރާއްޖޭގެ ގާނޫނުއަސާސިއާއި ގާނޫނުތަކާއި ބައިނަލްއަގުވާމީ މުއާހަދާތަކުން ދިވެހި ރައްޔިތުންނަށް ލިބެންޖެހޭ ހައްގުތަކާއި ރައްކާތެރިކަން އޭގެ އެންމެ ފުރިހަމަ ގޮތުގައި ކަށަވަރު ކޮށްދިނުމަށްޓަކައި، ހާއްސަކޮށް ކުޑަކުދިންނާއި އަންހެނުންނާމެދު އަނިޔާވެރިކަމުގެ އަމަލު ހިންގާ ފަރާތްތައް ދޫދިނުމެއް، ވަކި އިސްތިސްނާއެއް ނެތި އިންސާފުގެ ކުރިމައްޗަށް ގެނައުމަށް ދައުލަތުގެ ކަމާބެހޭ ފަރާތްތަކަށް ޑިމޮކްރެޓްސްއިން ގޮވާލިއެވެ.