ސިއްރިއްޔާތުގައި އިންޑިއާ އެމްބަސީ ތެރޭގައި ޔޯގާ ދުވަސް ފާހަގަކޮށްފި
މިިއަދު ހެނދުނު އިންޑިިއާ އެންބަސީ ހުންނަ ސަރަހައްދު ބަންދުކޮށް މިއަހަރުގެ ޔޯގާ ދުވަސް ސިއްރިއްޔާތުގައި ފާހަގަކޮށްފިއެވެ.
އެގޮތުން އިންޑިއާ ހައި ކޮމިޝަނުން މިކަމާއި ގުޅިގެން ދާދި ފަހުން ކުރި ޓްވީޓެއްގައި ބުނެފައިވަނީ ބައިނަލްއަގްވާނީ 9 ވަނަ ޔޯގާ ދުވަސް ފާހަގަކޮށްފައިވަނީ ސަރުކާރުގެ މަންދޫބުންތަކާއި، ޑިޕްލޮމަޓިކް ކޯޕުންނާއި ޔޯގާއަށް ޝައުގުވެރިވާ ބައިވެރިންނާއި އެކުގައި ކަމަށެވެ.
މިސަރަހައްދުގައި ހަރަކާތްތެރިވެ އުޅުނު "ވޮއިސް" ގެ މުވައްޒަފަކު މައުލޫމާތު ދެއްވަމުން ވިދާޅުވީ މި ދުވަސް ފާހަގަކޮށްފައިވަނީ ވަރުގަދަ ސަލާމަތީ ފިޔަވަޅުތަކާއިއެކު އެމްބަސީ ހުންނަ ގޯޅި ދެކޮޅުގައި ގިނަ އަދަދެއްގެ ފުލުހުން ބައިތިއްބައިގެން ކަމަށާއި ސަރުކާރުގެ ވެހިކަލްތައްވެސް އެތަނުން ނިކުމެގެން ގޮސްފައިވާ ކަމަށެވެ.
އަދި ބަންދުކޮށްފައި އޮތް ގޯޅިތެރޭގައިވެސް ސަރުކާރުގެ ބައެއް ވެހިކަލްތައް ޕާކުކޮށްފައިވާ ކަމަށާއި މިކަން ފެށުނީ މިއަދު ހެނދުނު 6:00 ގައިކަމަށް މުވައްޒަފު މައުލޫމާތު ދީފައިވެއެވެ.
މިއާއިއެކު މި އަހަރު ޔޯގާ ދުވަސް ސިއްރިއްޔާތުގައި ފާހަގަކުރަން ނިންމީ އެ ދުވަސް ފާހަގަކުރުމާއި ގުޅިގެން މިދިޔަ އަހަރު ހަމަނުޖެހުން ބޮޑިވުމުން ކަމަށް ވެސް އޭނާ މައުލޫމާތު ދިނެވެ.
މިދިޔަ އަހަރު ފާޅުވެރިގޮތެއްގައި މާލޭގެ ގަލޮޅު ބޯޅަދަނޑުގައި ޔޯގާ ދުވަސް ފާހަގަކުރުމަށް ނިންމުމުން ގިނަ ބަޔަކު ނުރުހުން ފާޅުކޮށް އެ ސަރަހައްދުގައި ވަނީި ހަމަ ނުޖެހުން ހިންގާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
